Matthai 12:1-50
-
Jesuh cu “Sabbath Bawi” a si (1-8)
-
A kut pakhat a zengmi pa a damter (9-14)
-
Pathian dawtmi sal (15-21)
-
Thiang thlarau in khuachia ṭhawlnak (22-30)
-
Ngaihthiam khawh lomi sualnak (31, 32)
-
A thei in a kung hngalh khawh a si (33-37)
-
Jonah khuaruahhar thil (38-42)
-
Khuachia a rak kir ṭhan (43-45)
-
Jesuh a nu le a naule pawl (46-50)
12 Sabbath ni ah Jesuh le a zultu pawl cu lo chung in an kal. Mah lioah a zultu pawl cu an paw a ṭam caah favui kha an zun i an ei.
2 Mah kha Farasi mi nih an hmuh hna tikah, “Zoh hmanh! Sabbath ni ah tuah lo dingmi kha na zultu hna nih an tuah” tiah an ti.
3 Jesuh nih “David le a mi pawl an rawl a ṭam tikah David nih zeidah a rak tuah ti kha nan rel bal lo maw?
4 Pathian innchung ah an lut i amah le a mi pawl nih einak nawl an ngeih lomi, tlangbawi lawng nih einak nawl an ngeihmi Pathian hunhmi changreu* kha an ei a si lo maw?
5 Mah leng ah biakinn chung ah a ummi tlangbawi pawl nih Sabbath ni ah rian an ṭuan nain nan sual tiah ti an si lonak kong kha Nawlbia chung ah nan rel bal lo maw?
6 Kaan chimh hna lai, hika ah biakinn nakin a ngan deuhmi a um.
7 ‘Raithawinak kha ka duhmi a si lo, zaangfahnak tu kha ka duhmi a si’ timi Cathiang sullam kha nan hngalhthiam ahcun sualnak a ngei lomi kha sual nan phaw hna lai lo.
8 Zeicahtiah mi Fapa cu Sabbath Bawi a si” tiah a ti hna.
9 Cuka hmun in an chuah hnuah pumhnak inn ah a lut,
10 cuka ah a kut pakhat a zengmi pa a rak um! Farasi mi pawl nih Jesuh kha sualphawt duh ah, “Sabbath ni ah mizaw damter phung a si maw?” tiah an hal.
11 Jesuh nih “Tuu pakhat nan ngei hei ti u sih. Mah tuu cu Sabbath ni ah khor chung ah tla seh law chuah loin a ummi nan um hnga maw?
12 Minung cu tuu nakin a let tampi in a sunglawi deuh. Cucaah Sabbath ni ah ṭhatnak tuah ding a si ko” tiah a ti hna.
13 Mah hnuah a kut a zengmi pa kha “Na kut kha samh tuah” tiah a ti. A samh tikah khatlei a kut bantuk in a dam ṭhan.
14 Mah tikah Farasi mi pawl cu an chuak i Jesuh kha thah awkah khua an khang.
15 Mah kha Jesuh nih a hngalh tikah cuka in a chuak. Mi tampi nih a hnu an zulh i a zawmi vialte kha a damter hna.
16 Asinain a kong kha aho sin hmanh ah chim lo ding in a thlauh hna.
17 Cucaah profet Isaiah hmang in Pathian chimmi bia cu a hung tling:
18 “Ka thimmi ka sal, ka dawt ngaingaimi le ka lung a ka tongmi hi zoh hmanh u! A cung ah ka thlarau ka chiah lai. Miphun hna sinah dinnak kong kha a thanh lai.
19 Bia aa al len lai lo i a au zong a au len lai lo, zatlang lam zong ah ahohmanh nih a aw an thei lai lo.
20 Dinnak kha teinak ah a ser hlan tiang a kiak dengmangmi phaikung kha a khiak lai lo i a mit dengmangmi meica kha a hmit lai lo.
21 A min nih miphun hna kha ruahchannak a pek hna lai.”
22 Cun khuachia tuah ruang ah a mit a caw i a holh kho lomi kha a sinah an ratpi, Jesuh nih a damter caah a holh kho i a mit khua a hmu ṭhan.
23 Mibu cu an khuaruah a har tuk i “Mah pa hi David Fapa a si sual hnga maw?” tiah an ti.
24 Mah kha Farasi mi nih an theih tikah “Hi pa nih khuachia a ṭhawl khawhmi cu khuachia bawi Beelzebul* thawng in a si” tiah an ti.
25 An ruahnak kha a hngalh tikah Jesuh nih “Ram pakhat ah rammi pawl an lung aa rual lo ahcun cu ram cu a rawk ko lai. Khua siseh, chungkhar siseh, an lung aa rual lo ahcun an hmun kho lai lo.
26 Cu bantuk in Satan nih Satan kha a ṭhawl ahcun mah cu lung i rual lo a si. Cutin a si ahcun a pennak cu zeitindah a hmunh khawh lai?
27 Keimah nih Beelzebul thawng in khuachia ka ṭhawl khawhmi a si ahcun nan zultu hna nih tah aho thawng in dah khuachia an ṭhawl khawh kun? Cucaah nan palhnak kha nan zultu hna nih an langhter ko.
28 Pathian thiang thlarau thawng in khuachia ka ṭhawl khawhmi a si ahcun nannih cu Pathian Pennak kha nan tlolh cang.
29 Miṭhawng pa kha ṭem hmasa loin cun zeitindah a inn kha an baoh khawh lai i a thil cu an lak khawh lai? An ṭem hmasa hnu lawng ah pei an lak khawh lai cu.
30 Keimah lei ah a ṭang lomi paoh cu a ka ralchanhtu an si. Pumhkhawmhnak ah a ka bawm lomi paoh cu ṭhektu an si.
31 “Cucaah kaan chimh hna lai, sualnak le Pathian serhsatnak bia vialte cu ngaihthiam an si lai. Asinain thiang thlarau serhsat in bia a chimmi tu cu ngaihthiam an si lai lo.
32 Mi Fapa ralchanh in bia a chimmi cu ngaihthiam an si lai. Thiang thlarau ralchanh in bia a chimmi tu cu atu chan ah siseh, hmailei chan ah siseh ngaihthiam an si lai lo.
33 “A ṭhami thingkung nan si ahcun thei ṭha nan tlai ko lai, a ṭhalomi thingkung nan si ahcun thei ṭhalo nan tlai ko lai. A thei zohnak in a kung a ṭhat le ṭhat lo hngalh khawh a si.
34 Rul tefa hna, miṭhalo a simi nih cun zeitindah bia ṭha cu nan chim khawh lai. Kaa nih cun lung chung ah a khatmi kha pei a chim tawn cu.
35 Miṭha cu a lungthin chung ah ṭhatnak in a khah caah bia ṭha a chim tawn. Miṭhalo nih cun a lungthin chung ah ṭhatlonak in a khah caah bia ṭhalo a chim tawn.
36 Kaan chimh hna lai, mikip cu an chimmi santlai lomi bia caah Biaceihnak Ni ah biaceih an si lai.
37 Na chimmi bia ruang ah miding in cohlan na si lai bantuk in na chimmi bia ruang ah sualphawt na si lai” tiah a ti.
38 Mah tikah phungbia cawnpiaktu le Farasi mi cheukhat nih Jesuh kha “Saya, na sinin khuaruahhar thil pakhat in hmuh kan duh” tiah an ti.
39 Jesuh nih “Miṭhalo le mi zuangzam* chan nih khuaruahhar thil kha hmuh nan duh. Asinain profet Jonah khuaruahhar thil dah ti lo cu zei bantuk khuaruahhar thil hmanh nan hmu lai lo.
40 Jonah cu ngapi paw chung ah ni thum le zan thum a um bantuk in mi Fapa zong vawlei chung ah ni thum le zan thum a um ve lai.
41 Biaceihnak ni ah Nineveh khua mi hna cu tuchan mi hna he an tho ṭhan lai i tuchan mi hna kha sual an in phawt hna lai. Annih cu Jonah chimmi bia ruang ah an i ngaihchih caah a si. Atu hika ah Jonah nakin a ngan deuhmi a um.
42 Biaceihnak ni ah thlanglei siangpahrang nu cu tuchan mi hna he a tho ṭhan lai i tuchan mi hna kha sual aan phawt hna lai. Anih cu siangpahrang Solomon fimnak theih duh ah lam hlatpi in a rat caah a si. Asinain zoh hmanh u! Atu hika ah Solomon nakin a ngan deuhmi a um.
43 “Thlarau ṭhalo pakhat cu minung chung in a chuak i ti um lonak ah dinhnak hmun a kawl nain a hmu lo.
44 Mah tikah ‘Ka chuahtakmi ka inn ah ka kir ṭhan ko lai’ tiah a ti. A kir ṭhan tikah inn cu lawng hirhiar tein le thiang tein a rak i phiahmi kha a hmuh.
45 Amah nakin a sual deuhmi thlarau pasarih kha a va auh hna i cuka ah cun an um. A donghnak ah mah mipa i a sining cu a hlan nakin a zual deuh. Cuticun a ṭhalomi tuchan mi hna zong nan si ve lai” tiah a ti.
46 Mibu sin i phung a chim lengmang lioah a nu le a naule cu an ra i Jesuh chawnh duh ah inn leng ah an dir ko.
47 Mah tikah mi pakhat nih “Na nu le na naule nih chawnh an in duh i a leng ah an dir ko” tiah a ti.
48 Jesuh nih “Ahodah ka nu cu a si? Ahodah ka naule cu an si?” tiah a ti.
49 A zultu lei kha a hei sawh i “Anmah hi ka nu le ka unau cu an si.
50 Vancung ah a ummi ka Pa duhnak a tuahmi paoh cu ka nu le ka unau an si” tiah a ti.
Footnotes
^ Asiloah “pekchanhmi changreu.”
^ Satan a langhtermi min a si.
^ Asiloah “zumhawktlak lomi.”
