Marka 14:1-72
-
Jesuh thah awkah tlangbawi pawl khua an khang (1, 2)
-
Jesuh cu zihmui toih a si (3-9)
-
Judas nih Jesuh a rawi (10, 11)
-
Hmanung bik Lanhtak Puai (12-21)
-
Hmasa bik Bawipa Zanriah tuahnak (22-26)
-
Peter nih a hlawt lainak kong Jesuh nih a chimchung (27-31)
-
Gethsemane dum ah Jesuh thla a cam (32-42)
-
Jesuh an tlaih (43-52)
-
Judah Biaceihnak Zungpi ah bia an ceih (53-65)
-
Peter nih Jesuh a hlawt (66-72)
14 Nihnih hnuah Lanhtak Puai* le Thilnu Phulh Lo Changreu Puai a um. Tlangbawi upa hna le phungbia cawnpiaktu hna nih Jesuh kha a thli tein tlaih in thah awkah lam an kawl.
2 Asinain “Puai chung ah cun tlaih awk a ṭha lai lo, mi pawl an i tuai-ur sual lai” tiah an ti.
3 Bethani khua i thinghmuimi Simon inn ah Jesuh cu rawl a ei lioah minu pakhat a ra i lungraang thawl in a man a fakmi nard* zihmui taktak kha a rak i ken. Lungraang thawl kha a awn i Jesuh lu cung ah a toih.
4 Mah tikah cheukhat cu thinhung ngai in “Zeicah zihmui hi a sawksam hnga?
5 Denarii* 300 leng in zuar in misifak pawl pek khawh a si!” tiah pakhat le pakhat an i ceih. Minu zong kha thinhung ngai in an mawhchiat.
6 Jesuh nih “Amah tein um ko seh. Zeicahdah hnahnawhnak nan pek? Ka cung ah ṭhatnak a tuahmi pei a si cu.
7 Misifak cu nan sinah an um zungzal ko lai, nan duh tik caan paoh ah an cung ah ṭhatnak nan tuah khawh. Keimah tu cu nan sinah ka um zungzal lai lo.
8 A tuah khawhmi pei a tuahmi a si cu. Ka pum ah zihmui a ka toihmi cu keimah vui awkah a ka timhtuahmi a si.
9 Biatak kaan chimh hna lai, vawleicung pumpi thawngṭha chimnak ah amah philh lo awkah a tuahmi cu chim a si lai” tiah a ti hna.
10 Lamkaltu 12 lak i Judas Iskariot cu Jesuh kha rawi in chanh awkah tlangbawi upa hna sinah a kal.
11 Tlangbawi upa hna nih a bia an theih tikah an i lawm tuk i ngun tangka kan in pek lai tiah bia an kamh. Cucaah Judas cu Jesuh rawi awkah caanṭha a kawl peng.
12 Lanhtak Puai raithawinak an pekchanh tawn ni, Thilnu Phulh Lo Changreu Puai a nikhatnak ni ah zultu hna nih “Lanhtak zanriah cu khoika ah dah kan timh lai?” tiah an hal.
13 Jesuh nih zultu pahnih kha “Khua chung ah va lut u law ti-um aa putmi pa pakhat kha nan hmuh lai. A hnu in va zul u law,
14 a luhnak inn ah khan va lut ve u. Cun inn-ngeitu kha ‘Kan sayapa nih “Ka zultu hna he Lanhtak zanriah kan einak ding khaan cu khoika ah dah a si?” a ti’ tiah va ti u.
15 Inn-ngeitu nih cungdot ah timhciami khaan nganpi pakhat aan hmuhsak hna lai. Mah khaan ah zanriah cu va tim u” tiah a ti hna.
16 Zultu hna cu an chuak i khua chung an luh tikah Jesuh nih a chimh hna ning khan an va hmuh i Lanhtak Puai caah an timh.
17 Zanlei sang hnuah Jesuh cu lamkaltu 12 hna he an rak phan.
18 Cabuai i rawl an ei lioah Jesuh nih “Biatak kaan chimh hna lai, hmunkhat ah rawl ka eiṭimi lakin pakhat nih nan ka rawi lai” tiah a ti hna.
19 A zultu hna cu an ngaih a chia i “Keimah cu ka si lo, lo mei?” tiah pakhat hnu pakhat in an hal.
20 Jesuh nih “Nanmah 12 lak i pakhat a si. Keimah he kheng pakhat chung ah rawl a purmi a si.
21 Cathiang ah aa ṭial bantuk in mi Fapa cu a thi ko lai, asinain mi Fapa a rawimi tu cu thil ṭhalo a tong lai! Amah cu hrin rak si hlah seh law a caah a ṭha deuh hnga” tiah a ti.
22 An ei lioah Jesuh nih changreu kha a lak i thla a cam, a cheu i a zultu kha a pek hna, “I lak u; mah hi ka pum a aiawhmi a si” tiah a ti.
23 Cun hrai kha a lak i Pathian sinah lawmhnak bia a chim. Mah hnuah a zultu kha a pek hna i an dihlak in an din.
24 Jesuh nih “Mah nih ka thi kha a aiawh, mi tampi caah thletmi ‘biakamnak thisen’ a si.
25 Biatak kaan chimh hna lai, Pathian Pennak ah mitsur zu thar ka din ṭhan lai ni a phanh hlan tiang atu thawk in mitsur zu ka ding ti lai lo” tiah a ti.
26 A donghnak ah thangṭhatnak hla an sak dih hnuah Oliv Tlang ah an kai.
27 Jesuh nih “Cathiang ah ‘Tuukhal kha ka thah lai caah tuurun chung i tuu pawl cu an i ṭhek dih lai’ tiah aa ṭial bantuk in nan dihlak in nan ka zamtak lai.
28 Asinain thihnak in ka thawh ṭhan tikah Galili peng ah nan hlanah ka rak kal chung lai” tiah a ti hna.
29 Peter nih “Midang vialte nih an in hlawt hmanh ah kei cu kaan hlaw lai lo” tiah a ti.
30 Jesuh nih “Biatak kaan chimh lai, tuzan hrimhrim ah ar voihnih a khuan hlanah ka hngal lo tiah voithum tiang na ka hlawt lai” tiah a ti.
31 Asinain Peter nih “Na sin i ka thih ding a si hmanh ah amah cu ka hngal lo tiah zeitik hmanh ah ka chim bal lai lo” tiah fek tein a chim. A dang zultu vialte zong nih cutin an chim ve.
32 Gethsemane timi hmun an phanh tikah Jesuh nih “Thla ka va cam karah hika ah hin rak ṭhu u” tiah a zultu pawl kha a ti hna.
33 Peter, Jeim le Johan kha aa kalpi hna, Jesuh cu a lungre a thei tuk i lung sivang in a um.
34 Jesuh nih “Ka ngaih a chiat tuknak ah ka thi dengmang cang. Hika ah hin rak um u law ralring tein hngak ko u” tiah a ti hna.
35 Mah hnuah hmailei ah tlawmpal a kal i vawlei ah a bawk, a si khawh ahcun cu caan cu ka tonter hlah tiah thla a cam.
36 Cun “Abba,* ka Pa, nangmah caah cun zeizong vialte hi a si kho ko, hi hrai* hi ka sinin ka ṭhialpiak ko. Asinain keimah duh ning in si hlah seh, nangmah duh ning tu in si ko seh” tiah a ti.
37 An sin a kir ṭhan tikah an rak i hngilhmi kha a hmuh i Peter kha “Simon, zeicah naa hngilh? Suimilam pakhat hmanh ralring tein na hngak kho lo maw?
38 Tukforhnak chung nan tlak nakhnga lo ralring tein hngak u law thlacam zungzal u. Lungthin nih cun a duh taktak ko, asinain taksa cu a der” tiah a ti.
39 Cu hnuah a va kal ṭhan i a hmasa bantuk in thla a cam ṭhan.
40 A rak kir ṭhan tikah an mit a ku tuk i an rak i hngilhmi kha a hmuh, cucaah Jesuh kha zeitindah bia kan leh lai ti an hngal lo.
41 Cu hnuah a voithumnak a rak kir ṭhan i “Hi bantuk caan ah hin maw lungdai tein nan i hngilh ko! A za cang! It ti hlah u! Mi Fapa cu rawi in misual mi hna kut ah chanh caan a phan cang.
42 Tho u, kal u sih. A ka rawitu cu a phan cang lai” tiah a ti.
43 Cutin a chim lioah Lamkaltu 12 chung i Judas cu nam le thingtan aa putmi mibu he a rak phan. Annih cu tlangbawi upa hna, phungbia cawnpiaktu le Judah mi hruaitu hna thlahmi an si.
44 Rawitu Judas nih “Ka hnamhmi cu Jesuh a si lai i tlai u law cawngtu hna he kalpi u” tiah hmelchunhnak a rak pekcia cang hna.
45 A phanhle cangka Jesuh sinah a kal colh i “Saya!” tiah a ti i a hnamh.
46 Cucaah Jesuh kha an tlaih i an kalpi.
47 A pawng ah a dirmi pakhat nih a nam kha aa zuh i tlangbawi ngan sal kha a hnakhaw pet lakin a sah.
48 Mah tikah Jesuh nih “Damiah tlaih bantuk in keimah tlaih awkah nam le thingtan i put in zeicah nan rat?
49 Biakinn ah nifatin kaan cawnpiak hna lioah nan um ve ko cu ta, nan ka tlaih ṭung lo. Asinain mah cu Cathiang bia a tlin nakhnga caah a si” tiah a ti.
50 A zultu vialte nih Jesuh kha an kaltak i an zam.
51 Asinain puan lawng aa aihmi mino pa pakhat nih a hnu in a zulh. Mi nih tlaih an timh tikah,
52 a puan kha a hlonhtak i a angki chung he lawng a tli.
53 Mi nih Jesuh kha tlangbawi ngan sinah an kalpi, cuka ah tlangbawi upa hna, Judah mi hruaitu hna le phungbia cawnpiaktu pawl an i pum.
54 Peter nih tlangbawi ngan inntual tiang lam hlat nawn in a zulh; sinum pawl sinah a ṭhu ve i mei a to.
55 Tlangbawi upa hna le Judah Biaceihnak Zungpi* i chungtel dihlak nih Jesuh kha thihdan an pek khawh nakhnga sual a puh khotu ding an kawl hna nain an hmu lo.
56 A hmaan lomi tehte tampi an chuak nain an chimmi cu aa lo cio lo.
57 Cun mi cheukhat zong a hmaiah an rak chuak i a hmaan loin sual an puh.
58 “‘Minung nih sakmi hi biakinn hi ka ṭheh lai i minung nih sak lomi biakinn kha nithum chung ah ka sak lai’ tiin a chimmi kha kan theih” tiah an ti.
59 Asinain cutin sual an puhnak hmanh ah pakhat le pakhat an chimmi aa lo lo.
60 Tlangbawi ngan cu a dir i “Bia leh awk zeihmanh na ngei lo maw? Sual an in puhmi hi zeitindah na leh hna lai?” tiah a hal.
61 Asinain Jesuh cu dai tein a um i bia kaakhat hmanh a let lo. Mah tikah tlangbawi ngan nih “A Thiangmi Pathian Fapa Khrih cu na si maw?” tiah a hal.
62 Jesuh nih “Ka si; mi Fapa cu a ṭhawngmi Pathian orhlei kam ah a ṭhutmi le van khuadawm he a ratmi kha nan hmuh te lai” tiah a ti.
63 Mah tikah tlangbawi ngan nih a puan kha a thleh i “Tehte dang a herh ti maw?
64 Pathian thangchiat in a chimmi cu nan theih. Zeitindah bia nan khiah lai?”* tiah a hal hna. An dihlak in thih awkah aa tlak tiah bia an chah.
65 Cu hnuah a cheu nih Jesuh kha an cil an chak, a hmai kha an huh, an kut in an thongh i “Aho nih dah aan thongh, kan chim tuah?” tiah an ti. A hmai zong ah an bengh, mah hnuah ralvengtu pawl nih Jesuh kha an kalpi.
66 Peter cu inntual i a um lioah tlangbawi ngan sinum nu pakhat a rak phan.
67 Mei a tomi Peter kha a hmuh tikah ṭha tein a zoh i “Nang zong Nazareth khuami Jesuh he phukhat nan si lo maw?” tiah a ti.
68 Asinain Peter nih “Ka hngal lo, na chimmi kong hi ka hngal lo” tiah aa pheh i kutka lei kalnak lam ah khan a kal.
69 Cuka ah sinum nu pakhat nih a hmuh i a pawng ah a dirmi hna kha “Mah pa hi Jesuh zultu pakhat a si” tiah a ti hna.
70 Peter nih aa pheh ṭhan. Tlawmpal ah a pawng ah a dirmi hna nih “Nang cu Galili khuami na si, anmah he phukhat na si ti cu a fiang ko” tiah Peter kha an ti.
71 Asinain Peter nih chiatserh in bia aa kam i “Nan chimmi pa hi ka hngal lo!” tiah a al hna.
72 Cu caan te ah cun ar voihnihnak a khuang. “Ar voihnih a khuan hlanah ka hngal lo tiah voithum tiang na ka hlawt lai” timi Jesuh bia kha a lung ah a hung chuak ṭhan i Peter cu ngaihchia ngai in a ṭap.
Footnotes
^ Biafang Fianternak ah zoh.
^ Biafang Fianternak ah zoh.
^ Denarii pakhat cu nikhat rian ṭuan man a si; denarii 300 cu kumkhat chung rian ṭuan man a si.
^ “Ka Pa” ti sullam a ngeimi Hebru asiloah Aramaic biafang.
^ Pathian serhsattu in sualphawtnak he Jesuh a thih ding Pathian nih nawl a awnhmi kha a chim duhmi a si.
^ Biafang Fianternak ah zoh.
^ Asiloah “Zeitindah nan ruah?”
