Matthai 15:1-39
15 Farasi mi le phungbia cawnpiaktu pawl cu Jerusalem in Jesuh sinah an ra i,
2 “Zeicahdah na zultu pawl nih pupa phung kha an buar? Rawl ei lai ah an kut an i ṭawl lo”* tiah an ti.
3 Mah tikah Jesuh nih hitin a ti hna: “Nannih tah phungphai zulh awkah zeicahdah Pathian nawlbia kha nan buar?
4 Pathian nih ‘Na nu le na pa kha upat hna,’ ‘Nulepa puarhrangpi in a chawnbiami* cu thihdan pek a si lai’ tiah a ti.
5 Asinain nannih nih cun ‘Nulepa sinah “Nanmah bawmh dingmi thilri cu Pathian ka pek cang” tiah a timi cu,
6 nulepa kha bawmh a hau ti lo’ tiin nan ti. Phungphai zulhnak caah Pathian bia kha zei ah nan rel lo.
7 Mi depde hna, nan kong he aa tlaiin Isaiah nih a rak chimchungmi cu a hmaan taktak:
8 ‘Hi mi hna nih hin an kaa lawng in an ka upat, an lungthin in cun an ka hlat ngaingai.
9 Annih nih minung sermi phungphai kha keimah bia bantuk in an cawnpiak hna caah an ka biaknak cu pakpalawng a si’ tiah a ti.”
10 Mah tikah mibu kha a pawng ah a auh hna i “Ngai u law mah bia i a sullam hi hngalthiam tuah u:
11 Kaa chung i a lutmi nih mi cu a thurter lo, kaa chung in a chuakmi tu nih mi cu a thurter” tiah a ti.
12 Mah tikah a zultu pawl cu a sinah an ra i “Na chimmi bia ruang ah Farasi mi pawl cu an thin a hung ti kha na hngal maw?” tiah an ti.
13 Jesuh nih “Vancung ka Pa nih a phun lomi kung paoh cu phawi a si lai.
14 Anmah um in va um ve ko hna seh. Annih cu hruaitu mitcaw an si. Mitcaw nih mitcaw a hruai ahcun an pahnih in khor chung ah an tla ko lai” tiah a ti.
15 Peter nih “Na chimmi tahchunhnak sullam kha rak kan chim” tiah a ti tikah,
16 Jesuh nih “Nannih zong nan hngalthiam ve rih lo hi ta.
17 Kaa in a lutmi paoh cu paw ah a phan i leng ah a chuak ṭhan ti kha nan hngal lo maw?
18 Asinain kaa in a chuakmi cu lungthin chung in a rami a si caah mi kha a thurter.
19 Tahchunhnak ah, a ṭhalomi ruahnak, lainawnnak, zuanzamnak, nupa sualnak,* firnak, lihchimnak le Pathian thangchiatnak hna cu lungthin chung in a rami an si.
20 Mah hna cu mi a thurtertu an si. Kut ṭawl loin* rawl einak nih cun mi a thurter lo” tiah a ti.
21 Jesuh cu cuka in Tair le Sidon peng lei ah a kal.
22 Cuka hmun i a ummi Foinisia minu pakhat cu a ra i “Bawipa, David Fapa, ka zaangfah ko. Ka fanu cu khuachia nih a tuah i fakpi in a tuar ko” tiah a au.
23 Jesuh nih kaakhat hmanh a chawn lo. A zultu pawl cu a sinah an ra i “Mah minu hi kalter ko, kan hnulei in a kan zulh i a kan au hnawh lengmang” tiah an ti.
24 Mah tikah Jesuh nih “Kei cu Israel mi chung i a tlaumi tuu hna sin lawng ah thlah ka si, miphun dang hna sinah thlah ka si lo” tiah a ti.
25 Asinain minu cu a ra i a hmaiah khukbil in a kun i “Bawipa, ka bawm ko!” tiah a nawl.
26 Jesuh nih “Fale rawl cu uifa tete kha pek awk a si lo” tiah a ti.
27 Minu nih “A si ko, Bawipa, asinain uifa tete nih an bawi cabuai in a tlami rawl ṭilṭawt kha an ei tawn ko” tiah a ti.
28 Mah tikah Jesuh nih “Na zumhnak cu a fek taktak. Na duhmi ning in si ko seh” tiah a ti. Mah caan ah cun a fanute cu a rak dam.
29 Jesuh cu cuka in a chuak i Galili Rili pawng a phanh tikah tlang cung ah a kai i a ṭhu.
30 Mah tikah mibu cu an ra i a ke a beimi, a pum a tlamtling lomi, a mit a cawmi, a holh kho lomi le a dang mizaw tampi kha an ratpi hna. A kehram ah an chiah hna i a damter hna.
31 A holh kho lomi an holh khawhmi, a pum a tlamtling lomi an dam ṭhanmi, a ke a beimi lam an kal khawhmi, a mit a cawmi khua an hmuhmi kha mibu nih an hmuh tikah an khuaruah a har i Israel Pathian kha an thangṭhat.
32 Jesuh nih a zultu pawl kha a auh hna i “Hi mibu hi ka zaang an fak, nithum chung ka sinah an um cang i ei awk an ngei ti lo. Rawl ṭam buin* tlunter ding cu ka duh lo. Lampi ah an buhri sual lai” tiah a ti.
33 A zultu pawl nih “Mi hi vialte za lakin pek awk rawl cu hi hmunking ah hin khoika ah dah kan lak lai?” tiah an ti.
34 Jesuh nih “Changreu pa zeizat dah nan ngeih?” tiah a hal hna tikah “Changreu hlum sarih le nga hme tete tlawmpal lawng kan ngei” tiah an leh.
35 Mah tikah mibu kha vawlei ah a ṭhutter hna i,
36 changreu hlum sarih le nga cu aa lak, cun lunglawmhnak thla a cam hnuah changreu le nga kha a cheu i a zultu pawl a pek hna, a zultu pawl nih mibu kha an phawt hna.
37 An dihlak in khim tein an ei dih hnuah a hleimi kha an khawmh tikah sei ngan pasarih a khat.
38 A eimi cu pa 4000 an si, nu le ngakchia zong an i tel.
39 Mah hnuah mibu kha inn ah a tlunter hna. Jesuh cu lawng cung ah a kai i Magadan ram lei ah a kal.
Footnotes
^ Phungphai ning in kut i ṭawl lo kha a si.
^ Asiloah “volhpamhmi.”
^ Biafang Fianternak ah zoh.
^ Phungphai ning in kut i ṭawl lo kha a si.
^ Asiloah “rawl ei loin.”
