Marka 11:1-33
11 Jerusalem khua pawng, Oliv Tlang hram ah a ummi Bethfath le Bethani khua an phak tikah Jesuh nih zultu pahnih kha a thlah hna i,
2 “Nan hmai khua ah khin va kal u law khua chung nan luh cangka ahohmanh nih an i cit bal rih lomi laa fate pakhat aa hrengmi kha nan hmuh lai. A hri kha phoih u law hika ah ratpi u.
3 Pakhatkhat nih ‘Laa fate hri kha zeicah nan phoih?’ tiah an in hal hna ahcun ‘Bawipa nih a herh, kan rak in pek ṭhan colh ko hna lai’ tiin va ti u” tiah a ti hna.
4 A zultu hna cu an va kal tikah lamkam ah a ummi inn pakhat i kutka hram ah laa fate pakhat aa hrengmi kha an hmuh i a hri kha an phoih.
5 Cuka i a dirmi cheukhat nih “Zeicah laa fate hri kha nan phoih?” tiah an hal hna.
6 Jesuh nih a chimh hna ning in an leh hna tikah kalpinak nawl an pek hna.
7 A zultu hna nih laa fate kha Jesuh sinah an ratpi, cun an puan kha laa keng cung ah an danh i Jesuh nih aa cit.
8 Mi tampi zong nih an puan kha lam ah an phah, a cheu nih lamkam i thingnge kha an saam hna i an phah ve.
9 A hmai in a kalmi le a hnu in a zulmi mibu cu “Pathian, amah hi khamh hram ko! Jehovah* min in a rami cu thluachuah hmu ko seh!
10 Dirh a si cang laimi kan pa David Pennak cu thluachuah hmu ko seh! Vancung ah a ummi Pathian, amah hi khamh hram ko!” tiah an au.
11 Jesuh cu Jerusalem khua a luh tikah biakinn chung ah a lut i zeizong vialte kha a zoh dih, asinain khua a tlai cang caah lamkaltu 12 he Bethani khua ah an kal.
12 A thaizing Bethani khua in an chuah lioah Jesuh cu a rawl a ṭam.
13 Lam hla nawn in a hnah a ṭha ngaimi theipi kung pakhat kha a hmuh tikah a thei a um hnga maw tiah a va zoh. Asinain thei a tlai caan a si lo caah a hnah lawng a hmuh.
14 Jesuh nih “Ahohmanh nih zeitik hmanh ah na thei kha ei ti hna hlah seh” tiah a ti. Mah kha a zultu hna zong nih an theih.
15 Jerusalem khua an phak tikah Jesuh cu biakinn chung ah a lut i cuka ah thil a cawmi le a zuarmi kha a ṭhawl hna, tangka thlengtu hna cabuai le laileng zuartu hna ṭhutdan kha a leh dih.
16 Ahohmanh biakinn lei ah thilri phorhnak nawl a awnh ti hna lo.
17 Cun “Cathiang ah ‘Ka inn cu miphun vialte hna thlacamnak inn tiah auh a si lai’ tiin aa ṭial nain nannih nih mifir kua ah nan ser cang” tiah mi kha a ti hna.
18 Mah kha tlangbawi upa hna le phungbia cawnpiaktu hna nih an theih tikah Jesuh thahnak ding lam kha an kawl. Asinain Jesuh kha an ṭih, zeicahtiah mibu cu Jesuh cawnpiaknak cung ah an khuaruah a har i an lung a ton tuk hna caah a si.
19 Ni a tlak dengmang hrawng ah Jesuh le zultu pawl cu Jerusalem khua in an chuak.
20 A thaizing zingka te lam i an kal lioah theipi kung cu a hram tiang in a rak car dihmi kha an hmuh.
21 Jesuh nih a rak chimmi bia kha Peter nih a hun hngalh ṭhan i “Saya, zoh hmanh! chiat na serhmi theipi kung cu a car cang” tiah a ti.
22 Jesuh nih “Pathian kha zum ko u.
23 Biatak kaan chimh hna lai, lung awṭawmnak ngei loin kan chimmi ning in a si lai tiin nan zumh i hi tlang hi ‘Hika in i ṭhial law rili ah i paih’ tiah nan ti ahcun aa paih ko lai.
24 Cucaah kaan chimh hna lai, kan hmuh hrimhrim lai timi zumhnak he thla nan cam ahcun nan halmi paoh nan hmuh ko lai.
25 Thlacam in nan dir tikah pakhatkhat cung ah lungsilonak nan ngeih ahcun va ngaithiam u, mah lawng ah vancung ah a ummi nan Pa zong nih nan sualnak kha aan ngaihthiam ve hna lai” tiah a ti.
26 * ——
27 Mah hnuah Jerusalem khua ah an rak kir ṭhan. Jesuh cu biakinn tual i aa chawh lioah tlangbawi upa hna, phungbia cawnpiaktu hna le Judah mi hruaitu hna cu an ra i,
28 “Zei nawlngeihnak in dah mah thil hna hi na tuah? Hi nawlngeihnak hi aho nih dah aan pek?” tiah an hal.
29 Mah tikah Jesuh nih “Bia pakhat in kaan hal ve hna lai, rak ka let u law kei zong zei nawlngeihnak in dah hi thil hna hi ka tuah ti kha kaan chimh ve hna lai.
30 Johan nih aho nawlngeihnak in dah tipil a pek hna? Pathian sinin maw,* minung sinin dah?” tiah a hal hna.
31 Annih nih “‘Pathian sinin,’ kan ti ahcun Johan kha ‘Zeicah nan zumh kun lo?’ tiah a kan hal lai.
32 ‘Minung sinin’ ti zong in kan let ngam fawn lo” tiah anmahle anmah an i ceih. Mi vialte nih Johan cu profet taktak a si tiah an ruah caah mibu kha an ṭih hna.
33 Cucaah “Kan hngal lo” tiah an leh. Mah tikah Jesuh nih “Kei zong zei nawlngeihnak in dah mah thil hna hi ka tuah ti kha kaan chim ve hna lai lo” tiah a ti hna.
Footnotes
^ Biafang Fianternak ah zoh.
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ A hrampi, “Vancung in maw.”
