Luka 4:1-44
4 Thiang thlarau in a khatmi Jesuh cu Jordan tiva in a chuak i ramcar chung ah thlarau nih lam a hruai.
2 Ramcar ah ni 40 a um, mah caan chung ah zeihmanh a ei lo. Ni 40 a tlin tikah a rawl a ṭam, mah tikah Satan nih a tukforh.
3 Satan nih “Pathian fapa na si ahcun mah lung hna hi changreu ah i can ding in nawl pe hna ngat” tiah a ti.
4 Asinain Jesuh nih “‘Minung cu rawl lawng in a nun awk a si lo’ tiah Cathiang ah aa ṭial” tiin a leh.
5 Mah hnuah Satan nih Jesuh kha tlang cung ah a kaipi i vawleicung pennak vialte kha chikkhat a hmuhsak.
6 Cun “Hi nawlngeihnak le an sunparnak vialte hi kaan pek lai. Mah vialte hi keimah ta an si caah pek ka duhmi paoh kha ka pek khawh hna.
7 Voikhat te na khuk naa bil i na ka biak ahcun mah vialte hi kaan pek dih lai” tiah a ti.
8 Jesuh nih “‘Jehovah* na Pathian lawng na biak lai, amah rian lawnglawng na ṭuan lai’ tiah Cathiang ah aa ṭial” tiin a leh.
9 Mah hnuah Satan nih Jesuh kha Jerusalem khua ah a kalpi i biakinn par* ah a dirter, cun “Pathian fapa na si ahcun hika hin zuang tuah ngat,
10 ‘Pathian nih nangmah khamh awkah a vancungmi kha nawl a pek hna lai,’
11 ‘An kut in an in domh lai i na ke cu lung ah aa khawng lai lo’ tiah Cathiang ah aa ṭial ko kha” tiin a ti.
12 Jesuh nih “‘Jehovah* na Pathian cu va hneksak hlah’ tiah Cathiang ah aa ṭial” tiin a leh.
13 Satan nih Jesuh kha a phunphun in a tukforh dih hnuah a kaltak i caanrem kha a hngak.
14 Jesuh cu thiang thlarau in a khat i Galili ram ah a rak kir ṭhan. Cuka hrawng vialte ah a thawngpang ṭha cu a thang dih.
15 Pumhnak inn ah a hun cawnpiak hna tikah mikip nih an thangṭhat.
16 A rak ṭhannak Nazareth khua a phanh tikah a tuah tawn bantuk in Sabbath ni ah pumhnak inn ah a lut. Cathiang rel ding in a dir tikah,
17 profet Isaiah ṭialmi cazual kha an hun chanh. Jesuh nih cazual kha a kau i a kawl tikah mah cacaang hi a hmuh:
18 “Jehovah* thlarau cu ka cung ah a um. Sifakmi hna sin thawngṭha thanh awkah chiti a ka thuh. Sal taangmi luatnak an hmuh lainak kong, mitcawmi khua an hmuh ṭhan lainak kong le namnehmi luatter an si lainak kong thanh awkah Pathian nih a ka thlah.
19 Jehovah* mithmai ṭha hmuhnak caan kong chim awk zong ah a ka thlah.”
20 Jesuh nih cazual kha a zual i pumhnak inn haotu kha a pek ṭhan. A ṭhut tikah pumhnak inn i a ummi vialte nih amah kha lungthin pek in an zoh.
21 Mah tikah Jesuh nih “Atu nan theihmi cathiang bia hi nihin ah a tling cang” tiah a ti hna.
22 Mi vialte nih Jesuh kha an thangṭhat, a chimmi bia dawhdawh ruang ah an khuaruah a har i “Hi pa hi Josef fapa kha a si lo maw?” tiah an ti.
23 Mah tikah Jesuh nih “‘Siibawi pa, nangmahle nangmah kha i damter ngat’ timi phungthlukbia kha cherhchan in ‘Kapernaum khua ah na tuahmi thil hna kha kan theih, atu na khua zong ah hin cutin tuah ve ngat’ tiah ti nan ka duh ve ko lai.
24 Biatak kaan chimh hna lai, zei bantuk profet hmanh a umnak khua ahcun sunsak a si lo.
25 Biatak kaan chimh hna lai, a tak ti ahcun Elijah chan ah kum thum le thlaruk chung khua a khen i ram chung dihlak ah mangṭam a tlun lioah Israel ram ah nuhmei tampi an um ko.
26 Asinain Pathian nih Elijah kha mah nuhmei nu hna sinah thlah loin Sidon ram, Zarefath khuami nuhmei nu sin tu ah a rak thlah.
27 Profet Elisha chan zong ah Israel ram ah thinghmuimi tampi an um ko. Asinain Siria mi Naaman dah ti lo cu ahohmanh a damter hna lo” tiah a ti.
28 Mah bia kha pumhnak inn ah a ummi hna nih an theih tikah an thin a hung tuk i,
29 Jesuh kha khua leng ah an hnuh, khua an tlaknak tlangpar in a bingtalet in thlak an timh tikah,
30 Jesuh cu mibu lakin aa zuk i a kal.
31 Mah hnuah Jesuh cu Galili ram, Kapernaum khua ah a kal i Sabbath ni ah a cawnpiak hna.
32 Nawlngeitu bantuk in a cawnpiak hna caah mi cu a cawnpiak ning ruang ah an khuaruah a har tuk.
33 Cuka i pumhnak inn ah khuachia nih a tuahmi pa pakhat a um. Aw thangpi in,
34 “Nazareth khuami Jesuh, zeidah na kan duhnak a um? Kanmah hrawh awkah maw na rat? Nang cu Pathian sinin a rami Mithiang na si ti kha ka hngalh ko” tiah a au.
35 Jesuh nih “Dai ko, mipa chung khan chuak” tiah a sik tikah khuachia nih mah pa kha mi hmaiah a thluk i zeihmanh harnak pe loin a chuak.
36 Mah tikah mi pawl cu an khuaruah a har tuk i “Mah hihi zei bantuk bia dah a si? Nawlngeihnak le ṭhawnnak he khuachia kha nawl a pek hna i an chuak ko” tiah pakhat le pakhat an i ceih.
37 Cucaah Jesuh thawngpang cu cuka hrawng hmun kip ah a thang dih.
38 Jesuh cu pumhnak inn in a chuak i Simon inn ah a kal. Simon a nupi i a nu cu a tak a lin i a rak zaw tuk, cucaah damter ding in an nawl.
39 A pawng ah a va kal i a damter tikah a taklinh cu a dai, cun a tho colh i annih kha a bultawl hna.
40 Ni a tlak tikah zawtnak a phunphun a ngeimi kha an ratpi hna. Cucaah Jesuh nih pakhat cio an cung ah a kut a chuan i a damter hna.
41 Khuachia pawl zong mi tampi chung in an chuak i “Nang cu Pathian Fapa na si” tiah an au. Asinain Jesuh nih a sik hna i bia kaakhat hmanh chimnak nawl a pe hna lo, zeicahtiah Jesuh cu Khrih a si ti kha an hngalh caah a si.
42 Khua a dei tikah Jesuh cu hmunking ah a kal. Mibu nih an hmuh hlan lo an kawl i a umnak hmun kha an va phan. Cun anmah kha a kaltak hna nakhnga lo an nawl.
43 Asinain Jesuh nih “Pathian Pennak kong thawngṭha kha khua dang zong ah ka chim awk a si, mah ruang ah cun pei thlah ka si cu” tiah a ti hna.
44 Cun Judea ram, pumhnak inn hna ah a kal i phung a chimh hna.
Footnotes
^ Biafang Fianternak ah zoh.
^ Asiloah “tlakdawn; a san biknak zawn.”
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
