Matthai 10:1-42
10 Jesuh nih zultu 12 kha a auh hna i khuachia ṭhawl khawhnak le zawtnak a phunphun damter khawhnak ṭhawnnak kha a pek hna.
2 Lamkaltu 12 hna i an min cu: Peter tiah auhmi Simon le a nau Andru, Zebedi fapa Jeim le a nau Johan,
3 Filip, Bartholomew, Thomas, ngunkhuai kholtu Matthai, Alfias fapa Jeim, Thaddais,
4 a lung a thomi Simon, a hnuah Jesuh a rawitu Judas Iskariot an si.
5 Jesuh nih lamkaltu 12 kha a thlah hna i hitin lamhruainak a pek hna: “Miphun dang hna sinah kal hlah u, Samaria mi khua hna zong ah lut hlah u.
6 Israel mi chung in a tlaumi tuu hna sin tu ah va kal u.
7 Nan kal tikah ‘Vancung Pennak cu a nai cang’ tiah phung va chim u.
8 A zawmi kha va damter hna u, mithi kha va thawhter hna u, mithinghmui kha va thianter hna u, khuachia kha va ṭhawl hna u. Man loin nan hmuh caah man loin va pe ve hna u.
9 Nan zal ah sui, ngun, dar tangka i sanh hlah u.
10 Nan khualtlawnnak ah rawl i rawnhnak sawngkhoi i phorh hlah u. Rian a ṭuanmi cu rawl dangh awkah aa tlak. Angki, phanah, ṭhiangṭhunh hna kha a hlei* in i ken hlah u.
11 “Khuapi ah siseh, khuate ah siseh nan luh tikah aa tlakmi kha kawl u law cuka khua in nan chuah hlan tiang a inn ah i ṭhum u.
12 Innchung nan luh tikah inn-ngeitu kha ‘Daihnak um ko seh’ tiah chawnbia hna u.
13 An in cohlan hna ahcun mah inn ah daihnak a tlung lai. An in cohlan hna lo ahcun daihnak cu nan sinah a kir ṭhan lai.
14 An in cohlang hna lo i nan bia an ngaih lo ahcun mah inn asiloah mah khua in nan chuah tikah nan ke i leidip kha va thing u.
15 Biatak kaan chimh hna, Biaceihnak Ni ah cu khua cu Sodom le Gomorrah khua nakin a temhinnak a fak deuh lai.
16 “Cenghngia rual lakah tuu pawl thlah bantuk in kaan thlah cang hna. Cucaah rul bantuk in ralring tein um u law ṭhuro bantuk in nan nun va nem u.
17 Mi kha va i ralring hna u. Biaceihnak zung ah an in chanh hna lai i pumhnak inn ah an in tuk hna lai.
18 Keimah ruang ah bawi hna le siangpahrang hna hmaiah an in chuahpi hna lai. Cuticun anmah le miphun dang hna sinah tehte khaannak caanṭha nan hmu lai.
19 An in chuahpi hna tikah zeitindah ka chim lai, zeidah ka chim lai tiin nan thinphang hlah u. Nan chim dingmi bia cu mah caan a phanh tikah nan hngalh te lai.
20 Nanmah lawng nih nan chim lai lo, nan Pa sinin a rami thiang thlarau nih aan chimpi hna lai.
21 Cu leng ah mi nih anmah unau lila kha thah awkah an chanh hna lai, pale nih an fale kha an thahter hna lai, fale zong nih an nu le an pa kha an ralchanh hna lai i an thahter hna lai.
22 Keimah min ruang ah mikip nih an in huat hna lai. Asinain a dongh tiang inkhawhnak a ngeimi cu khamh an si lai.
23 Khua pakhat ah an in hrem hna ahcun a dang khua pakhat ah va zam u. Biatak kaan chimh hna, Israel khua dihlak ah phung nan chim dih hlanah mi Fapa cu a phan lai.
24 “Siangngakchia cu a saya cung ah a um kho lo, sal zong a bawi cung ah a um kho lo.
25 Siangngakchia cu saya bantuk, sal cu bawi bantuk a si ahcun i lungsak ding a si ko. Mi nih chungkharlu kha Beelzebul* tiah an auh ahcun chungkharmi hna cu mah nak chia chinchin in auh an si lai.
26 Cucaah mi kha va ṭih hna hlah u. Thuhmi thil vialte cu an lang te lai, biathli vialte cu hngalh an si te lai.
27 Mui lakah ka chimmi bia kha ceunak lakah va chim u. Din tein ka chimmi bia kha inncung in va thanh u.
28 Pum lawng a that kho i nunnak* a hrawk kho lomi minung kha va ṭih hna hlah u. Pum zong, nunnak zong Gehenna* ah a hrawk khotu lawng kha va ṭih u.
29 Pithlung pahnih khi phaisa sen pakhat* in nan cawk khawh a si ko lo maw? Nan Pa hngalh loin mah pithlung pakhat hmanh khi vawlei ah a tla lo.
30 Nan lu cung nan sam hmanh kha a rel dih.
31 Cucaah nan thinphang hlah u, nannih cu pithlung tampi nakin nan sunglawi deuh.
32 “Mi hmaiah a ka cohlangmi paoh cu vancung ka Pa hmaiah ka cohlan ve hna lai.
33 Mi hmaiah a ka hlawmi paoh cu vancung ka Pa hmaiah ka hlawt ve hna lai.
34 Vawlei ah daihnak tlunter ding in a ra tiah ka ruat hlah u. Daihnak si loin vainam tu tlunter awkah ka ra.
35 Pa le a fapa, nu le a fanu, monu le a vapa nu kha i ṭhencheuter awkah ka ra.
36 Nan chungkharmi cu nan ral an si te lai.
37 Keimah nakin nulepa a daw deuhmi cu ka zultu si awkah aa tlak lo. Keimah nakin fale a daw deuhmi zong ka zultu si awkah aa tlak lo.
38 Hremnak tung* i put in ka hnu a ka zul lomi cu ka zultu si awkah aa tlak lo.
39 A nunnak* khamh awkah aa zuammi cu a nunnak a sung lai. Keimah ruang ah a nunnak* a sungmi tu cu a nung ṭhan lai.
40 “Nanmah aan conglawmhtu hna cu keimah a ka conglawmhtu an si. Keimah a ka conglawmhtu cu a ka thlahtu a conglawmhmi an si.
41 Mi pakhat kha profet a si ruang ah a conglawmhtu cu profet nih a hmuh dingmi laksawng kha a hmuh ve lai. Mi pakhat kha miding a si ruang ah a conglawmhtu cu miding mi nih a hmuh dingmi laksawng kha a hmuh ve lai.
42 Biatak kaan chimh hna, ngakchia he aa lomi mah mi hna hi ka zultu an si ruang ah tikik hraikhat a pemi cu laksawng hmu loin an um lai lo.”
Footnotes
^ A hrampi, “pahnih.”
^ Khuachia bawi Satan a langhtermi min a si.
^ Biafang Fianternak ah zoh.
^ Biafang Fianternak ah zoh.
^ A hrampi, “assarion piakhat,” denarii cheu hleiruk cheu khat.
^ Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.
