Luka 11:1-54
11 Voikhat cu hmun pakhat ah Jesuh cu thla a cam, a thlacam a dih tikah a zultu pakhat nih “Bawipa, Johan nih a zultu pawl a cawnpiak hna bantuk in thlacam ning kan cawnpiak ve” tiah a ti.
2 Cucaah Jesuh nih “Thla nan cam tikah ‘Ka Pa, na min cu thianter si ko seh. Na Pennak tlung ko seh.
3 Nifatin kan herhmi rawl kha rak kan pe ko.
4 Midang sualnak kan ngaihthiam hna bantuk in kan sualnak zong rak kan ngaithiam ve; tukforhnak ah kan tlak nakhnga lo rak kan bawm’ tiah thla va cam u” tiin a ti hna.
5 Mah hnuah Jesuh nih “Nan lakah pakhatkhat nih hawikom pakhat a ngei hei ti u sih, a hawikom inn ah zanṭim ah a va kal i ‘Ka kawi, changreu hlum thum in ka cawi ta,
6 ka hawi pakhat khual a tlawnnak in a tunai te kha a rak phan i dangh awk zeihmanh ka ngei lo’ tiah a ti.
7 Asinain a hawipa nih ‘Hna rak ka hnawh hlah. Innka kan hrenh cang i ka fale he kan it cang. Ka tho kho ti lo i kaan pe kho ti lo’ tiah innchung in a rak leh.
8 Kaan chimh hna lai, a hawi a si nain tho in pe hlah hmanh seh law, lungdong lo tein a hal peng ahcun a halmi paoh kha a pek ko lai.
9 Cucaah kaan chimh hna lai, hal peng u law pek nan si lai; kawl peng u law nan hmuh lai; king peng u law hunpiak nan si lai.
10 A halmi paoh cu pek an si lai, a kawlmi paoh nih an hmuh lai i a kingmi paoh cu innka hunpiak an si lai.
11 A fapa nih nga a hal tikah rul a pemi pa an um hnga maw?
12 Asiloah arti a hal tikah tlangngaikuang a pemi an um hnga maw?
13 Nannih miṭhalo hmanh nih nan fale kha thilṭha nan pek hna ahcun vancung nan Pa nih a halmi hna kha thiang thlarau a pek chinchin hna lai” tiah a ti.
14 Nikhat cu holh kho loin mi a tuahtu khuachia kha Jesuh nih a ṭhawl. Mah tikah a holh kho lomi pa cu a hun holh kho i mibu cu an khuaruah a har tuk.
15 Asinain mi cheukhat nih “Hi pa nih khuachia a ṭhawl khawhmi cu khuachia bawi Beelzebul* thawng in a si” tiah an ti.
16 Mi cheukhat nih Jesuh kha hneksak duh ah van in a rami khuaruahhar thil pakhat in kan hmuhsak tiah an hal.
17 An ruahnak kha a hngalh tikah Jesuh nih hitin a ti: “Ram pakhat ah rammi pawl an lung aa rual lo ahcun cu ram cu a rawk ko lai, chungkhar pakhat cu an lung aa rual lo ahcun mah chungkhar cu a hmun kho lai lo.
18 Cu bantuk in Satan nih amahle amah aa doh ahcun zeitindah a pennak cu a hmunh khawh lai? Beelzebul thawng in khuachia a ṭhawl tiah nan ka ti.
19 Beelzebul thawng in khuachia ka ṭhawl khawhmi a si ahcun nan zultu hna nih tah aho thawng in dah khuachia an ṭhawl khawh kun? Cucaah nan palhnak kha nan zultu hna nih an langhter ko.
20 Pathian ṭhawnnak* thawng in khuachia ka ṭhawl khawhmi a si ahcun nannih cu Pathian Pennak kha nan tlolh cang.
21 Miṭhawng pa nih hriamnam tling tein a inn kha a ven ahcun a thilri cu a him ko lai.
22 Asinain amah nakin a ṭhawng deuhmi a ra i a tei tikah aa bochanmi hriamnam vialte kha a lakpiak i a thilri kha midang a phawt hna.
23 Keimah lei ah a ṭang lomi paoh cu a ka ralchanhtu an si. Pumhkhawmhnak ah a ka bawm lomi paoh cu ṭhektu an si.
24 “Thlarau ṭhalo pakhat cu minung chung in a chuak i ti um lonak ah dinhnak hmun a kawl nain a hmu lo. Mah tikah ‘Ka chuahtakmi ka inn ah ka kir ṭhan ko lai’ tiah a ti.
25 A va phanh ṭhan tikah inn cu thiang tein a rak i phiahmi kha a hmuh.
26 Mah tikah a va kal ṭhan i amah nakin a sual deuhmi thlarau pasarih kha a va auh hna i cuka ahcun an um. A donghnak ah mah mipa i a sining cu a hlan nakin a zual deuh.”
27 Cutin a chim lioah mibu lakin nu pakhat nih “Nangmah aan pawi i hnuk aan dinhmi nu cu lunglawmmi a si!” tiah a ti.
28 Asinain Jesuh nih “Pathian bia a thei i a zulmi cu lunglawmmi an si deuh!” tiah a leh.
29 Mibu cu an tam chin lengmang tikah Jesuh nih “Atu chan miṭhalo mi hna nih khuaruahhar thil kha hmuh nan duh. Asinain Jonah khuaruahhar thil dah ti lo cu zei bantuk khuaruahhar thil hmanh nan hmu lai lo.
30 Jonah tonmi thil cu Nineveh khuami hna caah khuaruahhar thil a si bantuk in mi Fapa zong hi tuchan mi hna caah khuaruahhar thil a si lai.
31 Biaceihnak ni ah thlanglei siangpahrang nu cu tuchan mi hna he a tho ṭhan lai i tuchan mi hna kha sual aan phawt hna lai. Anih cu siangpahrang Solomon fimnak theih duh ah lam hlatpi in a rat caah a si. Asinain zoh hmanh u! Atu hika ah Solomon nakin a ngan deuhmi a um.
32 Biaceihnak ni ah Nineveh khua mi hna cu tuchan mi hna he an tho ṭhan lai i tuchan mi hna kha sual an in phawt hna lai. Annih cu Jonah chimmi bia ruang ah an i ngaihchih caah a si. Atu hika ah Jonah nakin a ngan deuhmi a um.
33 Mei an van tikah a langh lonak hmun ah an chia bal lo, kho zong in an khuh bal lo, innchung ah a lutmi hna nih ceunak an hmuh nakhnga mei vannak ah an chiah tawn.
34 Mit cu pum caah meiinn a si. Nan mit a fim ahcun nan pum dihlak ceunak in a khat lai. Asinain nahchuahnak lungput he nan zoh ahcun* nan pum dihlak cu muihnak in a khat lai.
35 Cucaah nan ceunak a muih nakhnga lo ralring tein um u.
36 Nan pum cheubang pakhat hmanh muih loin a ceu ahcun nan pum dihlak cu meiinn nih a ceuh bantuk in a ceu lai” tiah a ti.
37 Cutin a chim lioah Farasi mi pakhat nih rawl ei a sawm. Cucaah Jesuh cu innchung ah a lut i cabuai ah a ṭhu.
38 Jesuh nih kut ṭawl loin* rawl a eimi kha mah Farasi mipa nih a hmuh tikah a khuaruah a har.
39 Asinain Bawipa Jesuh nih “Farasi mi hna, nan hrai le nan kheng kha a lenglei in cun nan ṭawl nain a chunglei ah cun hakkauhnak le ṭhatlonak in a khat.
40 Khuaruahnak a ngei lomi hna! Lenglei a sertu Pathian nih chunglei zong a ser ve lo maw?
41 Nan ngeihmi chung khan misifak va peṭhen hna u law zeizong vialte cu nan caah a thiang ko lai.
42 Farasi mi hna, thil ṭhalo nan tong lai! Puṭinan, peganoni* le a dang anhnah a phunphun kha cheuhra cheukhat nan pek nain Pathian dinnak le dawtnak kha zei ah nan rel lo. Cheuhra cheukhat cu pek ding a si ko nain Pathian dinnak le dawtnak zong kha zei rel loin um awk a si lo.
43 Farasi mi hna, thil ṭhalo nan tong lai! Nannih nih pumhnak inn i a hmai bik ah ṭhut kha nan duh. Chawdawrnak hmun ah upatnak he chawnhbiak kha nan duh.
44 Nannih cu thil ṭhalo nan tong lai. Nannih cu fiang tein a lang lomi thlan he nan i lo, mi nih thlan a ummi kha an hngal lo i a cung in an kal len ko!” tiah a ti.
45 Cu tikah Nawlbia cawnpiaktu pakhat nih “Saya, atu bantuk in na chimmi cu na kan thangchiatmi a si” tiah a ti.
46 Jesuh nih hitin a ti: “Nawlbia cawnpiaktu hna, nannih zong thil ṭhalo nan tong lai! Nannih nih thil kha ritpi in nan tom i midang liang cung ah nan khinh tawn. Asinain nanmah tu nih cun nan kutdong hmanh in nan tawng duh lo.
47 “Nannih zong thil ṭhalo nan tong lai, zeicahtiah nan pupa hna nih profet pawl kha an rak thah hna, nannih tu nih cun mah profet hna caah thlan kha nan ser.
48 Nan pupa hna tuahsernak kha nan hngalh ko buin an rak thahmi profet hna caah thlan nan serpiak hnanak thawng in nan hnatlakpi hnanak kha nan langhter.
49 Cucaah fimnak a ngeimi Pathian nih ‘Profet hna le lamkaltu hna kha an sinah ka thlah hna lai, a cheu kha an thah hna lai i a cheu kha an hrem hna lai.
50 Cucaah tuchan mi hna kha vawlei ser hramthawk* in a luangmi profet vialte i thisen,
51 Abel thawk in biakṭheng le biakinn karlak ah an thahmi Zekhariah tiang in an thisen man caah dan ka tat hna lai’ tiah a ti. Kaan chimh hna lai, an thisen man kha tuchan mi hna sinah cawh a si lai.
52 “Nawlbia cawnpiaktu hna, thil ṭhalo nan tong lai! Nannih nih hngalhnak tawh kha nan i fim. Nanmah zong nan lut lo, luh aa timmi zong kha nan thlauh fawn hna.”
53 Cuka in Jesuh a chuah tikah phungbia cawnpiaktu hna le Farasi mi hna nih fakpi in an hun doh i biahalnak tampi an tuah.
54 A bia in tlaih awkah an bawh.
Footnotes
^ Satan a langhtermi min a si.
^ A hrampi, “Pathian kutdong.”
^ Asiloah “a ṭhalomi thil kha lungthin pek in nan zoh ahcun.”
^ Phungphai ning in kut i ṭawl lo kha a si.
^ “Greek, ‘pe′ga·non.’ Mah cu sii ca le rawl ṭamhnak caah hmanmi kung a si.”
^ Adam le Evi fa an ngeih caan.
