Luka 14:1-35
14 Voikhat cu Sabbath ni ah Jesuh cu Farasi mi haotu pakhat inn ah a lut i rawl a ei. Cuka ah a ummi hna nih Jesuh kha ṭha tein an ngiat.
2 A pum ah ti aa zawi i a phing dihmi pa cu a hmaiah a rak um.
3 Jesuh nih Nawlbia cawnpiaktu le Farasi mi hna kha “Sabbath ni ah zawtnak damter awk a si maw, a si lo?” tiah a hal hna.
4 Asinain annih cu dai tein an um. Jesuh nih mah mipa cung ah a kut a chuan i a damter, mah hnuah a ṭinter.
5 Cun Jesuh nih “A fapa asiloah a caw cu Sabbath ni ah khor chung ah tla seh law a chuah colh lomi nan um hnga maw?” tiah a hal hna.
6 Annih nih zeihmanh an let kho lo.
7 Sawm a simi hna nih a langhnak bik hmun ah ṭhutnak an i thim tawnmi kha Jesuh nih a hngalh caah hi tahchunhnak bia hi a chim:
8 “Pakhatkhat nih ṭhitumnak puai ah an in sawm hna tikah a langhnak bik hmun ah va ṭhu hlah u. Inn-ngeitu nih nanmah nakin a biapi deuhmi kha a kawh hna ahcun,
9 nan sinah a ra lai i ‘Na ṭhutnak kha kian’ tiah aan ti hna lai. Mah tikah ningzak buin nan tho lai i a hnu bik ah nan i ṭhial lai.
10 Sawm nan si tikah a hnu bik ah va ṭhu u. Mah tikah inn-ngeitu cu a ra lai i ‘Ka kawi, a hmai ah rak ṭhu’ tiah aan ti hna lai. Cuticun sawmmi vialte hmaiah upatnak nan hmu lai.
11 Mahle mah aa hlorhmi cu ṭhumh an si lai i mi toi ah aa dormi cu hlorh an si lai.”
12 Mah hnuah Jesuh nih a sawmtu inn-ngeitu kha “Chuncaw a si ah, zanriah a si ah na dangh hna tikah na hawile, na unau, na rualchan, na innpa mirum kha va sawm hna hlah. Cutin na sawm hna ahcun annih nih an in sawm ṭhan lai i cham na si ko lai.
13 Rawl danghnak na tuah tikah misifak, mi tlamtlinglo, kebei le mitcaw kha va sawm hna.
14 Annih nih an in cham ṭhan khawh lai lo caah lunglawmhnak na hmu lai. Miding mi hna an thawh ṭhan tikah cham na si te lai” tiah a ti.
15 Hmunkhat ah rawl a ei vemi pakhat nih mah bia kha a theih tikah Jesuh kha “Pathian Pennak chung ah rawl a ei dingmi cu lunglawmmi a si” tiah a ti.
16 Mah tikah Jesuh nih hitin a leh: “Mi pakhat nih rawl danghnak nganpi a tuah i mi tampi kha a sawm hna.
17 Rawl ei caan a phanh tikah sawmmi hna sinah a sal kha a thlah i ‘Ra cang u, zeizong vialte cu timhcia a si cang’ tiah a va chimhter hna.
18 Asinain an dihlak in an rak i silhnalh cio. A pakhatnak pa nih ‘Lo hmun pakhat ka cawk i ka va zoh ta a herh, rak ka ngaithiam ko’ tiah a ti.
19 Cun a dang pakhat nih ‘Cawtum tuah nga ka caw i va hneksak awkah ka kal ta lai, rak ka ngaithiam ko’ tiah a ti.
20 Cun a dang pakhat zong nih ‘Nupi ka ṭhitka te a si i ka ra kho lai lo’ tiah a ti.
21 A salpa cu a rak kir i mah kong vialte kha a bawipa cu a chimh. A bawipa cu a thin a hung tuk i ‘Khulrang in zatlang lam le inn lak lam hna ah va kal. Misifak, mi tlamtlinglo, mitcaw le kebei kha ratpi hna’ tiah a ti.
22 A salpa cu a rak kir ṭhan i ‘Bawipa, na ka fial ning in ka tuah dih cang, asinain hmun a lawng rih’ tiah a ti.
23 A bawipa nih ‘Khua leng i lam ngan ah siseh, lam hme ah siseh va kal law ka inn khat lakin mi an rat nakhnga va hne hna.
24 Kaan chimh hna lai, ka sawmmi ahohmanh nih ka zanriah kha tep hna hlah seh’ tiah a ti.”
25 Cu hnuah Jesuh cu khual a tlawng i mi tampi nih an zulh, Jesuh cu an lei ah aa mer i hitin a ti hna:
26 “Mi pakhat cu ka sinah a ra nain a nu le a pa, a nupi le a fale, a unau le a nunnak kha a dawt deuh ahcun* anih cu ka zultu a si kho lo.
27 Hremnak tung* i put in ka hnu a ka zul lomi cu ka zultu a si kho lo.
28 Nan lakah pakhatkhat nih innsang sak aa timh tikah aa liim tiang tangka nih a ka zo lai maw, zo lai lo ti kha a ṭhu hmasa lai i a tuak lai a si ko lo maw?
29 Cutin a tuak lo ahcun a hram cu a dirh nain a liim kho lai lo. Mah kha a hmumi hna nih,
30 ‘Hi pa nih sak cu a thawk ko nain a liim kho ti lo’ tiah an ti lai i an nihsawh ko lai.
31 Siangpahrang pakhat cu a dang siangpahrang pakhat he an i do hei ti u sih. Ralkap 20,000 he a rami siangpahrang kha ralkap 10,000 in ka do kho lai maw, do kho lai lo ti kha a ṭhu hmasa lai i ruahnak cheutu hna he an i ruah lai a si ko lo maw?
32 A doh khawh lo ding a si ahcun a rak domi siangpahrang lam hla i a um lioah remnak ser ding in lamkaltu a thlah ko hna lai.
33 Cu bantuk in nannih zong nan ngeihmi vialte nan hlawt lo ahcun ka zultu nan si kho lo.
34 “Cite cu a ṭha ko, asinain cite cu a alnak a tlau ahcun alter ṭhan khawh a si ti maw?
35 Mah cite cu vawlei ca le nawn caah san a tlai ti lo i mi nih an hlonh sawhsawh ko. Hna a ngeimi nih thei ko hna seh.”
