Marka 5:1-43
5 Mah hnuah rili khattalei ral, Geresin ram ah an rak phan.
2 Jesuh cu lawng cung in a ṭumle cangka khuachia nih a tuahmi pa pakhat cu thlankua chung in a rak chuak i Jesuh kha a rak ton.
3 Thlanmual ah a ummi mah pa kha a tlai khomi ahohmanh an um bal lo, thir cikcin hmanh in an hreng kho lo.
4 Cikcin in an hren i hreng an khenh chih hmanh ah cikcin cu a chah i hreng zong a khiah dih tawn. Ahohmanh nih an tlai kho lo.
5 Thlan ah le tlang cung ah chun he, zan he a au i amahle amah kha lung in aa cum i aa at tawn.
6 Lam hla nawn in Jesuh kha a hmuh tikah a hei tlik hnawh i a hmaiah a bawk.
7 Fakpi in a au i “Cung Nung Bik Pathian Fapa Jesuh, zeidah na ka duhnak a um? Dan kaan tat lai lo tiah Pathian hmaiah bia i kam” tiah a ti.
8 Jesuh nih “Khuachia, hi pa chung hin chuak” tiah a rak ti caah a si.
9 Jesuh nih “Na min ahodah a si?” tiah a hal tikah “Ka min cu Bupi a si, zeicahtiah kannih cu kan tampi” tiah a leh.
10 Cun cuka ram in chuahter lo awkah khuachia nih Jesuh kha an nawl lengmang.
11 Mah tlang cung ah vokrun nganpi pakhat cu an tlong.
12 Khuachia nih cun “Mah vokrun chung ah khin kan luhter” tiah an nawl.
13 Jesuh nih luhnak nawl a pek hna tikah khuachia cu an chuak i vokrun chung ah an lut. Vok cu 2,000 hrawng an si i an dihlak in lungpang* cung in an zuang, rili ah an tla i an thi dih.
14 Vok a cawngtu hna cu khuapi ah le khuate ah an va tli i an va chimh hna tikah a cangmi thil zoh awkah mi pawl cu an rak ra.
15 Jesuh sin an phanh tikah khuachia bupi aa hrolh tawnmi pa cu ṭha tein thil aa hruk i lungfim tein a ṭhutmi kha an hmuh tikah an ṭih tuk.
16 Cu thil a hmutu hna zong nih khuachia aa hrolhmi pa cung ah a cangmi kong le vok cung ah a tlungmi kong kha an chimh hna.
17 Cucaah mi nih Jesuh kha an ram in chuah awkah an nawl.
18 Jesuh lawng cung a kai tikah khuachia aa hrolh balmi pa nih a sinah kalter ve ding in a nawl.
19 Asinain Jesuh nih a awnh lo, “Na chungkhat pawl an umnak inn ah va ṭin law na caah Jehovah* nih aan tuahpiakmi thil hna le zaangfahnak a langhtermi kong kha va chim hna” tiah a ti.
20 Mah pa cu a kal i Jesuh nih a tuahpiakmi kong kha Dekapolis* peng ah a chim tikah mi vialte cu an khuaruah a har dih.
21 Jesuh cu rili khattalei ral ah lawng in a rak kir ṭhan tikah mibupi cu an rak phan. Rilikam a um lioah,
22 Jairu tiah auhmi pumhnak inn haotu nih Jesuh kha a hmuh tikah a kehram ah a bawk,
23 “Saya, ka fanute cu a zaw i a zual ngaingai.* Zaangfahnak in rak ka zul law ka fanute cung ah na kut na chuan ahcun a dam lai i a nung ko lai” tiah a nawl lengmang.
24 Mah tikah Jesuh nih a zulh, mibupi nih an zulh ve i an tam tuk caah Jesuh kha an hnor pah lengmang.
25 Cuka ah cun kum 12 chung thi chuah zawtnak a ngeimi nu pakhat a um.
26 Siibawi tampi nih an thlop cang i a ngeihchiah vialte zong a hman dih cang. Asinain a zawtnak cu a ṭha deuh hlei lo i a zual tu in a zual chin.
27 Jesuh kong kha a theih tikah mibu lakah aa tenh i Jesuh hnulei in a ra i a puanki kha a tawngh.
28 “A puan ka tawnghnak men in ka dam ko lai” tiah a lungchung in a ti.
29 Mah tikah a thi cu chikkhat te ah a pit i a zawtnak a dammi kha aa hngalh.
30 Jesuh nih a pum in ṭhawnnak a chuahmi kha a hngalh colh i mizapi lei ah aa mer, cun “Ahodah ka puan a tawng?” tiah a hal hna.
31 A zultu hna nih “Mibu nih an in hnor lenmi na hngalh ko nain ‘Ahodah a ka tawng?’ na ti” tiah an ti.
32 Asinain Jesuh nih ahodah a ka tawng ti hngalh awkah a pawngkam kha a zoh.
33 A zawtnak a dam ti aa hngalmi mah minu cu ṭih le ther lengmang in a rak chuak i Jesuh hmaiah a bawk, cun thil sining vialte kha a hmaan ning tein a chimh dih.
34 Jesuh nih “Ka fanu, na zumhnak nih aan damter cang. Dai tein va ṭin law na zawtnak in va dam ko” tiah a ti.
35 Cutin a chim lioah pumhnak inn haotu inn in mi cheukhat an ra i “Na fanu cu a thi cang! Saya cu hnahnawh duh ti hlah” tiah an ti.
36 Mah kha a theih tikah Jesuh nih pumhnak inn haotu kha “Zeihmanh ṭih hlah, zumhnak tu ngei ko” tiah a ti.
37 Mah hnuah Peter, Jeim le a nau Johan dah ti lo cu ahohmanh aa zulhter duh ti hna lo.
38 Jesuh cu pumhnak inn haotu inn a phanh tikah mi pawl an i tuai-ur lenmi le an ṭah, an ai lenmi kha a hmuh hna.
39 Innchung ah cun a lut i “Zeicahdah nan i tuai i nan ṭah len ko. Ngakchia hi a thih ṭung lo, aa hngilh i pei a si ko cu” tiah a ti hna.
40 Mah tikah mi nih an nihsawh. Jesuh nih an dihlak in leng ah a chuahter hna i ngakchianu a nu le a pa le aa ratpimi a zultu pawl lawng kha aa kalpi hna, cun ngakchianu an chiahnak khaan ah an va lut.
41 Mah hnuah ngakchianu a kut kha a tlaih i “Tal′i·tha cu′mi” tiah a ti. A sullam cu “Ngakchianu, ‘Tho’ kaan ti!” tinak a si.
42 Chikkhat te ah mah ngakchianu cu a tho i a kal colh. (Anih cu kum 12 mi a si.) Mah kha an hmuh tikah an i lawm tuk.
43 Jesuh nih mah kong kha ahohmanh chim hna hlah u tiah atu le atu a cah hna hnuah ngakchianu kha ei awk pakhatkhat pek ding in a fial hna.
Footnotes
^ Asiloah “chengpalang.”
^ Biafang Fianternak ah zoh.
^ Asiloah “Khua Hra Peng.”
^ Asiloah “a thi dengmang cang.”
