Marka 2:1-28
2 Ni tlawmpal a rauh hnuah Jesuh cu Kapernaum khua ah a rak phan ṭhan i inn ah a um ti thawng cu a thang.
2 Mi tampi cu an ra i innchung ah a lawnnak pakhat hmanh um loin kutka hram tiang an khat dih, cun Jesuh nih a cawnpiak hna.
3 Mah lioah a zengmi pa pakhat kha mi pali nih an rak zawnh.
4 Mi an tam tuk caah Jesuh sinah an luhpi kho lo. Cucaah Jesuh a cung zawn in inncung cih kha an baoh i a zengmi pa kha laang in an vun thlak.
5 Jesuh nih an zumhnak kha a hmuh tikah a zengmi pa kha “Ka fapa, na sualnak cu ngaihthiam na si cang” tiah a ti.
6 Cuka ah a ṭhumi phungbia cawnpiaktu cheukhat nih an lung chung in,
7 “Mah pa nih zeicah cutin a chim hnga? Pathian serhsat in a chimmi a si. Pathian dah ti lo cu ahodah sual ngaihthiamnak nawl a ngei?” tiah an ruah.
8 Jesuh nih an ruahmi kha a hngalh colh caah “Zeicah cutin nan ruah?
9 A zengmi pa kha ‘Na sualnak cu ngaihthiam na si cang’ ti maw a fawi deuh, ‘Tho law na laang kha i put law kal tuah’ ti dah a fawi deuh?
10 Mi Fapa cu vawleicung ah sual ngaihthiamnak nawl a ngei ti kha nan hngalh nakhnga kaan hmuhsak hna lai” tiah a ti. Cun a zengmi pa kha,
11 “Kaan chimh lai, tho law na laang kha i put law inn ah va ṭin” tiah a ti.
12 Khulrang in mah pa cu a tho i a laang kha aa put i a kal. Mi pawl cu an khuaruah a har tuk i “Mah bantuk hi kan hmu bal lo” tiah an ti i Pathian sunparnak kha an thangṭhat.
13 Jesuh cu rilikam ah a kal ṭhan i mibu cu a sinah an rat caah a cawnpiak hna.
14 Cun cuka hmun in a kal i ngunkhuai kholhnak zung ah Alfias fapa, Levi a ṭhutmi kha a hmuh tikah “Rak ka zul” tiah a ti. A tho i a zulh colh.
15 Mah hnuah Jesuh le a zultu pawl cu Levi inn ah rawl an ei. Ngunkhuai kholtu le misual tampi zong an ra i an eiṭi hna. An lak i tam deuh cu Jesuh zultu an hung si.
16 Ngunkhuai kholtu le misual mi hna he hmunkhat ah Jesuh rawl a eimi kha Farasi mi lak i phungbia cawnpiaktu hna nih an hmuh tikah “Zeicah ngunkhuai kholtu le misual mi hna he rawl a ei?” tiah a zultu pawl kha an hal hna.
17 Mah kha Jesuh nih a theih tikah “A dammi nih siibawi an herh lo, a zawmi lawng nih an herh. Miding mi hna auh awkah ka ra lo, misual mi hna auh awk tu ah ka ra” tiah a ti.
18 Johan zultu le Farasi mi nih rawl an ulh tawn. Cucaah Jesuh kha “Johan zultu le Farasi mi zultu hna nih rawl an ulh tawn nain nang na zultu pawl hi zeicah an ulh ve lo?” tiah an hal.
19 Jesuh nih “Nupi ṭhi tlangval i a hawile cu nupi ṭhi tlangval he an umṭi lioah rawl an ul bal maw? Nupi ṭhi tlangval he an um chung paoh cu rawl an ul lo.
20 Asinain nupi ṭhi tlangval cu an sinin lak a si lai ni a phan te lai. Mah ni ah rawl an ul ve te ko lai.
21 Ahohmanh nih thilpuan hlun kha thilpuan a thar in an belh bal lo. An belh ahcun an belhnak puan nih a dawh lai i a tlek chinchin lai.
22 Cu bantuk in saphawcua* hlun chung ah mitsur zu thar an rawng bal lo. An rawn ahcun saphawcua cu a kek lai i mitsur zu cu a zut lai, cun saphawcua zong a rawk lai. Mitsur zu a thar cu saphawcua a thar chung ah an rawn tawn” tiah a leh hna.
23 Sabbath ni ah Jesuh le a zultu pawl cu lo chung in an kal i an kal pah in a zultu hna nih favui kha an zun.
24 Cucaah Farasi mi nih Jesuh kha “Sabbath ni ah tuahnak nawl a um lomi kha zeicah an tuah?” tiah an ti.
25 Jesuh nih “David le a mi pawl an paw a ṭam i ei awk an ngeih lo lioah David nih zeidah a tuah ti kha nan rel bal lo maw?
26 Pathian innchung ah a lut i tlangbawi hna dah ti lo nih cun ahohmanh nih einak nawl an ngeih lomi, Pathian hunhmi changreu* kha a lak i a ei. Mah leng ah a mi pawl zong a dangh hna ti kha tlangbawi upa Abiathar kong ṭialmi ah aa ṭial ko cu ta” tiah a ti hna.
27 Cun “Pathian nih Sabbath cu minung caah a ser, minung cu Sabbath caah a ser lo.
28 Cucaah mi Fapa cu Sabbath Bawi a si” tiah a ti hna.
