Marka 15:1-47
15 Zinglei a phanh tikah tlangbawi upa hna, Judah mi hruaitu hna le phungbia cawnpiaktu hna i telin Judah Biaceihnak Zungpi chungtel dihlak cu an i pum i khua an khang. Mah hnuah Jesuh kha an ṭem i Pilat sinah an chanh.
2 Pilat nih “Judah Siangpahrang cu na si maw?” tiah a hal tikah Jesuh nih “Na chim ning in a si ko” tiah a leh.
3 Asinain tlangbawi upa hna nih Jesuh kha a phunphun in sual an puh.
4 Pilat nih “Hi vialte sual an in puhmi hi na let hna lai lo maw?” tiah a hal.
5 Asinain Jesuh nih bia kaakhat hmanh a leh lo caah Pilat cu a khuaruah a har tuk.
6 Lanhtak Puai fatin mi nih chuahter an duhmi thongtla pakhat paoh kha uktu nih a chuahpiak tawn hna.
7 Cu caan ah Barabbas tiah auhmi pa pakhat cu ralhrang pawl he thong a tla, annih cu ral thawh a hmangmi le lai a nawngmi an si.
8 Mi pawl cu an i pum i Pilat nih a tuahpiak tawn hna bantuk in thongtla pakhat kha thlahpiak awkah an hal.
9 Pilat nih “Judah mi hna Siangpahrang hi kan chuahpiak seh ti nan duh maw?” tiah a ti hna.
10 Tlangbawi upa hna nih Jesuh kha an nahchuah caah atu bantuk in an chuahpimi a si ti kha Pilat nih a hngalh.
11 Asinain tlangbawi upa hna nih Jesuh canah Barabbas tu thlahpiak awkah hal ding in mibu kha an rak forh cang hna.
12 Pilat nih “A si ahcun Judah mi hna Siangpahrang tiah nan timi mah pa hi zeitindah ka tuah lai?” tiah a hal ṭhan hna tikah,
13 “Tung cung ah thlai ko!” tiah an au.
14 Pilat nih “Zei ruang ah? Zei sualnak dah a tuah?” tiah a hal hna tikah “Tung cung ah thlai ko!” tiah fak chinchin in an au.
15 Mah tikah Pilat nih mi pawl an lungton a duh caah Barabbas kha a thlahpiak hna, Jesuh tu kha cu hrihrual in a tukter hna i thingtung cung ah thah ding in a pek hna.
16 Ralkap pawl nih Jesuh kha uktu bawi inntual ah an kalpi i ralkapbu kha an ningpi in an pumh hna.
17 Mah hnuah Jesuh kha puan sendung* an aih, hling in bawiluchin an ser i an chinh.
18 Cun “Judah Siangpahrang, i lawm ko!” tiah an ti.
19 Jesuh kha an cil an chak i a lu kha phaikung in an tuk, a hmaiah an khuk an i bil i an kun.
20 Cutin an cawhdeh hnuah puan sendung kha an phoih i amah hnipuan kha an hrukter ṭhan. Cun thing cung ah thlai in thir khenh awkah an kalpi.
21 Cun Alexander le Rufas i an pa, Sairin khuami Simon cu khuate lei in a ratmi kha ralkap pawl nih an hmuh tikah hramhram in an auh i Jesuh an thlainak ding thingtung kha an putter.
22 Cuticun Jesuh kha “Luruh Hmun” ti sullam a ngeimi Gol′go·tha timi hmun ah an kalpi.
23 Cuka hmun an phak tikah mi a rittertu mura he cawhmi zu kha an dinter nain a ding duh lo.
24 Mah hnuah Jesuh kha thingtung cung ah an thlai i thir in an khenh, a hnipuan kha cu aho nih dah, zei hi dah aa lak lai ti hngalh awkah camcawhfung an zuh i an i ṭhen.
25 Zinglei suimilam 9* hrawng ah Jesuh kha tung cung ah an thlai i thir in an khenh.
26 “Judah mi hna Siangpahrang” timi sual an puhnak bia kha an ṭial i a lu cung zawn ah an taar.
27 Damiah pahnih zong kha Jesuh orhlei ah pakhat, kehlei ah pakhat thingtung cung ah an thlai ve hna.
28 * ——
29 Aa chawkmi hna nih Jesuh kha an serhsat, an lu an thin hnawh i “Biakinn kha ṭheh in nithum chung ah a sa ṭhan hnga dingmi pa,
30 thingtung cung in rak ṭum ngat, nangmahle nangmah i khamh ngat” tiah an ti.
31 Tlangbawi upa hna le phungbia cawnpiaktu hna zong nih “Midang cu a khamh khawh ko hna, amahle amah tu cu aa khamh kho lo,
32 Israel Siangpahrang Khrih a si ahcun tung cung in atu hi ṭum tuah ngat seh, a ṭummi kan hmuh ahcun kan zumh ko hnga” tiah an serhsat. A pawng ah an thlaimi damiah pahnih hna hmanh nih Jesuh kha cutin an serhsat ve.
33 Chun suimilam 12* ah ram chung dihlak ah muihnak a tlung, zanlei suimilam 3* tiang a mui rih.
34 Zanlei suimilam 3 ah Jesuh cu “E′li, E′li, la′ma sa·bach·tha′ni?” tiah fakpi in a au. A sullam cu “Ka Pathian, ka Pathian, zeicahdah na ka kaltak?” tinak a si.
35 Mah kha an theih tikah a pawngkam ah a dirmi mi cheukhat nih “Zoh hmanh u! Elijah pei a auh hi” tiah an ti.
36 An lak i pakhat cu a va tli i puanchia kha aa lak i zuthor chung ah a hnim, cun phaikung par ah a ṭem i Jesuh kha a dinter. Cun “Um rih u! Elijah nih a rak khamh le khamh lo zoh rih u sih” tiah a ti hna.
37 Jesuh cu thangpi in a au i a thaw a cat.
38 Mah lioah biakinn puanzar cu a lu in a taw tiang cheuhnih ah aa cheu.
39 Jesuh hmaiah a dirmi ralbawi nih Jesuh a thih lai ah a cangmi thil kha a hmuh tikah “Mah pa hi Pathian Fapa a si hrimhrim” tiah a ti.
40 Nu pawl zong nih lam hlat in an zoh. An lakah Mary Magdalin, Jeim Ngakchia Deuh le Joses i an nu Mary le Salome zong an i tel.
41 Annih cu Galili ram i Jesuh a um lioah a hnu a zul i a rak bultawltu an si, Jerusalem khua ah Jesuh a rak zulmi a dang nu pawl zong an i tel.
42 A caan cu zanlei sang tlai nawn ah a si. Sabbath ni a phanh lai nikhat aa duh i Timhtuahnak Ni* a si caah,
43 Arimathea khuami Josef cu ralṭha ngai in Pilat sinah a lut i Jesuh a ruak kha a hal. Josef cu mi nih an upat ngaimi Judah Biaceihnak Zungpi chungtel pakhat a si i Pathian Pennak a hngakmi a si.
44 Pilat nih Jesuh a thi cang maw ti kha hngalh a duh caah ralbawi pa kha a auh i a hal.
45 Ralbawi sinin Jesuh a thi cang ti kha a hngalh tikah Josef kha a ruak lak awkah nawl a awnh.
46 Josef nih Jesuh ruak kha thingtung cung in a ṭhumh, a rak cawkmi puan hmangṭhia a thiangmi tein a zual, mah hnuah lungkua ah khorhmi thlan ah a vui, cun lung nganpi kha a hrilh i thlan kha a khar.
47 Mary Magdalin le Joses nu Mary tu cu thlan kha an zoh i an taangta.
Footnotes
^ A hrampi, “maimaw.”
^ A hrampi, “nichuah hnu suimilam 3.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ A hrampi, “nichuah hnu suimilam 6.”
^ A hrampi, “nichuah hnu suimilam 9.”
^ Biafang Fianternak ah zoh.
