Luka 9:1-62
-
Phungchimnak caah lamkaltu 12 kha lamhruainak a pek hna (1-6)
-
Jesuh ruang ah Herod a lung aa tuai (7-9)
-
Jesuh nih mi 5,000 rawl a dangh hna (10-17)
-
Peter nih Khrih aho a si kha a langhter (18-20)
-
Jesuh nih a thihnak kong a chimchung (21, 22)
-
Zultu taktak sinak (23-27)
-
Jesuh mui thlennak (28-36)
-
Khuachia nih a tuahmi ngakchiapa a damter (37-43a)
-
Jesuh nih a thihnak kong a chim ṭhan (43b-45)
-
Ahodah a ngan bik tiah zultu pawl an i al (46-48)
-
A kan ralchanh lomi cu kanmahlei mi an si (49, 50)
-
Samaria khua pakhat nih Jesuh an cohlang lo (51-56)
-
Jesuh hnu zulh ning (57-62)
9 Jesuh nih lamkaltu 12 kha hmunkhat ah a auh hna i khuachia vialte ṭhawl khawhnak le zawtnak damter khawhnak ṭhawnnak le nawlngeihnak a pek hna.
2 Pathian Pennak kong chim awk le mizaw damter awkah a thlah hna i,
3 “Khualtlawnnak ah zeihmanh i ken hlah u. Tangka,* ṭhiangṭhunh, rawl i rawnhnak sawngkhoi le ei awk i ken hlah u; angki a hlei in* i ken hlah u.
4 Inn pakhat i nan luh tikah cuka khua in nan chuah hlan tiang mah inn ah cun i ṭhum u.
5 An in cohlan hna lo ahcun cuka khua in nan chuah tikah nan ke i leidip kha va thing u. Mah cu an caah ralrin peknak a si lai” tiah a ti hna.
6 Mah hnuah lamkaltu pawl cu khuate pakhat hnu pakhat ah an kal i thawngṭha an chim, a zawmi kha an damter hna.
7 Mah kong kha peng uktu Herod* nih a theih tikah a lung a tuai ngaingai, zeicahtiah mi a cheu nih Johan cu thihnak in a tho ṭhan cang tiah an ti caah a si.
8 A cheu nih Elijah a hung lang cang tiah an ti, a cheu nih hlanlio profet pakhat thihnak in a tho ṭhan cang tiah an ti.
9 Herod nih “Johan cu a lu ka tan cang ko cu ta. Thawng ka theihmi pa hi ahodah a si hnga?” tiah a ti i Jesuh kha hmuh a duh tuk.
10 Lamkaltu hna cu Jesuh sin an rak kir ṭhan tikah an tuahmi vialte kha an chimh. Jesuh nih anmah lawng in Bethsaida timi khua ah a kalpi hna.
11 Mah kha mi nih an hngalh tikah a hnu in an zulh. Jesuh nih lunglawm tein a cohlan hna i Pathian Pennak kong kha a chimh hna, a zawmi kha a damter hna.
12 Zanlei sang a phanh tikah lamkaltu 12 cu Jesuh sinah an ra i “Hika hmun hi hmunking a si, mi pawl hi thlah cang hna law pawngkam khua hna ah riahnak hmun le ei awk an i kawl khawh lai” tiah an ti.
13 Jesuh nih “Nanmah nih dang ko hna u” tiah a ti tikah a zultu hna nih “Changreu hlum nga le nga pahnih lawng pei kan ngeih cu, mi hi vialte ei awk cu kan va kal lai i kan va caw lai maw?” tiah an hal.
14 Cuka ah pa 5,000 hrawng an um. Jesuh nih “Mi pawl kha a phuphu in 50 cio hrawng in ṭhutter hna u” tiah a ti.
15 Zultu hna nih a chim ning in an ṭhutter hna.
16 Jesuh nih changreu hlum nga le nga pahnih kha a lak, van a cau i thla a cam.* Mah hnuah changreu kha a cheu i a zultu pawl a pek hna, a zultu pawl nih cun mibu kha an phawt hna.
17 An dihlak in khim tein an ei dih hnuah a taangmi kha an khawmh tikah sei 12 a si.
18 Voikhat cu Jesuh amah lawng in thla a cam lioah a zultu pawl cu a sinah an ra, Jesuh nih “Mi nih ahodah a si, an ka ti?” tiah a hal hna.
19 A zultu hna nih “Tipil Petu Johan a si an in ti, a cheu nih Elijah a si an in ti, a cheu nih cun hlanlio profet pakhat thihnak in a tho ṭhanmi a si an in ti” tiah an leh.
20 Jesuh nih “Nannih tah ahodah a si, nan ka ti?” tiah a hal hna tikah Peter nih “Pathian thlahmi Khrih na si” tiah a leh.
21 Mah hnuah Jesuh nih aho sin hmanh ah mah kong kha chim lo ding in fakpi in a thlauh hna.
22 Cun “Mi Fapa cu harnak tampi a tong lai, Judah mi hruaitu hna, tlangbawi upa hna le phungbia cawnpiaktu hna nih an hlawt lai, thah a si in nithumnak ni ah a tho ṭhan lai” tiah a chimh hna.
23 Mah hnuah Jesuh nih an dihlak in hitin a ti hna: “Ka hnu zulh a ka duhmi paoh nih cun mahle mah an i hlawt a hau lai. Nifate hremnak tung* i put in ka hnu an ka zulh peng a hau lai.
24 A nunnak khamh a duhmi cu a nunnak a sung lai, asinain keimah ruang ah a nunnak a sungmi tu cu a nung ṭhan lai.
25 Mi pakhat nih vawlei pumpi hi ngei ko hmanh seh law a nunnak a sungh ahcun asiloah a rawh ahcun zeidah a ṭhahnem lai?
26 Pakhatkhat nih keimah le ka min ruang ah a ning a zah ahcun mi Fapa zong nih keimah sunparnak, ka Pa sunparnak, a thiangmi vancungmi hna sunparnak he ka rat tikah ka zahpi ve lai.
27 Biatak kaan chimh hna lai, hika ah a dirmi cheukhat cu Pathian Pennak kha an hmuh hlanah an thi lai lo.”
28 Cutin a chim hnu a niriat ni hrawng ah Jesuh nih Peter, Johan le Jeim kha a auh hna i thlacam ding in tlang cung ah a kaipi hna.
29 Thla a cam lioah a hmai cu aa thleng, a hnipuan cu an hung raang i an ceu dih.
30 Ruahlopi in Moses le Elijah an hung lang i Jesuh he bia an i ruah.
31 Annih zong sunparnak he an lang ve, Jerusalem khua ah a tling dingmi Jesuh nih vawlei a kaltak lainak kong kha an chim.
32 Peter, Johan le Jeim cu an i hngilh, an hung i hlauh tikah sunparnak he a ceumi Jesuh le a pawng ah a dirmi mi pahnih kha an hmuh hna.
33 Mah mi pahnih cu Jesuh sinin chuah an i timh lioah Peter nih “Saya, hika ah kan ummi hi tinvo sung a si. Hika ah thlam pathum in ka sak lai. Nangmah caah pakhat, Moses caah pakhat, Elijah caah pakhat” tiah a ti. A tak ti ahcun zeidah a chim ti kha amahle amah aa hngal lo.
34 Cutin a chim lioah minmei a hung zam i a khuh hna. Cun minmei nih a zelh hna tikah an ṭih tuk.
35 Mah tikah “Amah hi ka thimmi ka Fapa a si. A bia kha ngai u” timi aw thawng minmei chung in a hung chuak.
36 Mah aw an theih tikah Jesuh cu amah te lawng in a si cang. A zultu pawl nih an hmuhmi kha caan saupi tiang ahohmanh an chim hna lo.
37 A thaizing tlang cung in an ṭum tikah mi tampi nih Jesuh cu an rak don.
38 Mibu lakin mi pakhat nih “Saya, ka fapa kha rak ka zohpiak ko tiah kaan nawl, anih cu ka fapa ngeihchunh te a si.
39 Khuachia nih a tuah tikah ka fapa cu ruahlopi in a ai tawn, a hnuhdawh i a kaa in a buanbara a chuak, thi dengmang in a tuah i fawi tein a thlah duh lo.
40 Mah khuachia kha ṭhawlpiak ding in na zultu pawl ka nawl hna nain an ṭhawl kho lo” tiah a ti.
41 Jesuh nih “Zumhnak a ngei lomi le misual mi hna,* nan sinah zei can tiang dah ka um rih lai? Zei can tiang dah kaan in rih hna lai? Hika ah na fapa cu ratpi tuah” tiah a ti.
42 Ngakchiapa cu an ratpi lioah khuachia nih vawlei ah a thluk i a hnuhdawhter. Jesuh nih khuachia kha a sik hnuah ngakchiapa cu a damter, cun a pa sinah a chanh.
43 Mi vialte cu Pathian ṭhawnnak ruang ah an khuaruah a har tuk.
Jesuh nih a tuahmi thil vialte ruang ah mi pawl an khuaruah a har lioah a zultu hna kha,
44 “Atu ka chim dingmi bia hi ṭha tein ngai u law i cinken u, mi Fapa cu rawi a si lai i mi pawl kut ah chanh a si cang lai” tiah a ti.
45 Asinain zultu hna nih a chimmi kha an hngalthiam lo. Mah bia a sullam kha an hngalh khawh nakhnga lo an sinin thuh a si, cun a chimmi kong kha a hal zong an hal ngam lo.
46 Mah hnuah an lakah ahodah a ngan bik timi bia alnak a chuak.
47 Jesuh nih an ruahnak kha a hngalh caah ngakchia pakhat kha a auh i a pawng ah a dirter.
48 Mah hnuah “Ka min ruang ah hi ngakchia a cohlangmi cu keimah a ka cohlangmi a si, keimah a ka cohlangmi cu a ka Thlahtu a cohlangmi a si. Nan lakah a nauta bikmi cu a ngan bikmi a si” tiah a ti hna.
49 Johan nih “Saya, na min hmang in khuachia a ṭhawlmi pa pakhat kha kan hmuh, anih cu kan mi a si lo caah kan thlauh” tiah a ti.
50 Jesuh nih “Thlauh hlah u, nanmah aan ralchanh lomi hna cu nanmahlei mi a si” tiah a ti.
51 Jesuh nih vancung a kai lai caan a naih tikah Jerusalem khua ah kal ding in bia a khiah.
52 Cucaah lamkal a thlah hmasa hna, annih cu Jesuh caah a herhmi va timh ding in Samaria khua pakhat ah an lut.
53 Asinain Jerusalem ah kal ding in biakhiahnak a tuahmi kha khuami hna nih an hngalh caah Jesuh kha an rak cohlang lo.
54 Mah kha zultu Jeim le Johan nih an hmuh tikah “Bawipa, hi hna hi hrawh awkah vancung in mei tlakter na kan duh maw?” tiah an hal.
55 Jesuh cu aa mer i a sik hna.
56 Mah hnuah khua dang ah an kal.
57 An kal lioah mi pakhat nih “Saya, na kalnak kip ah kaan zulh lai” tiah a ti.
58 Jesuh nih “Cenghngia nih kua an ngei, va nih bu an ngei, asinain mi Fapa cu riahnak hmun hmanh a ngei lo” tiah a ti.
59 A dang pakhat kha “Rak ka zul” tiah a ti tikah anih nih “Bawipa, ka pa kha va vui hmasa ta ning” tiah a nawl.
60 Jesuh nih “Mithi nih an mithi cu rak vui ko hna seh, nang cu va kal law Pathian Pennak kong kha va chim” tiah a ti.
61 A dang pakhat zong nih “Bawipa, kaan zulh ve lai, asinain ka chungle kha ka va chawn hmasa ta hna lai” tiah a ti.
62 Jesuh nih “Ahohmanh leithuan aa ot i hnulei a zohmi cu Pathian Pennak he aa tlak lo” tiah a ti.
Footnotes
^ A hrampi, “ngun.”
^ A hrampi, “angki zunhnih.”
^ Mah cu Herod Antipas a si. Biafang Fianternak ah zoh.
^ A hrampi, “thluachuah a hal.”
^ Biafang Fianternak ah zoh.
^ A hrampi, “chan hna.”
