Marka 1:1-45
-
Tipil Petu Johan phung a chim (1-8)
-
Jesuh tipil a ing (9-11)
-
Satan nih Jesuh a tukforh (12, 13)
-
Jesuh nih Galili ram ah phungchim hram a thawk (14, 15)
-
Hmasa bik zultu pawl a sawm hna (16-20)
-
Khuachia a ṭhawl (21-28)
-
Jesuh nih Kapernaum khua ah mi tampi a damter hna (29-34)
-
Hmunking ah thla a cam (35-39)
-
Thinghmuimi a damter (40-45)
1 Pathian Fapa, Jesuh Khrih kong thawngṭha a thawknak cu hitihin a si:
2 Profet Isaiah nih “(Ka lamkal kha na hmai in ka thlah lai, na kalnak ding lam kha na hmai in aan sialpiak lai.)
3 ‘Jehovah* lam cu sialpiak tuah u! A lam a tluan nakhnga sialpiak tuah u’ tiah ramcar ah mipa pakhat cu a au” tiin a rak ṭial.
4 Tipil Petu Johan nih nan i ngaihchihnak langhternak caah tipil ing u. Mah lawng ah sual ngaihthiam nan si lai tiah mi kha ramlak ah phung a chimh hna.
5 Judea ram le Jerusalem khua ah a ummi vialte cu a sinah an ra i an sualnak an i phuan hnuah Jordan tiva ah Johan nih tipilnak a pek hna.
6 Johan cu kalauk hmul in tahmi hnipuan kha aa hruk i saphaw taisawm kha aa sawmh. Khaubawk le ramlak khuaihliti kha a ei.
7 Anih nih “Keimah nakin a ngan deuhmi ka hnu in a ra lio. Kei cu a phanah hri phoihtu ding hmanh ah kaa tlak lo.
8 Kei nih cun ti in tipilnak kaan pek hna. Anih nih cun thiang thlarau in tipilnak aan pek hna lai” tiah phung a chim.
9 Mah lio caan ah Jesuh cu Galili ram, Nazareth khua in a ra i Johan nih Jordan tiva ah tipil a pek.
10 Ti chung in a chuahle cangka van aa hung i thiang thlarau cu ṭhuro bantuk in a cung ah aa futmi kha a hmuh.
11 Cun vancung in aw pakhat a thang i “Amah hi ka dawtmi ka Fapa a si, a cung ah ka lung a tling” tiah a ti.
12 Cu cangka in thlarau nih Jesuh cu ramcar ah kal ding in a forh.
13 Ramcar ah ni 40 a um i Satan nih a rak tukforh, cuka ah sahrang zong an um. Asinain vancungmi nih an rung hramh.
14 Johan thongthlak a si hnuah Jesuh cu Galili ram ah a kal i Pathian thawngṭha kha a chim.
15 “Rikhiahmi caan a tling cang, Pathian Pennak a nai cang. I ngaichih u law thawngṭha kha zum tuah u” tiah a ti hna.
16 Jesuh cu Galili Rilikam i aa chawh lioah Simon le a nau Andru nih rili ah sur an rak cheh lenmi kha a hmuh.
17 Jesuh nih “Ka zul u law mi tlaitu ah kaan ser hna lai” tiah a ti hna.
18 An sur kha an kaltak colh i Jesuh hnu an zulh.
19 Cuka in a kal deuh hnuah Zebedi fapa Jeim le a nau Johan nih lawng chung ah an sur an rak belh lenmi kha a hmuh.
20 Jesuh nih a auh hna tikah an pa Zebedi kha rianṭuantu hna he lawng chung ah an kaltak i Jesuh kha an zulh.
21 Mah hnuah Kapernaum khua ah an kal.
Sabbath ni a phanhle cangka Jesuh cu pumhnak inn ah a lut i a cawnpiak hna.
22 Phungbia cawnpiaktu hna bantuk si loin nawlngeitu bantuk in a cawnpiak hna caah mi pawl cu a cawnpiak ning ruang ah an khuaruah a har tuk.
23 Cu lioah cun pumhnak inn ah a ummi khuachia nih a tuahmi pakhat nih,
24 “Nazareth khuami Jesuh, zeidah na kan duhnak a um? Kanmah hrawh awkah maw na rat? Nang cu Pathian sinin a rami Mithiang na si ti kha ka hngalh ko” tiah a au.
25 Jesuh nih “Dai ko, mipa chung khan chuak!” tiah a sik.
26 Khuachia nih mah pa kha a hnuhdawhter hnuah fakpi in a au i a chuak.
27 Mi pawl cu an khuaruah a har tuk i “Mah hihi zeidah a si? Cawnpiaknak thar a si rua! Khuachia hmanh nawl a pek hna i a nawl an ngaih ko” tiah anmahle anmah an i ceih.
28 Jesuh thawngpang cu Galili ram dihlak ah a thang dih colh.
29 Pumhnak inn in an chuah hnuah Simon le Andru te inn ah an kal. Jeim le Johan zong an kal ve.
30 Simon a nupi i a nu cu a zaw i ihkhun cung ah a rilh ko caah a phanhle cangka a kong kha an chimh.
31 Jesuh cu a sinah a kal i a kut kha a tlaih i a thawh. A tak linh cu a dai i annih kha a bultawl hna.
32 Zanlei ni a tlak hnuah mizaw pawl le khuachia nih a tuahmi pawl kha Jesuh sinah an ratpi hna.
33 Khuami vialte cu innka hram ah an i pum.
34 Jesuh nih zawtnak a phunphun kha a damter hna i khuachia tampi kha a ṭhawlpiak hna. Anih cu Khrih a si ti kha khuachia pawl nih an hngalh caah Jesuh nih bia kaakhat hmanh a chimter hna lo.
35 Jesuh cu zingkate khuadei hlan in a tho, hmunking ah a kal i thla a va cam.
36 Simon le a hawile nih Jesuh kha an kawl i,
37 an hmuh tikah “Mikip nih an in kawl” tiah an ti.
38 Asinain Jesuh nih “Pawngkam khua hna zong ah kal u sih law phung va chim u sih. Mah ruang ah ka ratmi a si” tiah a ti hna.
39 Mah hnuah a kal i Galili ram dihlak ah a ummi pumhnak inn hna ah phung a chim, khuachia zong a ṭhawl hna.
40 Thinghmuimi pakhat cu a ra i Jesuh hmaiah a khuk aa bil, cun “Bawipa, na duh ahcun na ka thianter khawh” tiah a nawl.
41 Jesuh nih a zaangfah caah a hei banh i a tawngh, cun “Ka duh! Thiang ko” tiah a ti.
42 Chikkhat te ah a thinghmui zawtnak cu a dam i a thiang.
43 Mah mipa kha a kalter hlante ah Jesuh nih,
44 “Mah kong hi ahohmanh va chim hna hlah. Na zawtnak a thiang cang ti langhter awkah tlangbawi sinah va kal law va i hmuhsak, Moses lamhruainak ning in raithawinak va tuah” tiah fakpi in bia a cah.
45 A kal i mi pawl kha a chimh hna caah mah thawngpang cu a karh. Cucaah Jesuh cu khua chung ah langhngan in a lut kho ti lo i khua leng hmunking ah a um. Asinain a kenkip in mi pawl cu Jesuh sinah an ra ṭhiamṭhiam.
Footnotes
^ Biafang Fianternak ah zoh.
