Matthai 16:1-28
16 Farasi mi le Sadusi mi cu Jesuh sinah an ra i hneksak duh ah van in a rami khuaruahhar thil pakhat in kan hmuhsak tiah an ti.
2 Jesuh nih “Zanlei ah ‘Van a sen ahcun nikhua a ṭha lai’ tiah nan ti tawn,
3 zinglei ah ‘Van a sen i khua a dawm ahcun nihin cu ruah a sur lai i a kik lai’ tiah nan ti tawn. Nannih nih van zoh in nikhua zeidah a lawh lai ti kha nan hngalh, asinain caan hmelchunhnak tu cu nan hngal kho lo.
4 Miṭhalo le mi zuangzam* chan nih khuaruahhar thil kha hmuh nan duh. Asinain Jonah khuaruahhar thil dah ti lo cu zei bantuk khuaruahhar thil hmanh nan hmu lai lo” tiah a ti i an sinin a chuak.
5 A zultu pawl cu khattalei ral an kal tikah changreu ken an philh.
6 Jesuh nih “Nan mit fim tein chia u law Farasi mi le Sadusi mi hna i thilnu kha i ralring u” tiah a ti hna.
7 “Changreu kan i ken lo caah cutin a chimmi a si lai” tiah pakhat le pakhat an i ceih.
8 Mah kha Jesuh nih a theih tikah “Zumhnak a dermi hna, changreu nan i ken lonak kong cu zeicah nan i ceih?
9 Ka chim duhnak kha nan i fiang rih lo maw? Changreu hlum nga in mi 5,000 ka dangh hna hnuah a taangmi nan khawmh tikah sei zeizat dah a si ti kha nan i cinken lo maw?
10 Changreu hlum sarih in mi 4,000 ka dangh hna hnuah a taangmi nan khawmh tikah sei nganmi pa zeizat dah a si ti kha nan i cinken lo maw?
11 Changreu kong ka chimmi a si lo ti kha zeicah nan hngalh lo? Farasi mi le Sadusi mi hna i thilnu kha i ralrin ding in ka chimmi a si” tiah a ti hna.
12 Mah tikah changreu chung ah phulhmi thilnu kha si loin Farasi mi le Sadusi mi hna i cawnpiaknak kha i ralrin ding in a chimmi a si ti kha an hun hngalhthiam.
13 Sisaria Filipi peng an phanh tikah Jesuh nih a zultu hna kha “Mi nih mi Fapa hi ahodah a si, an ka ti?” tiah a hal hna.
14 “Cheukhat nih Tipil Petu Johan a si, an in ti, cheukhat nih Elijah, cheukhat nih Jeremiah asiloah profet pakhatkhat a si, an in ti” tiah an leh.
15 Jesuh nih “Nannih tah ahodah a si, nan ka ti?” tiah a hal hna tikah,
16 Simon Peter nih “A nungmi Pathian Fapa, Khrih na si” tiah a leh.
17 Jesuh nih “Jonah fapa Simon, na lung i lawm ko, zeicahtiah mah kong aan hngalhtertu cu minung si loin vancung ah a ummi ka Pa a si.
18 Cun kaan chimh lai: Nang cu Peter* na si. Hi lungtum cung ah hin ka Khrihfabu kha ka dirh lai, mah Khrihfabu cu Thlan* nih a tei kho lai lo.
19 Vancung Pennak tawh kaan pek lai. Vawleicung ah na hrenhmi* vialte cu vancung zong ah hrenhcia an si lai. Vawleicung ah na awnhmi* vialte cu vancung zong ah awnhcia an si lai” tiah a ti.
20 Mah hnuah Khrih a si kha aho sin hmanh ah chim lo ding in a zultu pawl kha fakpi in a thlauh hna.
21 Cu caan thawk in Jesuh nih Jerusalem ah a kal lainak kong, Judah mi hruaitu hna, tlangbawi upa hna le phungbia cawnpiaktu hna ruang ah harnak tampi a ton lainak kong, cun thah a si lainak kong le nithum hnuah a thawh ṭhan lainak kong kha a zultu pawl a chimh hna.
22 Peter nih Jesuh cu a dang tein a hei kalpi i a mawhchiat, “Bawipa, nangmahle nangmah i zaangfah ko. Hi bantuk thil cu zeitik hmanh ah na tong lai lo” tiah a ti.
23 Mah tikah Jesuh cu a hun i mer i “Satan, chuak tuah!* Nang cu ka caah dawntu na si. Pathian ruah ning in si loin minung ruah ning in na ruah” tiah Peter kha a ti.
24 Mah hnuah Jesuh nih “Ka hnu zulh a ka duhmi paoh nih cun mahle mah an i hlawt a hau lai. Hremnak tung* i put in ka hnu an ka zulh peng a hau lai.
25 A nunnak khamh a duhmi cu a nunnak a sung lai, asinain keimah ruang ah a nunnak a sungmi tu cu a nung ṭhan lai.
26 Mi pakhat nih vawlei pumpi hi ngei ko hmanh seh law a nunnak a sungh ahcun zeidah a ṭhahnem lai? A nunnak cu zei in dah a cawk khawh lai?
27 Mi Fapa cu a Pa sunparnak in vancungmi hna he a ra lai, cun mikip kha an tuahser ning cio in bia a ceih hna lai.
28 Biatak kaan chimh hna lai, hika ah a dirmi cheukhat cu Pennak he a rami, mi Fapa an hmuh hlanah an thi lai lo” tiah a ti hna.
Footnotes
^ Asiloah “zumhawktlak lomi.”
^ Greek holh in “Lungtum, lung” timi sullam a ngei.
^ Biafang Fianternak ah zoh.
^ A hrampi, “na ṭemmi.”
^ A hrampi, “na thlahmi.”
^ A hrampi, “ka hnulei ah kal.”
^ Biafang Fianternak ah zoh.
