Luka 8:1-56
-
Jesuh a zulmi nu pawl (1-3)
-
Thlaici vorhtu tahchunhnak (4-8)
-
Jesuh nih tahchunhnak a hmannak a ruang (9, 10)
-
Thlaici vorhtu tahchunhnak a fianter (11-15)
-
Khuh lomi meiinn (16-18)
-
Jesuh a nu le a naule (19-21)
-
Jesuh nih thlichia a daihter (22-25)
-
Jesuh nih khuachia kha vokrun chung ah a luhter hna (26-39)
-
Jairu fanu; nu pakhat nih Jesuh puan a tawngh (40-56)
8 Cu hnu tlawmpal ah Jesuh cu khuapi pakhat hnu pakhat, khuate pakhat hnu pakhat ah a kal i Pathian Pennak kong thawngṭha kha a chimh hna. Lamkaltu 12 zong a sinah an kal ve.
2 Khuachia a ṭhawlpiakmi le an zawtnak a damtermi nu cheukhat zong an i tel. Khuachia pasarih tuahnak in a damtermi Magdalin tiah auhmi Mary;
3 Herod inn a zohkhenhtu Chuza a nupi Joanna; Susanna le a dang nu tampi zong an i tel. Annih cu an ngeihchiah kha hmang in Jesuh le lamkaltu pawl bultawl awkah a zulmi an si.
4 Khua kip in a rak phanmi hna i telin mibupi cu an i pumh tikah Jesuh nih tahchunhnak hmang in hitin a chim:
5 “Voikhat cu thlaici vorhtu pa cu thlaici vorh awkah aa thawh. Thlaici a vorh tikah thlaici cheukhat cu lamkam ah an tla i lamh chih an si, cun va nih an rak ei.
6 Thlaici cheukhat cu vawlei a tlawmnak lung cung ah an tla. An keuh nain ti an hmuh lo caah an car colh.
7 Thlaici cheukhat cu hling lakah an tla, hlingkung he cun an ṭhangṭi i hling nih a khuh dih hna.
8 Thlaici cheukhat cu vawlei ṭhatnak ah an tlak caah an keuh i a let 100 in an vui.” Mah hnuah “Hna a ngeimi nih thei ko hna seh” tiah thangpi in a chim.
9 A zultu hna nih mah tahchunhnak i a sullam kha an hal tikah,
10 Jesuh nih “Nannih cu Pathian Pennak he aa tlaimi, a thiangmi biathli hngalh khawhnak pek nan si. Asinain midang ca tu ahcun hi thil vialte hi tahchunhnak menmen an si. Cucaah annih nih a zoh cu an zoh ko nain an hmu lo. A theih cu an theih ko nain a sullam an hngalthiam lo.
11 Mah tahchunhnak i a sullam cu hitihin a si: Thlaici cu Pathian bia kha a si.
12 Lamkam ah a tlami thlaici a sullam cu Pathian bia kha an theih ko nain an zumh nakhnga lo le khamhnak an hmuh nakhnga lo an lungthin chung i Pathian bia Satan nih a lak ṭhanmi kha a chim duhmi a si.
13 Lung cung ah a tlami thlaici a sullam cu Pathian bia an theih tikah lunglawm tein an cohlan nain an lungthin chung ah hram aa sih lomi kha a chim duhmi a si. Chikkhat cu an zumh nain hneksak an si tikah an tlu colh.
14 Hling lakah a tlami thlaici a sullam cu Pathian bia kha a thei ko nain nunnak he aa tlaiin lungretheihnak, thilri chawva le nuamhsaihnak hna ruang ah a lung a vaivuanmi kha a chim duhmi a si. Khuh dih cikcek an si caah thei ṭha an tlai kho lo.
15 Vawlei ṭha ah a tlami thlaici a sullam cu lungthin ṭha a ngeimi hna nih Pathian bia kha an theih i an i cinken caah inkhawhnak he thei an tlaimi kha a chim duhmi a si.
16 “Meiinn an van hnuah ahohmanh nih kho in an khuh bal lo, ihkhun tang zong ah an chia bal lo. Innchung ah a lutmi hna nih ceunak an hmuh nakhnga mei vannak ah an chiah.
17 Khuhmi thil vialte cu an lang dih lai. Ahohmanh nih an hngalh nakhnga lo ṭha tein thuhmi thil vialte cu langhter an si lai.
18 Cucaah nan ngaih ning kha ṭha tein i ralring u. Zeicahtiah a ngeimi cu chap an si lai, a ngei lomi cu ka ngei tiah a ruahmi thil hmanh kha chuh a si lai” tiah a ti.
19 Mah lioah Jesuh a nu le a naule an rak phan. Asinain mi an tam tuk caah Jesuh pawng an phan kho lo.
20 Cucaah Jesuh kha “Na nu le na naule nih ton an in duh i a leng ah an in hngah ko” tiah an ti.
21 Jesuh nih “Pathian bia kha a thei i a zulmi, hi mi hna hi ka nu le ka unau cu an si” tiah a leh hna.
22 Nikhat cu Jesuh le a zultu hna cu lawng cung ah an kai. Jesuh nih “Rili khattalei ral ah kal hna u sih” tiah a ti hna. Cucaah an i thawh.
23 Asinain an kal lioah Jesuh cu aa hngilh. Mah lioah thlichia fakpi in a hrang i lawng chung ah ti a luh caah lawng cu a pil dengmang.
24 A zultu hna nih an va ṭhangh i “Saya, Saya, kan thi dih cang lai hih!” tiah an ti. Jesuh cu a tho i thli le tilet kha nawl a pek tikah thlichia cu a dai.
25 Jesuh nih “Nan zumhnak cu khoika ah dah a um?” tiah a ti hna. A zultu hna cu thinphang thlalau in an um i “Hi pa hi zei bantuk minung dah a si? Thli le tilet hmanh nih a bia an ngaih” tiah anmahle anmah an i ceih.
26 Galili rili khattalei ral, Geresin ram ah an va phan.
27 Jesuh cu lawng cung in a ṭum tikah cuka hmun i khuachia nih a tuahmi pa pakhat he an i tong. Anih cu hnipuan aa hruk lo i inn ah um loin thlankua lakah a umnak a saupi cang.
28 Jesuh kha a hmuh tikah a hmaiah a khuk aa bil i “Cung Nung Bik Pathian Fapa Jesuh, zeidah na ka duhnak a um? Dan ka tat sawh hlah, kaan nawl ko” tiah a au.
29 (Jesuh nih mah mipa chung ah a lutmi khuachia kha chuak tiah nawl a pek caah a si. Khuachia nih atu le atu an luh hnawh caah thir cikcin in an hren i hreng an khenh nain an hrennak cu a chah dih tawn. Khuachia nih amah kha mi umlonak hmun ah an kalter tawn.)
30 Jesuh nih “Na min ahodah a si?” tiah a hal tikah “Bupi” tiah a leh. A chung ah khuachia tampi an luh caah a si.
31 Khuachia hna nih khor thuk chung ah kan thla hlah tiah Jesuh kha an nawl.
32 Vokrun runkhat cu tlang cung ah an tlon caah khuachia nih mah vokrun chung ah luhnak nawl kan pe tiah an nawl. Jesuh nih luhnak nawl a pek hna tikah,
33 khuachia cu mah mipa chung in an chuak i vokrun chung ah an lut. Vok cu an run ningpi in lungpang* in an zuang i ti chung ah an thi dih.
34 Vok cawngtu hna nih mah kha an hmuh tikah khuapi ah le khuate ah an va tli i a cangmi vialte kha an chimh hna.
35 Thil a cangmi kha mi nih an rak zoh tikah khuachia nih a tuahmi pa cu hnipuan aa hruk i Jesuh kehram ah lungfim tein a ṭhutmi kha an hmuh caah an ṭih tuk.
36 Cu thil a hmutu hna zong nih khuachia aa hrolhmi pa zeitindah a dam ti kha mi an chimh ve hna.
37 Geresin ram i a ummi hna nih cun an ṭih tuk caah Jesuh kha an sinin chuah awkah an nawl. Cucaah Jesuh cu lawng cung ah a kai.
38 Khuachia nih a chuahtakmi pa nih a sinah kalter ve ding in a nawl. Asinain Jesuh nih a awnh lo i,
39 “Inn ah va ṭin law na caah Pathian nih aan tuahpiakmi vialte kha mi va chim hna” tiah a ti. Cucaah mah mipa cu a ṭin i a caah Jesuh nih a tuahmi thil kha khua chung dihlak ah a chimh hna.
40 Jesuh cu Galili ram a kir ṭhan tikah mibupi nih lunglawm tein an rak don, zeicahtiah amah cu an rak hngah ko.
41 Jairu tiah auhmi pa pakhat a ra; anih cu pumhnak inn haotu a si. Jesuh kehram ah a bawk i a inn ah zulh ding in a nawl.
42 Kum 12 a simi a fanu ngeihchunh te cu a thih dengmang caah a si.
Jesuh a kal tikah mibupi nih an zulh i an hnor pah lengmang.
43 Kum 12 chung thichuah zawtnak a ngeimi nu pakhat nih a zulh ve. A zawtnak kha ahohmanh nih an damh kho lo.
44 Jesuh hnulei in a ra i a puanki kha a tawngh tikah a thi chuakmi cu chikkhat te ah a pit colh.
45 Jesuh nih “Ahodah a ka tawng?” tiah a hal hna tikah kan in tawng lo tiah an leh. Peter nih “Saya, mibu nih an in butmi le an in hnor lenmi cu na hngalh ko cu ta” tiah a ti.
46 Asinain Jesuh nih “Pakhatkhat nih an ka tawngh ko, ka chung in ṭhawnnak a chuahmi kha ka hngalh” tiah a ti.
47 Minu nih i thuh khawh a si lo ti a hngalh tikah ther lengmang in Jesuh hmaiah a chuak i a khuk aa bil. Cun a tawnghnak a ruang le a tawngh cangka in a zawtnak a damnak kong kha mi vialte hmaiah a phuan.
48 Asinain Jesuh nih “Ka fanu, na zumhnak nih aan damter cang. Lungdai tein va kal ko” tiah a ti.
49 Cutin a chim lioah Jairu inn in mi pakhat a ra i “Na fanu cu a thi cang; Saya cu hnahnawh duh ti hlah” tiah a ti.
50 Mah kha a theih tikah Jesuh nih “Zeihmanh ṭih hlah, zumhnak tu ngei ko. Na fanu cu a nung ṭhan lai” tiah a ti.
51 Inn an phanh tikah Jesuh nih ngakchianu i a nu le a pa, Peter, Johan le Jeim dah ti lo cu ahohmanh innchung ah a luhter hna lo.
52 Ngakchianu a thih caah mi pawl cu an ṭang an i cum i ngaihchia ngai in an ṭap. Jesuh nih “Ṭap ti hlah u, ngakchianu hi a thih ṭung lo. Aa hngilhmi a si” tiah a ti hna.
53 Ngakchianu cu a thi cang ti kha an hngalh caah an nihsawh.
54 Jesuh nih a kut kha a tlaih i “Ngakchianu, tho!” tiah a ti.
55 Ngakchianu cu a nung ṭhan* i a tho colh. Cun ei awk pakhatkhat pe u tiah a ti hna.
56 A nu le a pa cu an i lawm tuk hringhran. Asinain Jesuh nih mah kong kha aho sin hmanh ah chim lo ding in a thlauh hna.
