Matthai 18:1-35
18 Mah lioah cun a zultu pawl cu Jesuh sinah an ra i, “Vancung Pennak ah ahodah a ngan bik lai?” tiah an hal.
2 Jesuh nih ngakchia pakhat kha a auh i an lai ah a dirter.
3 Mah hnuah hitin a ti: “Biatak kaan chimh hna lai, nan lung nan i thlen i ngakchia bantuk si awkah nan i zuam lo ahcun vancung Pennak ah nan lut bal lai lo.
4 Hi ngakchia bantuk in mi toi ah aa dormi cu vancung Pennak ah a ngan bikmi a si lai.
5 Ka min ruang ah ngakchia bantuk mi pakhat kha a cohlangmi cu keimah a ka cohlangmi a si.
6 Keimah a ka zum i ngakchia he aa lomi* hi bantuk mi hna a tlukrilhtertu cu a hngawng ah facang rialnak lungtum* thlaih in rili ah thlak cu a caah a ṭha deuh lai.
7 “Sualnak a tuahtertu hi vawlei cu thil ṭhalo a tong lai! Sualnak a tuahtertu thil cu a um awk a si ko. Asinain midang a sualtertu cu mah ruang ah thil ṭhalo fakpi in a tong lai!
8 Na kut nih siseh, na ke nih siseh sualnak aan tuahter* ahcun tan law hlonh ko. Kutke tling in zungzal mei chung ah tlak nakin cun kutke tling loin nunnak chung ah luh cu a ṭha deuh.
9 Na mit nih sualnak aan tuahter ahcun khoih law hlonh ko. A alhmi Gehenna* ah mit pahnih he tlak nakin cun mit pakhat he nunnak ah luh cu a ṭha deuh.
10 Ngakchia he aa lomi* hi mi hna hi zawmhtaih hna hlah u. Kaan chimh hna lai, an vancungmi pawl cu vancung ah a ummi ka Pa hmaiah an um peng ko.
11 * ——
12 “Zeitindah nan ruah? Mi pakhat nih tuu 100 hei ngei seh law mah lakah pakhat cu a tlau ahcun 99 kha tlang cung ah kaltak in a tlaumi tuu pakhat kha a kawl lai, a si ko lo maw?
13 A hmuh tikah a tlau lomi tuu 99 cung nakin a hmuh ṭhanmi tuu pakhat cung ah aa lawm deuh lai ti kha fiang tein ka chim ngam.
14 Cu bantuk in vancung ah a ummi ka* Pa nih ngakchia he aa lomi hi mi hna hi pakhat hmanh tlauter a duh hna lo.
15 “Na unau pakhat nih sualnak pakhatkhat a tuah ahcun va kal law nan pahnih theih lawng in a palhnak kha va chim. Na bia a ngaih ahcun na unau ah na ser khawh ṭhanmi a si.
16 Na bia a ngaih lo ahcun mi pakhat maw, pahnih maw i kalpi hna. Zei kongkau hmanh ah tehte pahnih asiloah pathum nih chim lawng ah fehter a si.
17 An bia zong a ngaih duh hlei lo ahcun Khrihfabu kha va chim hna. Khrihfabu bia zong a ngaih duh hlei lo ahcun anih cu miphun dang le ngunkhuai kholtu bantuk in va ruat ko.
18 “Biatak kaan chimh hna lai, vawleicung ah nan ṭemmi paoh cu vancung zong ah ṭemcia a si ve lai, vawleicung ah nan thlahmi paoh cu vancung zong ah thlahcia a si lai.
19 Biatak kaan chimh rih hna lai, vawleicung ah nan lak in mi pahnih nih a biapimi kong pakhat caah lungkhat tein thla an cam ahcun vancung ka Pa nih a tlinter lai.
20 Zeicahtiah mi pahnih siseh, pathum siseh ka min in an i pumh ahcun an sinah ka um ve lai.”
21 Mah tikah Peter cu a sinah a ra i, “Bawipa, ka cung ah sualnak a tuahmi ka unau kha voi zeizat dah ka ngaihthiam lai? Voi sarih maw?” tiah a hal.
22 Jesuh nih hitin a ti: “Kaan chimh lai, voi sarih si loin voi 77 tiang na ngaihthiam lai.
23 “Cucaah vancung Pennak cu rianṭuantu pawl i an leiba a chamtermi siangpahrang pakhat he tahchunh khawh a si.
24 Siangpahrang nih leiba a cawh hna tikah talent 10,000* a bami pa pakhat kha an hun chuahpi.
25 Asinain cham ding tangka a ngeih lo caah a bawipa nih a nupi le a fale he a ngeihmi vialte zuar in chamter awkah bia a khiah.
26 Mah tikah salpa cu siangpahrang hmaiah a khuk aa bil i, ‘Zaangfahnak in ka ngang rih ko. Leiba vialte kaan cham ko lai’ tiah a nawl.
27 Siangpahrang nih a zaangfah tuk caah leiba cu rak ka cham ti hlah tiah a ti i a kalter.
28 Mah salpa cu a chuak i denarii* 100 a bami a salhawi pakhat kha a va ton. A tlaih i a or in a dih i, ‘Na ka batmi na leiba kha rak ka cham’ tiah a ti.
29 A salhawi cu a khuk aa bil i, ‘Ka ngang rih ko. Kaan cham ṭhan ko lai’ tiah a nawl.
30 Asinain a duh lo, a leiba a cham dih hlan tiang mah pa kha thong ah a thlak.
31 Mah kha sal dang nih an hmuh tikah an lung a ṭha lo tuk i siangpahrang sinah an va kal i an va chimh.
32 Siangpahrang nih mah sal kha a auh i, ‘Sal ṭhalo, na ka nawl caah na leiba vialte kha kaan ngaihthiam.
33 Nangmah kaan zaangfah bantuk in na salhawi kha na zaangfah ve awk a si lo maw?’ tiah a ti.
34 Siangpahrang cu a thin a hung tuk i a leiba a cham dih hlan tiang thongbawi pawl kut ah a ap.
35 Cu bantuk in nannih zong nan unau kha lungtak tein nan ngaihthiam hna lo ahcun vancung ka Pa zong nih aan ngaithiam ve hna lai lo.”
Footnotes
^ Asiloah “a nautami.”
^ Asiloah “laa nih a hnuhmi facang rialnak lungtum.”
^ A hrampi, “tlukrilhter.”
^ Biafang Fianternak ah zoh.
^ Asiloah “a nautami.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
^ Asiloah “nan” zong a si kho.
^ Denarii 60,000,000 he aa tluk. Denarii pakhat cu rianṭuantu pakhat i nifatin rianṭuan man he aa tluk. Matthai 20:2 he tahchunh.
^ Denarii pakhat cu nikhat rianṭuan man he aa tluk. Cucaah leiba tlawmte a simi denarii 100 cu kumkhat rianṭuan man i cheuthum cheukhat hrawng he aa tluk.
