Luka 2:1-52
2 Mah lio caan ah Sizar* Augustus nih a pennak chung ah a ummi vialte* kha min cazin pek awkah nawl a chuah.
2 (Siria ram uktu Kuirinias chan ah atu bantuk in a voikhatnak min cazin an lakmi a si.)
3 Cucaah mi vialte cu min cazin pek awkah anmahle an khua cio ah an kir.
4 Josef cu David hrinsor a si caah Galili ram, Nazareth khua in Judea ram ah a ummi Bethlehem tiah auhmi, David chuahkehnak khua ah a kal.
5 Min cazin pek ding in a kal tikah aa hammi a nupi Mary zong a kalpi. Mah lio caan ah Mary cu nau aa ṭhen dengmang cang.
6 Bethlehem khua an um lioah Mary cu nau a ngeih caan a hung phan.
7 Fapate a hrin i amah cu a fater a si. Asinain i ṭhumhnak hmun an ngeih lo caah naute kha puan in a tuam i caw rawl einak kuang chung ah a thlim.
8 Cuka hmun i tuukhal pawl zong ramlak ah an phan i tuurun pawl kha zan khuadei an zohkhenh hna.
9 Ruahlopi in Jehovah* vancungmi cu an hmaiah a hung lang, Jehovah* sunparnak thawng in pawngkam cu a ceu caah an ṭih tuk.
10 Asinain vancungmi nih “Ṭih hlah u! Mi vialte lunglawmhnak nganpi a pe hnga dingmi thawngṭha chim awkah ka ra.
11 Nihin ah David khua ah nanmah aan khamhtu hna ding Bawipa Khrih cu a chuak cang.
12 A chuakkami naute kha puan in an tuam i caw rawl einak kuang chung ah an thlimmi nan hmuh tikah amah a si ti kha hngal u” tiah a ti hna.
13 Mah vancungmi sinah vancungmi ralkapbu tampi cu ruahlopi in an rak lang i Pathian kha an thangṭhat.
14 “Vancung ah a ummi Pathian cu thangṭhat u, vawlei ah a ummi Pathian mithmai ṭha a hmumi hna cung ah daihnak um ko seh” tiah an ti.
15 Cu hnuah vancungmi pawl cu van ah an kai ṭhan, tuukhal pawl nih “Jehovah* Pathian nih a kan hngalhtermi thil kha va zoh u sih, atu Bethlehem khua ah kal u sih” tiah pakhat le pakhat an i ceih.
16 Khulrang in an kal i an va zoh tikah Mary le Josef he, caw rawl einak kuang chung ah an thlimmi, a chuakkami naute kha an hmuh.
17 Mah tikah tuukhal hna nih mah ngakchia he aa tlaiin vancungmi nih a chimmi kha an chimh ṭhan hna.
18 A theimi an dihlak in an khuaruah a har tuk.
19 Mary nih mah kong kha a lungthin chung ah aa cinken i a sullam kha ṭha tein a ruah.
20 Tuukhal hna cu Pathian nih a hngalhter hna ning in an theih i an hmuh caah Pathian kha an thangṭhat i an kir ṭhan.
21 Niriatnak ni ah ngakchia kha a cuarpar an tanpiak i Jesuh tiah min an sak, Mary nau a pawi hlanah vancungmi nih a rak sakmi min a si.
22 Moses Nawlbia ning in i thianh caan a phanh tikah Josef le Mary cu ngakchia he Jerusalem khua ah an kal, cun ngakchia kha Jehovah* hmaiah an chuahpi.
23 “Nan fater pa a simi paoh cu Jehovah* caah a dang tein nan chiah lai” tiah Jehovah* Nawlbia ah aa ṭial caah a si.
24 Cu leng ah “Ṭhuro pahnih asiloah laileng no pahnih nan pekchanh lai” tiah Jehovah* Nawlbia ah aa ṭial bantuk in raithawinak kha an pekchanh.
25 Jerusalem khua ah Simeon tiah auhmi mi pakhat a um. Anih cu a dingmi, Pathian a ṭihzahmi, Israel mi kha Pathian nih a hnemh hna lai caan a hngakmi, thiang thlarau nih lam a hruaimi a si.
26 Jehovah* thlahmi Khrih na hmuh hlan cu na thi lai lo tiah thiang thlarau hmang in Pathian nih a rak hngalhter cang.
27 Simeon cu thiang thlarau lamhruainak thawng in biakinn ah a rak phan, Nawlbia ah aa telmi phunglam ning in tuah awkah ngakchiapa Jesuh kha a nu le a pa nih an ratpi tikah,
28 Simeon nih ngakchia kha a pom i Pathian kha hitin a thangṭhat:
29 “Lianngan Bik Bawipa, na chim ning in hi ngakchia hi ka hmuh cang caah ka thih hmanh ah kaa nuam ko lai.
30 Zeicahtiah nangmah na khamhnak lam kha ka mit in ka hmuh cang.
31 Mah lam kha mi vialte zong nih an hmuh cang.
32 Miphun hna caah muihnak a hlomi ceunak a si i na miphun Israel mi caah sunparnak a si.”
33 Jesuh kong Simeon nih a chimmi kha a nu le a pa nih an theih tikah an khuaruah a har tuk.
34 A nu le a pa kha Simeon nih thluachuahnak a pek hna hnuah ngakchiapa a nu Mary kha “Mah ngakchia ruang ah Israel mi chung ah a tlumi an um bantuk in a thomi zong an um lai, Pathian cu a sinah a um ti a langhtermi thil hna a um ko nain mi tampi nih amah ralchanh in bia an chim lai.
35 Cucaah mi tampi lungthin chung ah zeidah a um ti kha a lang lai. Nang zong vainam sau in chunhmi bantuk na si lai” tiah a ti.
36 Asher phun, Fanuel fanu Anna tiah auhmi profet nu pakhat a um. Anih cu a kum a upa ngai cang, innchunghawi a ngeih in kum sarihnak ah a vapa cu a thi i,
37 nuhmei a si, atu cu kum 84 a si cang. Anih cu biakinn ah a ra peng, rawl a ul, lungtak tein thla a cam i chun he, zan he Pathian kha a biak.
38 Josef le Mary biakinn chung an um lioah a rak phan i Pathian kha a thangṭhat, Jerusalem luatnak caan a hngakmi vialte kha Jesuh kong a chimh hna.
39 A nu le a pa cu Jehovah* Nawlbia ning in zeizong vialte an tuah dih hnuah Galili ram, an umnak khua Nazareth ah an kir ṭhan.
40 Ngakchiapa cu a ṭhawngmi, fimnak in a khatmi le Pathian mithmai ṭha a hmumi pakhat in a hung ṭhang.
41 Jesuh a nu le a pa cu kum fatin Lanhtak Puai* caan ah Jerusalem khua ah an kal tawn.
42 Jesuh kum 12 a si tikah voidang bantuk in Lanhtak Puai ah an kal.
43 Puai ni a dih i an kir tikah ngakchiapa Jesuh cu Jerusalem khua ah a taangta, mah kha a nu le a pa nih an hngal lo.
44 Khual an tlawnṭimi hna sinah aa tel ve ko rua tiah an ruah, nikhat an kal hnuah rualchan pawl le theihhngalh pawl sinah an va kawl.
45 Asinain an hmu lo, cucaah Jerusalem ah an kir ṭhan i an kawl len.
46 Nithum hnuah Jesuh cu biakinn ah an va hmuh, saya hna lakah a ṭhu, an chimmi bia kha a ngaih i biahalnak tampi a tuah hna.
47 A bia a theimi paoh cu a bialeh ning le a fim ning cung ah an khuaruah a har.
48 A nu le a pa nih an hmuh tikah an khuaruah a har tuk i a nu nih “Ka fa, zeicah hitin na kan tuah? Na pa he pei lungrethei ngai in kan in kawl cu” tiah a ti tikah,
49 Jesuh nih “Zeicah nan ka kawl? Ka Pa inn ah ka um lai ti cu nan hngal lo maw?” tiah a ti hna.
50 Asinain a nu le a pa nih a chimmi kha an theithiam lo.
51 Cun Jesuh cu Nazareth khua ah a nu le a pa he a kir ṭhan. A nu le a pa bia kha a ngaih zungzal, a nu nih mah vialte kha a lungthin chung in ṭha tein aa cinken.
52 Jesuh cu pumsalei le fimnaklei in a hung ṭhang i Pathian le minung hmaiah mithmai ṭha a hmu.
Footnotes
^ Asiloah “Rom Siangpahrang.”
^ A hrampi, “vawleicung pumpi ah a ummi vialte.”
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
