Luka 20:1-47
20 Nikhat cu Jesuh nih biakinn ah mi a cawnpiak hna i thawngṭha a chimh hna lioah tlangbawi upa hna, phungbia cawnpiaktu hna le Judah mi hruaitu hna cu an ra i,
2 “Kan chim tuah, zei nawlngeihnak in dah mah thil hna hi na tuah? Asiloah hi nawlngeihnak hi aho nih dah aan pek?” tiah an hal.
3 Jesuh nih “Kei zong bia pakhat in kaan hal ve hna lai. Rak ka let ve u:
4 Johan nih aho nawlngeihnak in dah tipil a pek hna? Pathian sinin maw* asiloah minung sinin dah?” tiah a hal hna.
5 Mah tikah annih nih “‘Pathian sinin’ kan ti ahcun ‘Johan kha zeicah nan zumh kun lo?’ tiah a kan hal lai.
6 ‘Minung sinin’ kan ti ahcun lung in an kan cheh lai. Johan kha profet a si tiah mi nih an ruah fawn” tiah anmahle anmah an i ceih.
7 Cucaah aho sinin dah a si ti kha kan hngal lo tiah an leh.
8 Mah tikah Jesuh nih “Kei zong zei nawlngeihnak in dah mah thil hna hi ka tuah ti kha kaan chim ve hna lai lo” tiah a ti hna.
9 Mah hnuah Jesuh nih mi pawl kha mah tahchunhnak hi a chimh hna: “Mi pakhat nih mitsur dum a ser i dum rianṭuantu kha a hlanh hna, mah hnuah ramdang ah caan sau nawn khual a tlawng.
10 Thei lawh caan a phanh tikah a hmuh dingmi thei lak awkah a sal pakhat kha dum rianṭuantu pawl sinah a thlah. Asinain dum rianṭuantu hna nih an rak velh i kut ro in an kirter.
11 A dang sal pakhat kha a thlah ṭhan tikah amah zong an rak velh, ningzak in an rak tuah i kut ro in an kirter ṭhan.
12 Cun a pathumnak sal kha a thlah ṭhan; amah zong an rak velh i dum leng ah an hlonh.
13 Mah tikah dum ngeitu nih ‘Zeitindah ka tuah lai? Ka dawtmi ka fapa hi ka thlah tuah lai. Anih cu an rak upat ko lai’ tiah a ti.
14 Dum rianṭuantu hna nih a fapa cu an hmuh tikah ‘Mah pa hi rocotu a si. That u sih law a ro cu kanmah ta a si lai’ tiah pakhat le pakhat an i ceih.
15 Cucaah dum leng ah an chuah i an thah. Mah tikah dum ngeitu nih dum rianṭuantu hna kha zeitindah a tuah hna lai?
16 Dum ngeitu cu mitsur dum ah a ra lai, dum rianṭuantu kha a thah hna lai i dum kha midang a hlanh hna lai.”
Mah bia an theih tikah annih nih “Cutin si hram hlah seh!” tiah an ti.
17 Jesuh nih a zoh hna i “‘Innsatu hna nih an hlawtmi lung cu lung santlai bik a kil lung* a hung si’ timi Cathiang bia sullam cu zeidah a si?
18 Mi pakhat cu mah lung cung ah a tlak ahcun a kiak dih lai. Mah lung nih a tlak ahcun a parh dih lai” tiah a ti.
19 Phungbia cawnpiaktu hna le tlangbawi upa hna nih Jesuh chimmi tahchunhnak kha an theih tikah kanmah kong a chimmi a si ti an hngalh caah Jesuh kha tlaih colh an duh, asinain mibu kha an ṭih hna.
20 Annih nih Jesuh kha ṭha tein an ngiat hnuah uktu le nawlngeitu hna sin an chanh khawh nakhnga a bia in foih awkah mi cheukhat kha an hlan hna i miding ngai bantuk in i umter awkah an thlah hna.
21 Annih nih “Saya, nang cu hmaan tein bia a chim i mi a cawnpiakmi, mithmai a zoh lomi le Pathian biatak kong a hmaan ning tein mi a cawnpiakmi na si ti kha kan in hngalh.
22 Cu a si ah Sizar* sinah ngunkhuai kan pek awk a si maw, a si lo?” tiah an hal.
23 Jesuh nih a ṭhalomi an lungput kha a hngalh caah,
24 “Denarii* piakhat in ka hmuhsak tuah u. Hika ah aho mui le aho min dah a cuang?” tiah a hal hna tikah “Sizar” tiah an leh.
25 Mah tikah Jesuh nih “Sizar thil cu Sizar kha va pe u, Pathian thil cu Pathian kha va pe u” tiah a ti hna.
26 Annih nih Jesuh kha mi hmaiah a bia in an foih kho lo. A bialehnak cung ah an khuaruah a har tuk i dai tein an um.
27 Asinain thawhṭhannak a um lo tiah a timi Sadusi* mi cheukhat cu Jesuh sinah an ra i,
28 “Saya, Moses nih ‘Mipa pakhat cu fa ngeih loin a thih ahcun a rohtakmi a nupi kha a unau nih a ṭhit lai i mithi pa caah tefa a hrinpiak lai’ tiah a rak ṭial.
29 Kan lakah unau pasarih an um. Upa bik cu nupi a ngei i fa ngeih loin a thi.
30 Cuticun a pahnihnak,
31 a pathumnak tiin an pasarih ning in rohtakmi a nupi kha an ṭhit. An dihlak in fa ngeih loin an thi dih.
32 A donghnak ah mah minu zong a thi ve.
33 An unau pasarih ning in an ṭhit caah thawhṭhannak ah aho nupi dah a si lai?” tiah an hal.
34 Jesuh nih “Tuchan mi* hna cu an i ṭhi i an i um,
35 asinain a ra laimi chan ah nun awkah le thawh ṭhan awkah aa tlakmi hna cu an i ṭhi, an i um ti lai lo.
36 A tak ti ahcun annih cu an thi kho ti lai lo, vancungmi bantuk an si cang lai. Thihnak in an thawh ṭhan lai caah* Pathian fale an si lai.
37 Moses ṭialmi burbuk kong ah Jehovah* kha ‘Abraham Pathian, Isak Pathian, Jakob Pathian’ tiah a auhmi cu mithi mi hna an thawh ṭhan lainak kong a chimmi a si.
38 Pathian cu mithi mi hna Pathian a si lo, a nungmi hna Pathian a si. Pathian mithmuh ah an dihlak in a nungmi an si” tiah a ti.
39 Mah tikah phungbia cawnpiaktu cheukhat nih “Saya, na chimmi cu a hmaan” tiah an ti.
40 Jesuh kha zei bia hmanh an hal ngam ti lo.
41 Mah tikah Jesuh nih “Mi nih Khrih kha zeicah David fapa tiah an auh?
42 David theng nih Salm cauk ah hitin a ti:
43 ‘Jehovah* nih “Na ral pawl kha na ke tang ah ka chiah dih hna hlan tiang ka orhlei kam ah hin ṭhu” tiah ka Bawipa kha a ti.’
44 David nih Khrih kha Bawipa tiah a auh ahcun Khrih cu zeitindah David fapa cu a si khawh lai?” tiah a hal hna.
45 Mizapi nih a bia an ngaih lioah Jesuh nih a zultu hna kha,
46 “Phungbia cawnpiaktu pawl kha i ralring hna u. Annih cu angki fualpi i hruk in i chawh kha an duh. Chawdawrnak hmun ah upatnak he chawnhbiak kha an duh. Pumhnak inn i a hmai bik ah le rawl danghnak puai i a langhnak bik hmun ah ṭhut kha an duh.
47 Nuhmei inn kha an ei, an hmuar hna i an chuh tawn hna. Mi hmuhnak ah thla saupi in an cam tawn. Cucaah a fak deuhmi dantatnak an ing te lai” tiah a ti hna.
Footnotes
^ A hrampi, “Vancung in maw.”
^ A hrampi, “a kil a cung bik ah a ummi.”
^ Asiloah “Rom Siangpahrang.”
^ Rom ngun tangka. Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
^ Asiloah ‘Thawhṭhannak fale an si caah.’
^ Biafang Fianternak ah zoh.
^ Biafang Fianternak ah zoh.
