Matthai 11:1-30
11 Jesuh nih zultu 12 kha lamhruainak a pek dih hna hnuah khua dang ah phungchim ding le cawnpiak ding in cuka hmun in a chuak.
2 Johan nih Khrih rianṭuannak kong kha thong chung in a theih tikah a zultu pawl kha a thlah hna i,
3 “A Ra Dingmi cu nangmah maw na si asiloah midang dah kan hngah rih lai?” tiah a halter hna.
4 Mah tikah Jesuh nih “Va kal u law nan theihmi le nan hmuhmi vialte hi Johan cu va chim u:
5 Mitcaw nih khua an hmuh cang, kebeimi an kal kho cang, thinghmuimi an thiang cang, hnachetmi nih khua an theih khawh cang, mithi thawhter an si cang i sifakmi nih thawngṭha an theih cang.
6 Ka cung ah lunghrinnak zeihmanh a ngei lomi* cu lunglawmmi an si” tiah a ti hna.
7 Johan zultu pawl an kir tikah Jesuh nih Johan kong he aa tlaiin mibu kha hitin a ti hna: “Ramlak ah ahodah nan va zoh? Thli a hrannaklei ah aa hninmi phaikung bantuk minung maw? A si lo.
8 A si ahcun ahodah nan va zoh? Thilpuan ṭhaṭha* in aa thuammi maw? A si lo. Cutin aa thuammi hna cu siangpahrang inn ah pei an um cu.
9 Cu a si ah ahodah nan va zoh? Profet maw? A si. Kaan chimh hna lai, anih cu profet a si. Profet hna nakhmanh in a ngan deuh.
10 ‘Ka lamkal kha na hmai in ka thlah lai, na kalnak ding lam kha na hmai in aan sialpiak lai’ tiin Cathiang ah aa ṭialmi cu amah kong kha a si.
11 Biatak kaan chimh hna, a nung balmi vialte lakah Tipil Petu Johan nakin a ngan deuhmi an chuak rih lo, asinain vancung Pennak ah a hme bikmi cu Johan nakin a ngan deuh.
12 Tipil Petu Johan chan thawk in atu tiang mi nih vancung Pennak chung luh awkah fakpi in an i zuam, cutin aa zuammi hna nih vancung Pennak kha an hmuh.
13 Profet bia le Nawlbia vialte cu Johan chan tiang chimchung an si.
14 Nan cohlan duh zong, duh lo zong ah Johan cu ‘A ra laimi Elijah’ kha a si.
15 Hna a ngeimi nih thei ko hna seh.
16 “Atu chan mi hna hi ahote he dah ka tahchunh hna lai? Annih cu chawdawrnak hmun ah lente aa celh i an hawile hitin a au hnawhmi ngakchia pawl he an i lo:
17 ‘Thonglawi kan in tumh hna nain nan laam lo. Ṭah hla kan in sak hnawh hna nain nan ṭap duh fawn lo.’
18 Cu bantuk in annih zong nih midang bantuk in a ding, a ei lomi Johan a rat tikah ‘Hi pa hi khuachia aa hrolh’ tiah an ti.
19 Midang bantuk in a ding, a eimi mi Fapa a rat tikah ‘Ngunkhuai kholtu le misual mi hna he aa kommi, mizuram le misaram’ tiah an ti ṭhan. Asinain fimnak cu a ding ti kha a tuahsernak nih a langhter ko.”
20 Cun Jesuh nih khuaruahhar thil tam bik a rak tuahnak khua hna kha an i ngaihchih duh lo caah a mawhchiat hna:
21 “Khorazin khuami hna, thil ṭhalo nan tong lai! Bethsaida khuami hna, thil ṭhalo nan tong lai! Nan khua ah ka rak tuahmi khuaruahhar thil hna kha Tair le Sidon khua ah rak tuah ning law a hmasa tein mah khuami hna cu buri puan i aih in le vutcam i phulh in an i ngaichih diam cang lai.
22 Kaan chimh hna lai, Biaceihnak Ni ah Tair le Sidon khua nakin nan temhinnak cu a fak deuh lai.
23 Kapernaum khuami hna, van tiang hlorh kan si lai tiah maw nan i ruah? Nan si lai lo. Thlan khor* ah hlonh nan si lai. Nan sinah ka langhtermi khuaruahhar thil kha Sodom khua ah rak tuah ning law Sodom khua cu atu tiang a um rih lai.
24 Kaan chimh hna lai, Biaceihnak Ni ah Sodom khua nakin nan temhinnak cu a fak deuh lai.”
25 Cu caan ah Jesuh nih “Van le vawlei Uktu ka Pa, mah a konglam hna hi mifim le cathiammi hna sinah langhter loin ngakchia bantuk in aa toidormi hna sinah na langhter caah zapi hmaiah kaan thangṭhat.
26 A si, ka Pa, nangmah na duhnak ning tein a si ko.
27 Ka Pa nih zeizong vialte kha a ka pek dih cang. Pa dah ti lo nih cun Fapa kong kha ahohmanh nih tling tein an hngal lo. Fapa a simi keimah le keimah nih an sinah ka phuanmi hna dah ti lo nih cun Pa kong kha ahohmanh nih tling tein an hngal ve lo.
28 A re a theimi le a thil a ritmi vialte hna, ka sinah ra tuah u. Hrimhnak kaan pek hna lai.
29 Ka hngawngkual kha i khinh u law ka sinin cawng u. Kei cu a nun a nemmi le aa toidormi ka si caah hrimhnak nan hmuh lai.
30 Ka hngawngkual cu khinh a fawi i ka thil zong a zaang” tiah a ti.
Footnotes
^ A hrampi, “keimah ruang ah tlukrilh awk a ruang a ngei lomi.”
^ A hrampi, “a nemmi.”
^ A hrampi, “Hades.” Biafang Fianternak ah zoh.
