Luka 10:1-42
10 Mah hnuah Bawipa Jesuh nih a dang zultu 70 kha a thim hna i amah a kalnak ding khua hna ah pahnih pahnih in a thlah hmasa hna.
2 Cun hitin a ti hna: “Rawlṭuan awk tampi a um nain a ṭuantu an tlawm. Cucaah rawlṭuantu thlahpiak ding in rawlṭuan Uktu Bawi sinah thla va cam u.
3 Va kal u! Cenghngia rual lakah tuu pawl thlah bantuk in kaan thlah hna.
4 Tangka bawm, rawl i rawnhnak sawngkhoi le phanat i ken hlah u. Lampi ah ahohmanh va chawnbia hna hlah u.
5 Innchung nan luh tikah ‘Hi inn ah daihnak um ko seh’ tiah va ti hmasa hna u.
6 Cuka inn ah daihnak a duhmi an um ahcun an cung ah daihnak a tlung lai. An um lo ahcun daihnak cu nan sinah a kir ṭhan lai.
7 Daihnak a duhmi inn ah khan va tlung u. Rianṭuantu cu rianṭuan man hmuh awk aa tlak caah an in pekmi hna paoh kha va ei u law va ding u. Inn dang ah i ṭhial hlah u.
8 “Khua pakhat nan luh tikah an in cohlan hna ahcun an in hunhmi hna paoh kha va ei u.
9 A zawmi kha va damter hna u law ‘Pathian Pennak a nai cang’ tiah va chim u.
10 Khua pakhat nan luh tikah an in cohlan hna lo ahcun zatlang lam ah va chuak u law,
11 ‘Kan ke ah aa benhmi nan khua leidip hmanh kha kan in thin hnawh hna.* Asinain Pathian Pennak a nai cang ti cu hngal u’ tiah va ti hna u.
12 Kaan chimh hna lai, Biaceihnak Ni ah mah khua cu Sodom khua nakin a temhinnak a fak deuh lai.
13 “Khorazin khuami hna, thil ṭhalo nan tong lai! Bethsaida khuami hna, thil ṭhalo nan tong lai! Nan khua ah ka rak tuahmi khuaruahhar thil hna kha Tair le Sidon khua ah rak tuah ning law a hmasa tein mah khuami hna cu buri puan i aih in le vutcam i phulh in an i ngaichih diam cang lai.
14 Biaceihnak Ni ah Tair le Sidon khua nakin nan temhinnak cu a fak deuh lai.
15 Kapernaum khuami hna, van tiang hlorh kan si lai tiah maw nan i ruah? Nan si lai lo. Thlan khor* ah hlonh nan si lai!
16 “Nan bia a ngaimi hna cu keimah bia a ngaimi an si. Nanmah zei ah aan rel lomi hna cu keimah zei ah a ka rel lomi an si. Keimah zei ah a ka rel lomi cu a ka thlahtu zei ah a rel lomi an si.”
17 Mah hnuah zultu 70 cu thanuam ngai in an rak kir i “Bawipa, na min ruang ah khuachia hmanh nih kan nawl an ngaih” tiah an ti.
18 Mah tikah Jesuh nih “Satan cu nimtlau bantuk in van in a tlakmi kha ka hmuh.
19 Rul le tlangngaikuang hna lamh chih awkah le ral pawl ṭhawnnak tei awkah nawlngeihnak kaan pek cang hna. Nannih cu zeihmanh nih harnak an in pe kho hna lai lo.
20 Asinain khuachia nih nan nawl an in ngaih hna caah i lawm hlah u. Vancung ah nan min ṭial a si ca tu ah i lawm u” tiah a ti hna.
21 Cu caan te ah Jesuh cu thiang thlarau in a khat i lunglawm tein “Van le vawlei Uktu ka Pa, mah a konglam hna hi mifim le cathiammi hna sinah langhter loin ngakchia bantuk in aa toidormi hna sinah na langhter caah zapi hmaiah kaan thangṭhat. A si, ka Pa, nangmah na duhnak ning tein a si ko.
22 Ka Pa nih zeizong vialte kha a ka pek dih cang. Pa dah ti lo nih cun Fapa kong kha ahohmanh nih an hngal lo. Fapa a simi keimah le keimah nih an sinah ka phuanmi hna dah ti lo nih cun Pa kong kha ahohmanh nih an hngal ve lo” tiah a ti.
23 Mah hnuah zultu pawl lawng in an um lioah Jesuh nih “Nan hmuhmi thil a hmu vemi hna cu lunglawmmi an si.
24 Kaan chimh hna lai, profet hna le siangpahrang hna nih nan hmuhmi kha hmuh an duh nain an rak hmu lo, nan theihmi kha theih an duh nain an rak thei lo” tiah a ti.
25 Nikhat cu Nawlbia cawnpiaktu pakhat nih Jesuh kha hneksak duh ah “Saya, zungzal nunnak hmuh awkah zeidah ka tuah lai?” tiah a hal.
26 Jesuh nih “Nawlbia cauk ah zeidah aa ṭial? Zeitindah na rel?” tiah a ti.
27 Anih nih “‘Jehovah* na Pathian cu na lungthin dihlak, na nunnak dihlak, na thazaang dihlak le na ruahnak dihlak in na dawt lai’ i ‘na minunghawi kha nangmah naa dawt bantuk in na dawt lai’ tiin aa ṭial” tiah a leh.
28 Jesuh nih “Na bialehnak cu a hmaan. Mah ning in va tuah law nunnak na hmuh lai” tiah a ti.
29 Asinain mah pa nih ka ding ti kha langhter a duh caah “Ahodah ka innpa cu a si?” tiah a hal.
30 Mah tikah Jesuh nih “Mi pakhat cu Jerusalem in Jeriko khua lei a ṭum lioah lam ah damiah he an i tong. Damiah nih a thil kha an chuh dih, an velh i thi dengmang in an kaltak.
31 Cu lioah cun tlangbawi pakhat cuka lam in a rung ṭum. Mah pa kha a hmuh tikah lam khattalei in a kaltak.
32 Cu bantuk in Levi mi pakhat zong cuka hmun cu a rak phan i a hmuh tikah lam khattalei in a kaltak ve.
33 Samaria mi pakhat zong a khualtlawnnak in cuka lam cu a rak phan ve. A hmuh tikah a zaang a fak ngaingai.
34 Cucaah a va kal hnawh i a hma kha chiti le mitsur zu a thuhpiak, a menpiak i laa cung ah a chuan. Cun khual riahnak inn ah a kalpi i a zohkhenh.
35 A thaizing ah Samaria mipa nih khual riahnak inn-ngeitu kha denarii* piahnih a pek i ‘Hi pa hi rak zohkhenh law a dang a dihmi vialte cu ka rak kir ṭhan tikah kaan pek lai’ tiah a cahtak.
36 Cu a si ah, hi mi pathum hna lakah hin aho hi dah damiah ruang ah harnak a tongmi pa i a innpa cu a si tiah na ruah?” tiin a hal.
37 Anih nih “Amah a zaangfahtu pa kha a si” tiah a leh. Jesuh nih “Nang zong va kal law cutin va tuah ve” tiah a ti.
38 Cuticun khual an tlawn pah in khuate pakhat ah an va phan. Martha tiah auhmi nu nih Jesuh kha a inn ah a tlunter.
39 Anih cu Mary tiah auhmi nau pakhat a ngei. Mary cu Jesuh kehram ah a ṭhu i a cawnpiakmi vialte kha a ngaih.
40 Martha tu cu bultawlnak caah a rian a tam. Cucaah Jesuh sinah a ra i “Bawipa, ka nau nih keimah lawng a ka rinhmi hi na zei a poi lo maw? A ka bawmh ve nakhnga hei chim tuah” tiah a ti.
41 Mah tikah Jesuh nih “Martha, Martha, thil tampi ruang ah na lungre naa theihter i na rian naa tamter.
42 Tampi a hau lo. Phunkhat a um ahcun a za ko. Mary tu nih cun a ṭha bikmi kha aa thim cang. Mah kha a sinin ahohmanh nih an chut kho lai lo” tiah a ti.
Footnotes
^ Kan rian aa liim ti langhternak caah tuahmi a si.
^ A hrampi, “Hades.” Biafang Fianternak ah zoh.
^ Biafang Fianternak ah zoh.
^ Rom ngun tangka piakhat. Biafang Fianternak ah zoh.
