Matthai 1:1-25
1 Abraham fapa, David fapa a simi Jesuh Khrih* chuahkehnak cu hitihin a si:
2 Abraham cu Isak pa a si;Isak cu Jakob pa a si;Jakob cu Judah le a unau hna pa a si;
3 Judah cu Perez le Zerah pa a si i an nu cu Tamar a si;Perez cu Hezron pa a si;Hezron cu Ram pa a si;
4 Ram cu Amminadab pa a si;Amminadab cu Nashon pa a si;Nashon cu Salmon pa a si;
5 Salmon cu Boaz pa a si,a nu cu Rahab a si;Boaz cu Obed pa a si,a nu cu Ruth a si;Obed cu Jesse pa a si;
6 Jesse cu siangpahrang David pa a si.
David cu Solomon pa a si, a nu cu Uriah nupi kha a si;
7 Solomon cu Rehoboam pa a si;Rehoboam cu Abijah pa a si;Abijah cu Asa pa a si;
8 Asa cu Jehoshafat pa a si;Jehoshafat cu Jehoram pa a si;Jehoram cu Uzziah pa a si;
9 Uzziah cu Jotham pa a si;Jotham cu Ahaz pa a si;Ahaz cu Hezekiah pa a si;
10 Hezekiah cu Manasseh pa a si;Manasseh cu Amon pa a si;Amon cu Josiah pa a si;
11 Josiah cu Jekhoniah le a unau hna pa a si, cu caan ah cun Israel mi cu Babilon ah sal in an kalpi hna.
12 Babilon ah sal in an kalpi hna hnuah, Jekhoniah cu Shealtiel pa a si;Shealtiel cu Zerubbabel pa a si;
13 Zerubbabel cu Abiud pa a si;Abiud cu Eliakim pa a si;Eliakim cu Azor pa a si;
14 Azor cu Zadok pa a si;Zadok cu Akhim pa a si;Akhim cu Eliud pa a si;
15 Eliud cu Eleazar pa a si;Eleazar cu Matthan pa a si;Matthan cu Jakob pa a si;
16 Jakob cu Mary vapa Josef pa a si, Mary cu Khrih tiah auhmi Jesuh hringtu a si.
17 Abraham in David tiang ah chan 14; David in Babilon i sal an taan tiang ah chan 14; Babilon i sal an taan in Khrih tiang ah chan 14 a si.
18 Jesuh Khrih a chuah ning cu hitihin a si. A nu Mary cu Josef he aa hammi an si i an i um hlanah thiang thlarau* in fa ka pawi lai ti kha a hngalh.
19 Asinain a vapa Josef cu miding mi a si caah Mary kha zapi hmaiah a ningzahter a duh lo, cucaah a thli tein ka mak lai tiah aa tim.
20 Cutin a ruah hnuah Jehovah* vancungmi cu a mang ah a lang i hitin a ti: “David fapa Josef, na nupi Mary kha inn i kalpi awkah ṭih hlah, fa a pawimi cu thiang thlarau thawng in a si.
21 Fapa a hrin lai i Jesuh* tiah min na sak lai, amah nih mi kha sualnak in a khamh hna lai.”
22 Mah thil hna a can caah profet hmang in Jehovah* chimmi bia cu a hung tling, hitin a ti:
23 “Ngaknu thiang cu fa a pawi lai i fapa a hrin lai, Emmanuel tiah min sak a si lai.” Emmanuel timi a sullam cu “Pathian Kan Sinah A Um” tinak a si.
24 Cun Josef cu a hun i hlauh tikah Jehovah* vancungmi nih a chimhmi ning in a tuah i a nupi kha inn ah a kalpi.
25 Asinain fapa a hrin hlan tiang a ihpi lo, fapa a hrin tikah Jesuh tiah min a sak.
Footnotes
^ Asiloah “Messiah; Chiti Thuhmi.”
^ Asiloah “Pathian ṭhawnnak.”
^ Khrihfa Greek Baibal ah Pathian min Jehovah timi voi 237 aa telmi lakah a hmasa bik a si. Biafang Fianternak ah zoh.
^ “Jehovah Cu Khamhtu A Si” tiah sullam a ngeimi Hebru min Jeshua asiloah Joshua he aa khat.
^ Biafang Fianternak ah zoh.
^ Biafang Fianternak ah zoh.
