Luka 24:1-53
24 Zarh i a nikhatnak ni, zingkate ah nu pawl cu an timhtuahmi zihmui kha i ken in thlan ah an ra.
2 Asinain thlankhar lung a rak i thawnmi kha an hmuh.
3 A chung an luh tikah Bawipa Jesuh ruak kha an hmu lo.
4 Zeiti ruah awk hngal loin an um lioah an pawng ah a tleu ngaimi puan aa aihmi mi pahnih an hung dir.
5 Nu pawl cu an ṭih tuk i vawlei lei zoh in an lu an khun. Cucaah mah mi pahnih nih “Mithi pawl chiahnak hmun ah zeicah a nungmi cu nan kawl?
6 Hika ah a um lo. A tho ṭhan cang. Galili i a rak um lioah aan chimhmi hna kha ruat ṭhan hmanh u.
7 Mi Fapa cu misual mi hna kut ah chanh a si lai, tung cung ah thah a si lai i a nithumnak ni ah a tho ṭhan lai tiah a rak in chimh hna a si ko lo maw?” tiah an ti hna.
8 Mah tikah Jesuh bia kha an hun hngalh ṭhan.
9 Cun thlan khan an kir i lamkaltu 11 le a dang zultu hna kha mah kong vialte cu an chimh hna.
10 Mah nu hna cu Mary Magdalin, Joanna le Jeim a nu Mary kha an si. Anmah he a rak rami a dang nu hna zong nih lamkaltu hna kha mah kong cu an chimh ve hna.
11 Asinain an chimmi cu sullam a ngei lomi a lawh caah mah nu hna kha an zum hna lo.
12 Asinain Peter cu a tho i thlan ah a va tli. A kun i a chung kha a zoh tikah ruak zualnak puan lawng kha a hmuh. Cucaah inn ah a ṭin i zeidah a cang hnga ti kha a ruat.
13 Mah ni ah zultu pahnih cu Jerusalem in meng 7 hrawng aa hlatnak Emmaus khua ah an kal.
14 A cangmi thil kong vialte kha an i ruah.
15 Cutin an i ruah lioah Jesuh cu an pawng ah a ra i an sinah a kal ve.
16 Asinain Jesuh kha an hngal lo.
17 Jesuh nih “Nan kal pah in zei kong dah nan i al len ko?” tiah a hal hna. Mah tikah mithmai chia ngai in an dir.
18 Kleopas timi pa nih “Jerusalem khua ah na um ko nain nai ah a cangmi thil kong kha zeitindah na hngalh lo ning a si? Ramdang mi maw na si?” tiah a ti.
19 Jesuh nih “Zei kong dah?” tiah a hal hna tikah “Nazareth khuami Jesuh kong a si, anih cu mi vialte le Pathian hmaiah khuaruahhar thil a tuah i a bia zong hmual a ngei tukmi profet pakhat a si.
20 Tlangbawi upa hna le hruaitu hna nih thihdan an pek i tung cung ah an thah cang.
21 Israel miphun a khamhtu in amah kha kan rak i ruahchan. Mah leng ah cu thil hna a cannak in atu hi a nithumnak a si cang.
22 Zultu nu cheukhat ruang ah kan khuaruah a har. Zingka tein thlan ah an kal nain,
23 a ruak kha an hmu lo i a nung ṭhan cang tiah a chimmi vancungmi hna lawng an va hmuhnak kong kha an kan chimh.
24 Kan lak i cheukhat zong thlan ah an va kal tikah nu pawl nih an chim bantuk in an va hmuh. Asinain Jesuh cu an hmu lo” tiah an leh.
25 Mah tikah Jesuh nih “Nan va hrut thiam dah, profet hna nih an chimmi vialte zumh kha nan i harh ngaingai!
26 Khrih cu sunparnak a hmuh nakhnga cutin harnak a in awk a si ko lo maw?” tiah a ti.
27 Cun Moses ṭialmi thawk in Profet vialte nih amah kong he aa tlaiin an ṭialmi Cathiang bia a sullam kha a hrilhfiah hna.
28 A donghnak ah kal an i timhnak khua pawng an phan. Jesuh cu kal rih aa timh tikah,
29 annih nih “Kan sinah i ṭhum ko, zanlei sang a si cang i khua a mui cang lai” tiah an forh caah Jesuh cu an sinah aa ṭhum.
30 An ṭhu i rawl ei an i timh tikah Jesuh nih changreu kha a lak, thla a cam hnuah a cheu i a pek hna.
31 Mah tik lawng ah Jesuh a si kha fiang tein an hun hngalh. Asinain Jesuh cu an sinin a tlau.
32 Mah tikah “Lampi i bia a kan ruah le Cathiang sullam ṭha tein a kan hrilhfiah lioah khan kan lungthin chung ah mei alh bang in a alh a si lo mei?” tiah pakhat le pakhat an i ti.
33 Cun an tho colh i Jerusalem ah an kir ṭhan. Mah ah lamkaltu 11 le an sinah a ummi zultu pawl kha an hmuh hna i,
34 “Bawipa cu a nung ṭhan taktak ko, Simon sinah a lang” tiah an rak chimh hna.
35 Mah tikah annih zong nih lam ah an tonmi kong le changreu a cheu hnu lawng ah Jesuh a si ti an hngalhnak kong kha an chimh ve hna.
36 Cutin an chim lioah Jesuh cu an laifang ah a hung dir i, “Nan cung ah daihnak um ko seh” tiah a ti hna.
37 Asinain thlarau kan hmuh tiah an ruah i an ṭih tuk.
38 Cucaah Jesuh nih “Zeicah nan ṭih, zeicah nan lung a hrin?
39 Ka kut le ka ke hi zoh u, keimah ka si; ka tawng u law ka zoh u. Thlarau ka si ahcun zeitindah ka ruh le ka sa hi a um khawh lai?” tiah a ti hna.
40 Cutin a chim lioah a kut le a ke kha a hmuhsak hna.
41 An khuaruah a har tuk, an i lawm tuk i an zum kho lo. Cucaah Jesuh nih “Ei awk pakhatkhat nan ngei maw?” tiah a hal hna tikah,
42 nga emmi pakhat kha an pek.
43 Jesuh nih a lak i an hmaiah a ei.
44 Cu hnuah Jesuh nih “Nan sin ka um lioah Moses Nawlbia, Profet bia hna le Salm cauk chung ah keimah kong aa ṭialmi vialte cu a tling dih lai tiah ka rak in chimh cang hna” tiin a ti.
45 Cathiang sullam kha tling tein an hngalh khawh nakhnga an lungthin kha a hunpiak hna.
46 Cun Jesuh nih “Cathiang ah Khrih cu fahnak a ing lai, nithumnak ni ah thihnak in a tho ṭhan lai,
47 mi pawl sual ngaihthiam an si nakhnga i ngaihchih a herhnak kong kha Jerusalem khua thawk in miphun vialte sinah amah min cung ah i hngat in chim a si lai tiah aa ṭial.
48 Mah kong hna kha tehte nan khaan lai.
49 Ka Pa nih bia aa kammi kha nannih cu kaan pek hna lai. Van in ṭhawnnak nan hmuh hlan tiang hi khua ah hin um ko u” tiah a cahtak hna.
50 Cu hnuah Jesuh nih a zultu hna kha Bethani khua ah a kalpi hna. Cuka ah a kut a hler i thluachuah a pek hna.
51 Cutin thluachuah a pek hna buin a kaltak hna i van ah a kai.
52 Annih nih Jesuh kha an kunpiak i Jerusalem khua ah lunglawm tein an kir ṭhan.
53 Nifatin biakinn ah an um peng i Pathian kha an thangṭhat.
