Luka 12:1-59
-
Farasi mi hna thilnu (1-3)
-
Minung si loin Pathian kha ṭih (4-7)
-
Khrih cohlannak (8-12)
-
Khuaruahnak a ngei lomi mirum pa tahchunhnak (13-21)
-
Nan lungrethei ti hlah u (22-34)
-
Tuurun hmete (32)
-
-
Hliphlau tein hngak u (35-40)
-
Zumhawk a tlakmi le zumhawk a tlak lomi inn zohkhenhtu (41-48)
-
Daihnak tlunter awkah si loin ṭhencheuter awkah (49-53)
-
A caan thleidan khawh a hau (54-56)
-
Remnak ser (57-59)
12 Mah tikah mi thong tampi an hun i pumh caah pakhat le pakhat cu an i lam. Jesuh nih hmasa bik ah a zultu hna kha hitin a ti hna: “Farasi mi hna i thilnu kha i ralring u, mah cu mi depde an sinak kha a si.
2 Ṭha tein khuhmi thil vialte cu hun dih an si lai. Biathli vialte cu hngalh an si te lai.
3 Muihnak chung i nan chimmi bia cu ceunak ah theih a si lai. A khaan chung i din tein nan chimmi bia cu inncung in thanh a si lai.
4 Ka hawile hna, kaan chimh hna lai, pum lawng a that kho i a dang zeihmanh a tuah kho lomi kha ṭih hna hlah u.
5 Asinain ahodah ṭih ding a si ti kha kaan hmuhsak hna lai: Pum a that i cu hnuah Gehenna* chung i thlaknak nawl a ngeimi kha ṭih u. A si, kaan chimh hna lai, Amah kha ṭih u.
6 Pithlung panga khi a man a tlawmmi phaisa sen pahnih* in an zuar a si ko lo maw? Asinain pithlung pakhat hmanh khi Pathian nih a philh lo.
7 Nan lu cung nan sam hmanh kha a rel dih. Cucaah nan thinphang hlah u, nannih cu pithlung tampi nakin nan sunglawi deuh.
8 “Kaan chimh hna lai, mi hmaiah a ka cohlangmi paoh cu mi Fapa nih Pathian vancungmi hna hmaiah a cohlan ve hna lai.
9 Asinain mi hmaiah a ka hlawmi paoh cu Pathian vancungmi hna hmaiah hlawt a si ve lai.
10 Mi Fapa ralchanh in bia a chimmi cu ngaihthiam an si lai. Asinain thiang thlarau serhsat in bia a chimmi tu cu ngaihthiam an si lai lo.
11 Mizapi hmai, uktu le nawlngeitu hna hmai i an in chuahpi hna tikah zeitindah ka leh hna lai asiloah zeidah ka chim lai tiin nan thinphang hlah u.
12 Nan chim dingmi bia cu mah caan a phanh tikah thiang thlarau nih aan cawnpiak te hna lai.”
13 Cun mibu lakin mi pakhat nih “Saya, ka upa kha ro a ka cheuh ve nakhnga ka chimhpiak” tiah a ti.
14 Jesuh nih “Mipa, nan pahnih karah biaceihtu le biakhiaktu in aho nih dah rian a ka pek?” tiah a ti.
15 Cun “Nan mit fim tein chia u law hakkauhnak a phunphun kha ralring tein hrial u. Zeicahtiah mi pakhat cu zeitluk in a rum hmanh ah a rumnak nih nunnak a pe kho lo” tiah a ti.
16 Cu hnuah Jesuh nih tahchunhnak hmang in hitin a ti: “Mirum pa pakhat i a lo cu rawl tampi a vui caah,
17 ‘Ka rawl chiahnak hmun ka ngeih ti ṭung lo, zei ka tuah ah dah a ṭhat lai?’ tiah a ruat.
18 Mah hnuah ‘Hitin ka tuah lai: Ka rawlbuk kha ka ṭheh hna lai i a ngan deuhmi rawlbuk ka sak hna lai. Cuka ah ka rawl vialte le ka thilri vialte kha ka chiah lai.
19 Cun keimahle keimah kha “Kum tampi caah thilri naa khon cang; cucaah dai tein i din, ei law, ding law lunglawm tein um tuah” tiah kaa ti lai’ tiin a ti.
20 Asinain Pathian nih ‘Khuaruahnak a ngei lomi pa, tuzan hrimhrim ah na nunnak cu lakpiak na si lai. A si ahcun naa khonmi vialte kha aho nih dah a co kun lai?’ tiah a ti.
21 Cu bantuk in anmah caah thilri a khong nain Pathian hmaiah a si a fakmi cu mah mirum pa he an i lo.”
22 Cun Jesuh nih a zultu hna kha “Cucaah kaan chimh hna lai, nan nunnak caah zeidah kan ei lai asiloah nan pum caah zeidah kan i hruk lai tiin nan thinphang ti hlah u.
23 Rawl nakin nunnak a biapi deuh i hnipuan nakin pum a biapi deuh.
24 Langak kong khi ruat hmanh u: Thlaici an tuh bal lo, rawl zong an ṭuan bal lo, rawl chiahnak le rawl khonnak buk zong an ngei lo; asinain Pathian nih a cawm ko hna. Nannih cu mah va pawl nakin nan sunglawi deuh lo maw?
25 Nan lungretheihnak nih nan nunnak kha chikkhat* te hmanh a sauter kho deuh maw?
26 Mah thil hmete hmanh nan tuah khawh lo ahcun a dang thil caah zeicah lungrethei in nan um?
27 Ramlak lily pangpar an ṭhan ning khi ṭha tein zoh hmanh u. Rian an ṭuan lo i la zong an thlur lo. Asinain kaan chimh hna lai, siangpahrang Solomon hmanh lily pangpar tluk in aa dawhmi hnipuan a ngei lo.
28 Zumhnak a dermi hna! Nihin ah a nung i thaizing ah mei an khangh dingmi ramkung hmanh Pathian nih cutin a thuamh hna ahcun nannih chinchin cu aan thuamh chinchin hna lai a si ko lo maw?
29 Cucaah zeidah kan ei lai, zeidah kan din lai tiin nan lungrethei ti hlah u. A hleihluat tuk in lungrethei in um ti hlah u.
30 Mah thil hna cu miphun dang hna nih fakpi in an kawl tawnmi a si. Asinain nan Pa nih mah thil vialte nan herh ti kha a hngalh ko.
31 Cucaah Pathian Pennak kha biapi bik ah chia zungzal u. Cun thil dang vialte zong pek nan si lai.
32 “Tuurun hmete hna, ṭih hlah u. Nan Pa Pathian nih nanmah kha a Pennak pek awkah biachahnak a tuah cang.
33 Nan thilri kha zuar u law mi va ṭhen hna u. A ṭet kho lomi phaisa bawm kha i serh u, a rawk kho lomi vancung chaw kha i khon u. Mah chaw cu mifir nih an fir kho lo i rungrul nih an hrawk kho lo.
34 Zeicahtiah nan chaw a umnak hmun ah nan lungthin zong a um ve lai.
35 “Nan taisawm kha i sawmh u law timhcia tein um u. Nan meiinn kha vang u.
36 Nupi ṭhitnak puai in an bawipa a rak ṭin i kutka a kingh tikah hunpiak colh ding in a hngakmi sal bantuk si u.
37 An bawipa a rak kir tikah hliphlau tein a hmuhmi sal cu lunglawmmi an si! Biatak kaan chimh hna lai, an bawipa thengte taisawm aa sawmh lai, a salle kha cabuai ah a ṭhutter hna lai i a bultawl hna lai.
38 Zantlai hnu* a si ah, zanṭim hnu* a si ah an bawipa a rak phanh tikah timhcia tein a hmuhmi sal cu lunglawmmi an si!
39 Asinain hihi philh hlah u: Inn-ngeitu nih mifir a rat caan kha a hngalh ahcun a inn baoh a si nakhnga lo hngilh lo tein a hngah ko lai.
40 Cucaah nannih zong timhcia tein rak um u, zeicahtiah mi Fapa cu nan i ruah lo caan ah a ra lai” tiah a ti hna.
41 Cun Peter nih “Bawipa, mah tahchunhnak hi kanmah ca lawng ah maw na chim asiloah mizapi caah dah na chim?” tiah a hal.
42 Jesuh nih “Zumhawktlak le a fimmi inn zohkhenhtu cu ahodah a si taktak? A bawipa nih a salle uk awkah le a caan hmaan tein rawl pek awkah rian a pekmi kha a si.
43 A bawipa a tlun tikah cutin a tuahmi sal kha a hmuh ahcun mah sal cu aa lawm lai!
44 Biatak kaan chimh hna lai, mah sal kha a bawipa nih a ngeihmi thil vialte zohkhenhtu ah a chiah lai.
45 Mah sal nih ‘Ka bawipa cu a rau rih ko lai’ tiah a ruah i salpa le salnu pawl kha a velh hna, a ei, a ding i a ri hei ti u sih.
46 Aa ruahchan lomi caan le a hngalh lo caan ah a bawipa cu a rak phan lai. Fakpi in dan a tat lai i zumhawktlak lomi hna sinah a chiah lai.
47 Mah sal nih a bawipa duhnak kha a hngalh ko nain timhcia tein a um lo ca le a bawipa duh ning tein a tuah lo caah voi tampi tuk a si lai.
48 Asinain a bawipa duhnak a hngalh lo ruang i tuk awk tlak a simi thil a tuah sualmi cu tlawmte lawng tuk a si lai. Tampi pek a simi sinin tampi hal a si lai. Rian tampi a hmumi sinin tampi hal a si lai.
49 “Vawleicung ah mei kanghter awkah ka ra. Mei a alh cang caah ka duhmi ning in a si cang.
50 Ka in dingmi tipil phunkhat a um rih. Mah kha ka liim hlan lo cu ka lungre a thei.
51 Vawlei ah daihnak tlunter ding in a ra tiah maw nan ka ruah? A si lo. Kaan chimh hna lai, i ṭhencheuter awkah ka ra.
52 Atu caan thawk in chungkhar ah ṭhencheunak a um lai. Minung panga an um ahcun pathum nih pahnih kha an doh hna lai i pahnih nih pathum kha an doh hna lai.
53 Pa le fapa, fapa le pa, nu le fanu, fanu le nu, a vapa nu le monu, monu le a vapa nu cu an i ṭhencheu lai” tiah a ti.
54 Cu hnuah Jesuh nih mibu kha hitin a ti hna: “Nitlaklei in minmei a zammi nan hmuh tikah ‘Thlichia a hrang lai’ tiah nan ti tawn. Nan chim bantuk in a si taktak.
55 Thlanglei thli a hranmi nan hmuh tikah ‘A lin tuk lai’ tiah nan chim tawn. Nan chim bantuk in a si taktak.
56 Mi depde hna, van le vawlei nan zoh tikah ni a tlang lai maw, ruah a sur lai dah ti kha nan hngalh. Asinain atu caan i a cangmi kha zeicah nan thleidan khawh lo?
57 A hmaanmi thil tuah awkah nanmah theng nih zeicah biachahnak nan tuah lo?
58 Taza aan cuaitu he nawlngeitu sin nan kal lioah remnak ser colh. Cutin a si lo ahcun biaceihtu sinah aan chanh lai. Biaceihtu nih biaceih zung bawi sinah aan chanh chin lai i thong aan thlak lai.
59 Kaan chimh hna lai, tangka* pharkhat hmanh taang loin na liam dih hlan chung paoh cu thonginn in na chuak lai lo.”
Footnotes
^ Biafang Fianternak ah zoh.
^ A hrampi, “assarion piakhat,” mah lio caan ah assarion piakhat cu minit 45 rianṭuan man a si.
^ Asiloah “dong khat.”
^ Zan suimilam 9 hrawng in zanṭim tiang.
^ Zanṭim in zinglei suimilam 3 hrawng tiang.
^ A hrampi, “‘quadran,’ mah cu a man a tlawm tukmi tangka phar a si.”
