Marka 4:1-41
4 Jesuh nih mi kha rilikam ah a cawnpiak ṭhan hna, a sinah mi tampi an rat caah lawng cung ah a kai i a ṭhu. Cun tikam in tlawmpal aa thawn, mibu tu cu rilikam te ah an um.
2 Cun Jesuh nih tahchunhnak hna hmang in a konglam tampi a cawnpiak hna, hitin a ti:
3 “Ngai hmanh u! Voikhat cu thlaici vorhtu pa cu thlaici vorh awkah aa thawh.
4 Thlaici a vorh tikah thlaici cheukhat cu lamkam ah an tla i va nih an rak ei.
5 Thlaici cheukhat cu vawlei a tlawmnak lung cung ah an tla, vawlei cu a chah lo caah khulrang in an keuh colh.
6 Asinain ni a hun chuak i thlaikheu hme tete kha a emh hna tikah an hram a thuh lo caah an car colh.
7 Thlaici cheukhat cu hling lakah an tla, hlingkung cu an hun ṭhang i a khuh dih hna caah thei an tlai kho lo.
8 Thlaici cheukhat cu vawlei ṭhatnak ah an tla, an keuh i an hun ṭhan tikah a let 30, a let 60, a let 100 in an vui.”
9 Cun “Hna a ngeimi nih thei ko hna seh” tiah a ti chap.
10 Jesuh cu amah lawng in a um lioah lamkaltu 12 le a pawngkam i a ummi hna cu a sinah an ra i tahchunhnak hna i a sullam kha an hal.
11 Jesuh nih “Nannih cu Pathian Pennak biathli hngalh khawhnak pek nan si, asinain midang ca tu ahcun hi thil vialte hi tahchunhnak menmen an si.
12 Annih nih a zoh cu an zoh ko nain an hmu lo, a theih cu an theih ko nain an hngalthiam lo; an rak kir lo caah ngaihthiam an si ve lai lo” tiah a ti hna.
13 Cun Jesuh nih hitin a ti chap: “Hi tahchunhnak hi nan hngalhthiam lo ahcun a dang tahchunhnak hna zong nan hngalthiam lai lo.
14 “Thlaici vorhtu cu Pathian bia a vorhtu kha a chim duhmi a si.
15 Lamkam ah thlaici a tla timi cu Pathian bia an theihle cangka in Satan cu a ra i an lungthin chung ah a ummi Pathian bia a lak ṭhanmi kha a chim duhmi a si.
16 Vawlei a tlawmnak lung cung ah thlaici a tla timi cu Pathian bia kha an theihle cangka lunglawm tein an cohlan.
17 Asinain an lungthin chung ah hram aa sih lo caah chikkhat lawng a nguh i Pathian bia ruang ah harnak le hremnak an ton tikah an tlukrilh colhmi kha a chim duhmi a si.
18 Hling lakah thlaici a tla timi cu Pathian bia kha an theih ko nain,
19 hi vawleicung* i lungretheihnak hna, thilri chawva hlennak hna le duhfahnak hna nih Pathian bia kha a khuh caah thei an tlai khawh lomi kha a chim duhmi a si.
20 Vawlei ṭha ah thlaici a tla timi cu Pathian bia kha an theih tikah lunglawm tein an cohlan i a let 30, a let 60, a let 100 in thei an tlaimi kha a chim duhmi a si.”
21 Jesuh nih hitin a ti chap: “Meiinn an van tikah kho in an khuh bal lo, ihkhun tang zong ah an chia bal lo. Mei vannak ah an chiah a si ko lo maw?
22 Thuhmi thil vialte cu langhter an si lai, ṭha tein khuhmi thil vialte cu hun dih an si lai.
23 Hna a ngeimi nih thei ko hna seh.”
24 Jesuh nih hitin a ti chap: “Nan theihmi kong hi lungthin pe in ngai u. Lungthin nan pek tluk in nan hngalhthiam ve lai. Cutin nan tuah ahcun tam chinchin in nan hngalhthiam lai.
25 A ngeimi cu chap an si lai, a ngei lomi cu a ngeihchunh te hmanh kha chuh a si lai.”
26 Jesuh nih hitin a ti chap: “Pathian Pennak cu mi pakhat nih a lo ah thlaici a vorhmi he tahchunh khawh a si.
27 Zan ah a it, chun ah a tho i mah caan chung ah thlaici cu zeitindah a keuh i an hun ṭhan ti kha a hngal lo.
28 Vawlei nih amah tein duhsah tein thei a tlaiter, hmasa bik ah a kung an hung keuh, cun an hung vui i a donghnak ah a fang an hung chuak.
29 A fang cu an hung hmin i ṭuan caan a cut tikah fa-ah kha aa lak i a hleh hna.”
30 Jesuh nih hitin a ti chap: “Pathian Pennak kha zei he dah ka tahchunh lai, zei tahchunhnak in dah ka fianter lai?
31 Pathian Pennak cu anṭam ci he aa lo, anṭam ci cu an vorh lio ahcun vawleicung i thlaici vialte lakah a hme bikmi a si.
32 Asinain a kung a hun keuh tikah anhringso kung vialte nakin a ngan deuh i a ngepipi an hun chuak. A kung cu a zuangmi va pawl nih bu i ser khawh ding tiang in a hung ngan.”
33 Jesuh nih cu bantuk tahchunhnak hna hmang in an hngalh khawh tawk lawng kha a cawnpiak hna.
34 Tahchunhnak hmang loin a chim hna lo, asinain a zultu pawl kha cu tahchunhnak vialte i a sullam kha a dang tein a chimh hna.
35 Mah ni zanlei ah Jesuh nih a zultu pawl kha “Rili khattalei ah kal u sih” tiah a ti hna.
36 A zultu hna nih mibu kha an tlunter hna hnuah Jesuh a umnak lawng cung ah an kai i rili khattalei ral ah cun an kal, a dang lawng pawl zong nih an zulh hna.
37 Mah tikah thlichia a hung hrang i tilet nih a den caah lawng cu a pil dengmang.
38 Asinain Jesuh cu tilawng a tawlei ah chantling cung ah aa hngilh. A zultu hna nih an hun ṭhangh i “Saya, kan thi dih cang lai hih, hitin maw na kan zoh sawhsawh ko lai?” tiah an ti.
39 Jesuh cu a tho i tilet le thlichia kha “Dai tuah!” tiah nawl a pek hna tikah thlichia cu a hrang ti lo i rili cu dai zirziar tein a um.
40 Jesuh nih “Zeicah mah tluk cun nan ṭih? Zumhnak tlawmpal te tal nan ngei lo maw?” tiah a ti hna.
41 An ṭih tuk i “Hi pa hi zei bantuk minung dah a si? Thli le tilet hmanh nih a bia an ngaih” tiah pakhat le pakhat an i ceih.
Footnotes
^ Asiloah “hi chan.” Biafang Fianternak ah zoh.
