Luka 7:1-50
7 Jesuh nih mi pawl kha mah bia vialte a chimh dih hna hnuah Kapernaum khua chung ah a lut.
2 Ralbawi pakhat nih a dawt tukmi sal pakhat a ngei, mah sal cu fakpi in a zaw i a thi dengmang.
3 Ralbawi nih Jesuh kong a theih tikah Judah upa cheukhat kha Jesuh sinah a thlah hna i a salpa kha damter awkah a rat nakhnga va nawl ding in a cah hna.
4 Judah upa hna cu Jesuh sinah an va phan i “Hi pa hi na bawmhnak hmuh awkah aa tlakmi a si,
5 kan miphun kha a kan dawt i kan caah pumhnak inn hmanh a kan sakpiak” tiah biatak tein an nawl.
6 Cucaah Jesuh cu anmah he cun a va kal. Asinain ralbawi inn a phanh lai ah ralbawi nih a hawile kha a rak thlah hna i “Saya, na re i theihter ti hlah, ka inn i nangmah rat ding cu kaa tlak lo.
7 Nangmah sin rat awk zong ah kaa tlak lo tiah ka ruah. Asinain dam seh tiah na tinak men in ka salpa cu a dam ko lai.
8 Kei zong cunglei bawi ka ngeih bantuk in ka kut tang ah a ummi ralkap zong an um. Pakhat cu ‘Kal!’ ka ti ahcun a kal i a dang pakhat cu ‘Ra!’ ka ti ahcun a ra, cun ka sal cu ‘Hihi tuah!’ ka ti ahcun a tuah ko” tiah a chimhter hna.
9 Mah bia kha Jesuh nih a theih tikah a khuaruah a har tuk, a rak zulmi mibu lei ah aa mer i hitin a ti hna: “Kaan chimh hna lai, hi tluk in a zumhnak a fekmi hi Israel mi lakah ka hmu bal hna lo.”
10 Ralbawi nih a thlahmi hna cu inn ah an kir ṭhan i salpa a rak dam cangmi kha an hmuh.
11 Cu hnu tlawmpal ah Jesuh cu Nain tiah auhmi khua pakhat ah a kal, a zultu hna le mibu nganpi zong amah he an kal ve.
12 Khua kutka pawng an phanh tikah nuhmei nu i a fapa ngeihchunh te kha vui awkah a rak i zawnmi hna he an i tong. Nuhmei nu sinah khuami hna zong an ra ve.
13 Jesuh nih nuhmei nu kha a hmuh tikah a zaang a fak ngaingai i “Ṭap ti hlah” tiah a ti.
14 Mah hnuah a va kal i mithi zawnhnak laang kha a tawngh tikah a zawntu hna cu an dir. Cun Jesuh nih “Tlangvalpa, tho kaan ti!” tiah a ti tikah,
15 mithipa cu a hung nung ṭhan, a ṭhu i bia a hun chim, cun Jesuh nih a nu sinah a chanh.
16 An dihlak in ṭihnak in an khat i “Kan lakah profet ngan a chuak cang,” “Pathian nih a miphun kha a hngalh cang hna” tiah Pathian kha an thangṭhat.
17 Mah thawngpang cu Judea ram vialte le a pawngkam ram hmun kip ah a thang dih.
18 Mah kong vialte kha Johan zultu hna nih Johan kha an chimh ṭhan.
19 Mah tikah Johan nih a zultu pahnih kha Jesuh sinah a thlah hna i, “A Ra Dingmi cu nangmah maw na si asiloah midang dah kan hngah rih lai?” tiah a halter hna.
20 A sin an va phak tikah “Tipil Petu Johan nih ‘A Ra Dingmi cu nangmah maw na si asiloah midang dah kan hngah rih lai?’ tiin a kan halter” tiah an ti.
21 Cu caan ahcun Jesuh nih zawtnak a phunphun a ngeimi, khuachia nih a tuahmi tampi kha a rak damter hna i mitcawmi tampi zong kha khua a hmuhter ṭhan hna.
22 “Va kal u law nan theihmi le nan hmuhmi vialte hi Johan cu va chim u: Mitcaw nih khua an hmuh cang, kebeimi an kal kho cang, thinghmuimi an thiang cang, hnachetmi nih khua an theih khawh cang, mithi thawhter an si cang i sifakmi nih thawngṭha an theih cang.
23 Ka cung ah lunghrinnak zeihmanh a ngei lomi* cu lunglawmmi an si” tiah a ti.
24 Johan zultu pawl an kir tikah Jesuh nih Johan kong he aa tlaiin mibu kha hitin a ti hna: “Ramlak ah ahodah nan va zoh? Thli a hrannaklei ah aa hninmi phaikung bantuk minung maw? A si lo.
25 A si ahcun ahodah nan va zoh? Thilpuan ṭhaṭha in aa thuammi maw? A si lo. Cutin dawh tein aa thuam i nun nuam ngai in a nungmi hna cu siangpahrang inn ah pei an um cu.
26 Cu a si ah ahodah nan va zoh? Profet maw? A si. Kaan chimh hna lai, anih cu profet a si. Profet hna nakhmanh in a ngan deuh.
27 ‘Ka lamkal kha na hmai in ka thlah lai, na kalnak ding lam kha na hmai in aan sialpiak lai’ tiin Cathiang ah aa ṭialmi cu amah kong kha a si.
28 Kaan chimh hna lai, a nung balmi vialte lakah Johan nakin a ngan deuhmi an um lo, asinain Pathian Pennak ah a hme bikmi cu Johan nakin a ngan deuh.”
29 (Mah kha an theih tikah ngunkhuai kholtu le mizapi cu Johan sinah tipil an in caah Pathian cu a dingmi a si ti kha an cohlan.
30 Asinain Farasi mi le Nawlbia cawnpiaktu hna cu Johan sinah tipil an in lo caah an ca i Pathian nih a timhpiakmi hna kha zei ah an rel lo.)
31 “Cucaah atu chan mi hna hi ahote he dah ka tahchunh hna lai, ahote he dah an i lawh?
32 Chawdawrnak hmun ah a ṭhu i ‘Thonglawi kan in tumh hna nain nan laam lo. Ṭah hla kan in sak hnawh hna nain nan ṭap duh fawn lo’ tiah pakhat le pakhat aa au hnawhmi ngakchia pawl he an i lo.
33 Cu bantuk in nannih zong nih midang bantuk in a ding, a ei lomi Johan a rat tikah ‘Hi pa hi khuachia aa hrolh’ tiah nan ti.
34 Midang bantuk in a ding, a eimi mi Fapa a rat tikah ‘Ngunkhuai kholtu le misual mi hna he aa kommi, mizuram le misaram’ tiah nan ti ṭhan.
35 Asinain fimnak cu a ding ti kha a tuahsernak nih* an langhter ko.”
36 Farasi mi pakhat nih rawl ei a sawm caah Jesuh cu a innchung ah a lut i cabuai ah a ṭhu.
37 Misual in hngalhmi nu pakhat nih cuka inn ah Jesuh cu rawl a ei ti kha a hngalh tikah lungraang thawl pakhat in zihmui a rak i ken.
38 Mah hnuah Jesuh kehram ah a khuk aa bil i a ṭap, a mitthli ruang ah Jesuh ke cu a cin caah a sam in a hnawh. Cun a ke kha a hnamh i zihmui a toih.
39 Jesuh a sawmtu Farasi mi nih mah kha a hmuh tikah “Hi pa hi profet a si taktak ahcun a ke a tawngmi nu cu ahodah a si ti kha a hngalh ko lai, anih cu sualnak tampi a tuahmi nu a si ti kha a hngal hnga lo maw?” tiah a ruah.
40 Cucaah Jesuh nih “Simon, chimh ding pakhat kaan ngei” tiah a ti tikah “Chim ko, Saya!” tiah a leh.
41 “Tangka cawihtu pakhat sinah lei a bami mi pahnih an um, pakhat nih denarii* 500 a bat i a dang pakhat nih 50 a bat.
42 Cham ding an ngeih lo caah an pahnih ning in an leiba kha a ngaihthiam dih hna. A si ahcun aho nih dah tangka cawihtu kha a dawt deuh lai?” tiah a hal.
43 Simon nih “A leiba a tam deuhmi pa nih a dawt deuh lai tiin ka ruah” tiah a leh. Jesuh nih “Na hmaan” tiah a ti.
44 Mah tikah minu lei ah aa mer i Simon kha “Hi nu hi na hmu ko lo maw? Na inn ah ka lut i ka ke ṭawlnak caah ti na ka pe lo, anih nih cun ka ke kha a mitthli in a ṭawl i a sam in a ka hnawhpiak.
45 Nang nih keimah kha hnamh in na ka dong lo, anih nih cun hi innchung ka luh in atu tiang ka ke kha ngol loin a hnamh.
46 Nang nih cun ka lu ah chiti na ka toih lo, anih nih cun ka ke ah zihmui a ka toih cang.
47 Cucaah kaan chimh lai, anih cu a sualnak a tampi ko nain ngaihthiam a si cang, zeicahtiah dawtnak tampi a langhter, tlawmte lawng ngaihthiam a simi nih tlawmte lawng dawtnak an langhter tawn” tiah a ti.
48 Mah hnuah minu kha “Na sualnak cu ngaihthiam na si cang” tiah a ti.
49 Cabuai ah a ṭhu vemi hna nih “Sualnak hmanh a ngaithiammi cu ahodah a si hnga?” tiah pakhat le pakhat an i ceih.
50 Asinain Jesuh nih minu cu “Na zumhnak nih aan khamh cang, lungdai tein va kal ko” tiah a ti.
Footnotes
^ A hrampi, “keimah ruang ah tlukrilh awk a ruang a ngei lomi.”
^ A hrampi, “a fale nih.”
^ Rom ngun tangka piakhat. Biafang Fianternak ah zoh
