Matthai 19:1-30
19 Cutin a chim dih hnuah Jesuh cu Galili ram in a chuak, Jordan tiva kha a tan i Judea ramri a phan.
2 Mi tampi nih an zulh i a zawmi kha cuka ah cun a rak damter hna.
3 Farasi mi pawl cu Jesuh sinah an ra i hneksak duh ah, “Pa pakhat nih a nupi kha zei ruang paoh in mak khawh a si maw?” tiah an hal.
4 Jesuh nih “A hramthawk ah sertu nih pa le nu a sermi hna kong kha nan rel bal lo maw?
5 ‘Cucaah pa nih a nu le a pa kha a kaltak hna lai i a nupi he an i fon lai. Cu hna pahnih cu pumkhat an si lai’ timi kha tah nan rel bal lo maw?
6 Annih cu pahnih si ti loin pumkhat an si cang. Cucaah Pathian nih a fonhmi hna cu ahohmanh nih ṭhen hna hlah seh” tiah a leh hna.
7 “Cu a si ah, a nupi kha maknak ca pek in mak awkah zeicah Moses nih nawl a awnh?” tiah an hal.
8 Jesuh nih “Nan lung a khon ruang ah Moses nih maknak nawl aan pekmi hna a si. A hramthawk ahcun cutin a si lo.
9 Kaan chimh hna lai, a nupi kha nupa sualnak* ruang ah si loin a dang ruang ah a ma i midang a ṭhimi paoh cu a zuangzammi a si” tiah a ti.
10 Zultu pawl nih “Cutin a si ahcun i ṭhitumh lo ah a ṭha deuh lai” tiah an ti.
11 Jesuh nih “Mah kha mikip nih an cohlang lo, laksawng a hmumi lawng nih an cohlan.
12 A cheu cu an i chuahpimi chambaunak ruang ah nupi an ngei lo, a cheu cu mi nih tildit mi in an ser hna caah nupi an ngei lo, a cheu tu cu vancung Pennak caah rian tam deuh an ṭuan khawh nakhnga nupi an ngei lo.* Innchunghawi ngeih loin a um khomi paoh cu cutin um ko hna seh” tiah a ti.
13 Mi nih an fale cung ah kutchuan in thlacampiak hna seh ti an duh caah ngakchia kha Jesuh sinah an ratpi hna, asinain a zultu pawl nih an thlauh hna.
14 Mah tikah Jesuh nih “Ngakchia cu ka sinah ra ko hna seh, kham hna hlah u. Vancung Pennak cu hi ngakchia bantuk mi hna ta pei a si cu” tiah a ti hna.
15 Cun an cung ah a kut a chuan i cuka cun a chuak.
16 Mi pakhat cu Jesuh sinah a ra i “Saya, zungzal nunnak hmuh awkah zei ṭhatnak dah ka tuah lai?” tiah a hal.
17 Jesuh nih “Ṭhatnak kong cu zeicah na ka hal? Pathian lawng hi a ṭhami a si. Nunnak hmuh na duh ahcun nawlbia kha zul peng ko” tiah a leh.
18 Mah pa nih “Zei nawlbia hna dah?” tiah a hal tikah Jesuh nih “Lai va nawng hlah, va zuangzam hlah, fir hlah, lih va chim hlah,
19 na nu le na pa kha upat hna, na minunghawi kha nangmah naa dawt bantuk in va daw hna ti hna kha an si” tiah a leh.
20 “Mah vialte cu ka zulh dih ko hna, zeidah ka zulh a herh rih lai?” tiah mah tlangval pa nih a hal tikah,
21 Jesuh nih “A tlingmi si na duh ahcun na thilri kha va zuar law misifak va ṭhen hna, cuticun van ah chawva na ngei lai, cun rak ka zul” tiah a ti.
22 Mah bia kha a theih tikah a rum ngaingaimi mah tlangval pa cu ngaihchia ngai in a kal.
23 Jesuh nih a zultu hna sinah “Biatak kaan chimh hna lai, mirum mi caah vancung Pennak chung luh cu a har ngaingai lai.
24 Kaan chimh rih hna lai, Pathian Pennak chung ah mirum mi luh nakin cun ṭhimkaa chung i kalauk luh hmanh a fawi deuh lai” tiah a ti.
25 Mah bia kha a zultu pawl nih an theih tikah an khuaruah a har tuk i “Cutin a si ahcun khamhnak a hmu khomi an um ti lai maw?” tiah an hal.
26 Jesuh nih a hei zoh hna i “Minung caah cun mah hihi a si kho lomi a si, asinain Pathian caah cun zeizong vialte hi a si kho ko” tiah a leh hna.
27 Mah hnuah Peter nih “Zeizong vialte kha kaltak in na hnu kan in zulh; zeidah kan co lai?” tiah a hal.
28 Jesuh nih “Biatak kaan chimh lai, Pathian nih zeizong vialte a thar in a ser ṭhan tikah mi Fapa cu sunparnak he bawiṭhutdan cung ah a ṭhu lai, mah tikah ka hnu a ka zulmi nannih cu bawiṭhutdan 12 cung ah nan ṭhu lai i Israel mi phun 12 kha bia nan ceih hna lai.
29 Ka min ruang ah nulepa, u le nau, fale, inn le lo a kaltakmi paoh cu a let zakhat in an hmuh ṭhan lai i zungzal nunnak zong an hmuh lai.
30 “Hmasa bik a simi mi tampi cu hmanung bik an si lai i hmanung bik a simi hna cu hmasa bik an si lai.
Footnotes
^ Greek holh in por·nei′a. Biafang Fianternak ah zoh.
^ A hrampi, “anmah tein tildit mi ah an i ser.”
