Matthai 17:1-27
17 Niruk a rauh hnuah Jesuh nih Peter, Jeim le a nau Johan kha a auh hna i anmah lawng in tlang sangpi ah a kaipi hna.
2 Mah hnuah Jesuh cu an hmaiah a mui aa thleng, a hmai cu ni bantuk in a ceu i a hnipuan cu ceunak bantuk in a cer.*
3 Ruahlopi in Moses le Elijah an hung lang i Jesuh he bia an i ruah.
4 Mah tikah Peter nih “Bawipa, hika ah kan ummi hi tinvo sung a si. Na duh ahcun hika ah thlam pathum in ka sak lai, nangmah caah pakhat, Moses caah pakhat, Elijah caah pakhat” tiah a ti.
5 Cutin a chim lioah a ceumi minmei nih a zelh hna i “Amah hi ka dawtmi ka Fapa a si, a cung ah ka lung a tling. Amah bia kha ngai u” timi aw thawng minmei chung in a hung chuak.
6 Mah kha an theih tikah a zultu pawl cu an ṭih tuk i an bawk.
7 Jesuh cu an sinah a ra, a tawngh hna i “Tho u, ṭih hlah u” tiah a ti hna.
8 An hun zoh tikah Jesuh dah ti lo cu ahohmanh an hmu hna lo.
9 Tlang cung in an ṭum tikah Jesuh nih “Mi Fapa cu thihnak in thawhter a si hlan tiang mah langhnak kong hi ahohmanh chim hna hlah u” tiah nawl a pek hna.
10 Asinain zultu pawl nih Jesuh kha “Zeicah phungbia cawnpiaktu pawl nih Elijah cu a rat hmasa awk a si, an ti?” tiah an hal.
11 Jesuh nih “Elijah cu a ra taktak lai, zeizong vialte kha a hmasa bantuk in a si nakhnga a remh ṭhan lai.
12 Asinain kaan chimh hna lai, Elijah cu a ra cang, mi nih amah kha an hngalh lo caah an duh ning paoh in an rak tuah. Cu bantuk in mi Fapa zong anmah kut in harnak a tong ve lai” tiah a leh hna.
13 Mah tikah Tipil Petu Johan kong a chimmi a si ti kha an hun hngalhthiam.
14 Mibu umnak hmun an phanh tikah mi pakhat cu Jesuh sinah a ra i a hmaiah a khuk aa bil.
15 Cun “Bawipa, ka fapa hi zaangfah hram ko, tluk zawtnak a ngei i a sining cu a zual ngai. Voi tampi mei chung le ti chung ah a tlu tawn.
16 Na zultu pawl sinah ka ratpi nain an damter kho lo” tiah a nawl.
17 Mah tikah Jesuh nih “Zumhnak a ngei lomi le misual mi hna,* nan sinah zei can tiang dah ka um rih lai? Zei can tiang dah kaan in rih hna lai? Ngakchiapa cu ka sinah ratpi u” tiah a ti hna.
18 Cun Jesuh nih khuachia cu a sik i a chung in a chuak, mah caan thawk in ngakchiapa cu a dam colh.
19 Mah tikah zultu pawl cu anmah lawng in Jesuh sinah an ra i “Kannih tah zeicah khuachia kha kan ṭhawl khawh lo?” tiah an hal.
20 Jesuh nih “Nan zumhnak a der caah a si. Biatak kaan chimh hna lai, anṭam ci tia zumhnak nan ngeih ahcun hi tlang hi ‘Khikalei ah i thawn’ ti u law aa thawn ko lai. Nan tuah khawh lomi zeihmanh a um lai lo” tiah a ti hna.
21 * ——
22 Galili ram ah zultu pawl he an um lioah Jesuh nih “Mi Fapa cu rawi a si lai i mi pawl kut ah pek a si lai,
23 an thah lai i nithumnak ni ah a tho ṭhan lai” tiah a ti hna tikah zultu pawl cu an ngaih a chia tuk.
24 Kapernaum khua an phanh tikah biakinn ngunkhuai* kholtu pawl nih Peter kha “Nan sayapa nih biakinn ngunkhuai a pe bal maw?” tiah an hal.
25 Peter nih “A pek ko” tiah a leh hna i innchung a vun luh tikah Jesuh nih “Simon, zeitindah na ruah? Siangpahrang hna nih ngunkhuai a phunphun kha ahote sinin dah an kholh hna? An fapale hna sinin maw asiloah midang sinin dah?” tiah a hal.
26 “Midang sinin” tiah Peter nih a leh tikah Jesuh nih “A hmaan, siangpahrang fapale cu ngunkhuai pek an hau lo.
27 Asinain an thin kan hunter sual hna nakhnga lo rili ah va kal law nga va sio, hmasa bik na tlaihmi nga i a kaa chung ah ngun tangka piakhat* na hmuh lai. Mah tangka kha la law keimah le nangmah caah ngunkhuai va pe” tiah a ti.
Footnotes
^ Asiloah “a raang.”
^ A hrampi, “chan.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ A hrampi, “drachma piahnih,” mah cu nihnih rianṭuan man he aa tluk.
^ A hrampi, “stater piakhat,” drachma piali he aa tluk.
