Luka 23:1-56
23 Mah tikah aa pummi vialte cu an tho i Jesuh kha Pilat sinah an kalpi.
2 Cun annih nih “Hi pa nih kan miphun kha lam a pialter hna. Sizar* sinah ngunkhuai pek kha a thlauh i amahle amah siangpahrang Khrih kha ka si a ti” tiah sual an puh.
3 Pilat nih “Judah mi hna Siangpahrang cu na si maw?” tiah a hal tikah Jesuh nih “Na chim ning in a si ko” tiah a leh.
4 Mah tikah Pilat nih tlangbawi upa hna le mibu kha “Hi pa hi a sualnak zeihmanh ka hmu lo” tiah a ti hna.
5 Annih nih “Galili ram thawk in hika tiang, Judea ram vialte ah mi kha a cawnpiak hna i buaibainak a chuahter” tiah atu le atu an ti.
6 Pilat nih mah bia kha a theih tikah “Hi pa hi Galili mi maw a si?” tiah a hal hna.
7 Herod ukmi ram chungmi a si ti kha a hngalh tikah a sinah a kuat. Mah lio caan ah Herod cu Jerusalem khua ah a um.
8 Herod nih Jesuh kha a hmuh tikah aa lawm tuk. Jesuh kong tampi a rak theih caah hmuh a duhnak a saupi cang. Khuaruahhar thil pakhatkhat a tuahmi hmuh lai zong aa ruahchan.
9 Cucaah Herod nih bia tampi a hal, asinain Jesuh nih kaakhat hmanh a let lo.
10 Tlangbawi upa hna le phungbia cawnpiaktu hna cu atu le atu an tho i thinhung ngai in sual an puh.
11 Herod le a ralkap hna nih Jesuh cu ningzak in an tuah, thilpuan ṭha kha an hrukter i an nihsawh. Cun Pilat sinah an kuat ṭhan.
12 Herod le Pilat cu a hlanah aa ral ngaimi an rak si nain mah ni ah hawikom an hung si.
13 Mah hnuah Pilat nih tlangbawi upa hna, uktu hna le mi pawl kha hmunkhat ah a auh hna i,
14 “Hi pa hi cozah doh awkah mi a forhtu a si tiin ka sinah nan rak chuahpi. Nan hmaiah ka kherhhlai nain nan puhmi thil kong ah a sualnak zeihmanh ka hmu lo.
15 Herod zong nih a sualnak a hmuh lo caah kan sinah a rak thlah ṭhan. Hi pa nih thih awk tlak sualnak zeihmanh a tuah lo.
16 Cucaah ka tukter hna lai i ka thlah lai” tiah a ti hna.
17 * ——
18 Asinain an dihlak in “Amah hi that law Barabbas tu kha kan thlahpiak!” tiah an au.
19 (Barabbas timi pa cu khua chung ah ral a thawhter ruang le lai a nawn ruang ah thong a tlami a si.)
20 Pilat nih Jesuh kha thlah a duh caah an sinah bia a chim ṭhan.
21 Mah tikah mi pawl cu “Tung cung ah thlai ko! Tung cung ah thlai ko!” tiah an au.
22 Pilat nih “Zei ruang ah? Zei sualnak dah a tuah? Thih awk tlak in sualnak a tuahmi zeihmanh ka hmu lo; cucaah ka tukter hna lai i ka thlah ko lai” tiah a voithumnak a ti ṭhan hna.
23 Jesuh kha tung cung ah thlai ko tiah fak chinchin in an au i hramhram in an hnek caah Pilat nih an duhnak kha a zulh hna.
24 Cucaah Pilat nih an halmi ning in biachahnak a tuah.
25 Ralthawhnak ruang le lainawn ruang ah thong a tlami pa cu an halmi ning in a thlahpiak hna i Jesuh tu cu an duh ning in tuah awkah a chanh hna.
26 Jesuh an kalpi lioah khuate lei in a rami, Sairin khuami Simon kha an hmuh i an tlaih. Cun Jesuh an thlainak ding thingtung kha an putter i Jesuh hnu in an zulhter.
27 A ṭang aa cum i a ṭap lenmi nu hna i telin mi tampi zong nih a hnu in an zulh.
28 Jesuh cu mah nu hna lei ah aa mer i “Jerusalem fanu hna, ka caah ṭap ti hlah u. Nanmah le nan fale ca tu ah ṭap deuh u;
29 zeicahtiah ‘A cingmi nu hna, fa a hring bal lomi le fa hnuk a dinh bal lomi hna cu lunglawmmi an si!’ tiah chim caan a phan cang lai.
30 Mah caan a phanh tikah mi nih tlang hna kha ‘Kan cimh hnawh u!,’ fing hna kha ‘Kan khuh u!’ tiah an ti te lai.
31 Thing a hrin lioah cutin a si ahcun a ro tikah zeidah a lawh te lai?” tiah a ti hna.
32 A dang misual pahnih zong Jesuh he thah awkah an kalpi hna.
33 Luruh timi hmun an phanh tikah Jesuh kha thingtung cung ah an thlai i thir in an khenh. Misual pahnih zong kha a kehlei ah pakhat, a orhlei ah pakhat tiin thir in an khenh ve hna.
34 Jesuh nih “Ka Pa, ngaithiam ko hna, an tuahmi hi zei a si ti an hngal lo” tiah a ti. Cun Jesuh hnipuan kha camcawhfung zuh in an i ṭhen.
35 Mi nih an dir buin an zoh. Uktu hna zong nih an nihsawh i “Hi pa nih midang cu a khamh khawh ko hna; Pathian Thimmi Khrih a si taktak ahcun amahle amah kha i khamh ngat seh” tiah an ti.
36 Ralkap pawl hmanh nih an nihsawh, a pawng ah an kal i mitsur zu thor kha an pek,
37 cun “Judah mi hna Siangpahrang na si ahcun nangmahle nangmah i khamh ngat” tiah an ti.
38 “Judah mi hna Siangpahrang” timi bia kha an ṭial i a lu cung ah an taar.
39 An thlai vemi misual hna lak i pakhat nih “Khrih cu na si lo maw? Nangmahle nangmah i khamh law kanmah zong kan khamh ve ngat!” tiah a serhsat.
40 Mah tikah a dang pakhat nih a mawhchiat i “Pathian na ṭih lo maw? Nang zong amah bantuk in dantatnak na ing ve ko cu ta.
41 Kannih cu kan tuahmi sualnak ruang ah kan i tlakmi dantatnak kha kan inmi a si. Anih tu cu zei sualnak hmanh a tuah lo” tiah a ti.
42 Cun “Bawipa Jesuh, siangpahrang na si tikah ka philh te hlah” tiah a ti.
43 Jesuh nih “Nihin ah biatak kaan chimh lai, Paradis* ah keimah sinah na um lai” tiah a ti.
44 Cu caan cu chun suimilam 12* hrawng a si, mah caan thawk in zanlei suimilam 3* tiang ram chung dihlak ah muihnak a tlung.
45 Zeicahtiah nika ceunak cu a tlau caah a si. Biakinn puanzar zong a lai in cheu hnih ah aa cheu.
46 Jesuh cu “Ka Pa, ka nunnak* kha na kut chung ah kaan pek” tiah thangpi in a au. Cutin a chim dih in a thaw a cat.
47 Ralbawi pa nih a cangmi thil kha a hmuh tikah “Hi pa hi miding a si hrimhrim” tiah a ti i Pathian kha a thangṭhat.
48 A rak zohmi mibu nih a cangmi thil kha an hmuh tikah an ṭang an i cum i inn ah an ṭin.
49 A theihhngalh vialte le Galili in a rak zulmi nu hna zong lam hla in an dir i an zoh.
50 Cuka ah Josef tiah auhmi, Judah Biaceihnak Zungpi chungtel pakhat zong a um, anih cu miṭha le miding a si.
51 (A dang chungtel hna i an khuakhannak le an tuahsernak kha a hna a tla lo.) Anih cu Judea ram, Arimathea khuami a si i Pathian Pennak a hngakmi a si.
52 Pilat sinah a kal i Jesuh a ruak kha a va hal.
53 Cun Jesuh ruak kha thingtung cung in a ṭhumh, puan hmangṭhia in a zual i lungkua ah khorhmi, ahohmanh vui bal rih lonak thlankua ah a vui.
54 Mah ni cu Timhtuahnak ni* a si i Sabbath ni zong aa thawk dengmang cang.
55 Galili ram in Jesuh a rak zulmi nu hna zong thlan ah an kal ve i zeitindah a ruak chiah a si ti kha an zoh.
56 Mah hnuah annih cu zihmui le chiti kha timhtuah awkah inn ah an ṭin. Asinain Sabbath ni ahcun nawlbia ning in an i din.
Footnotes
^ Asiloah “Rom Siangpahrang.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ Biafang Fianternak ah zoh.
^ A hrampi, “nichuah hnu suimilam 6.”
^ A hrampi, “nichuah hnu suimilam 9.”
^ A hrampi, “thlarau.”
^ Biafang Fianternak ah zoh.
