Matthai 20:1-34
20 “Vancung Pennak cu rianṭuantu pawl kawl awkah zingka tein aa thawhmi mitsur dum ngeitu he aa lo.
2 Rianṭuantu hna he nikhat ah denarii* piakhat pek ding in an hna a tlak hnuah mitsur dum ah a thlah hna.
3 Mah hnuah zinglei suimilam 9* hrawng ah a chuak ṭhan i rian ngei loin chawdawrnak hmun ah a dirmi kha a hmuh hna tikah;
4 ‘Nannih zong ka mitsur dum ah va kal u, a zatawk in rianṭuan man cu kaan pek hna lai’ tiah a ti hna.
5 Cucaah an kal. Mitsur dum ngeitu cu chun suimilam 12* le zanlei suimilam 3* hrawng ah a chuak ṭhan i a hmasa bantuk in mi kha a sawm hna.
6 Zanlei suimilam 5* hrawng ah a chuak ṭhan i a dir sawhsawhmi kha a hmuh hna tikah ‘Chun nitlak rianṭuan loin hika ah zeicah nan dir ko?’ tiah a hal hna.
7 ‘Ahohmanh nih rian an kan fial lo caah a si’ tiah an leh. Mah tikah ‘Ka mitsur dum ah va kal u law va ṭuan u’ tiah a ti hna.
8 “Zanlei a phak tikah mitsur dum ngeitu nih dum zohkhenhtu sinah ‘Rianṭuantu kha au hna. Hmanung bik a rami thawk in hmasa bik a rami tiang an ṭuan man kha pe hna’ tiah a ti.
9 Zanlei suimilam 5 lawng ah rianṭuan a thawkmi hna cu an ra i denarii piakhat cio an hmu.
10 Hmasa bik rianṭuan a thawkmi hna an rat tikah tam deuh kan hmu lai tiah an ruah nain denarii piakhat cio an hmu ve.
11 Rianṭuan man an hmuh tikah dum ngeitu cung ah an phunzai.
12 ‘Hi mi hna cu hmanung bik ah an ra i suimilam 1 chung lawng an ṭuan nain nilin lakah chun nitlak fakpi in rian a ṭuanmi kanmah he aa khat in na kan pek!’ tiah an ti.
13 Asinain dum ngeitu nih an lak i pakhat kha a thawh i ‘Ka kawi, kaan hleng hna lo. Denarii piakhat pek ding in na hna a tla, a si ko lo maw?
14 Na ṭuan man kha i lak law ṭin ko. Hmanung bik a ṭuanmi hna zong nangmah zat in pek ka duh hna.
15 Ka tangka cu ka duh ning in hmannak nawl ka ngei, a si ko lo maw? Ka ṭhatnak* cung ah maw na nah a chuah?’ tiah a ti.
16 Cuticun hmanung bik a simi cu hmasa bik an si lai i hmasa bik a simi cu hmanung bik an si lai.”
17 Jerusalem lei an kai lioah Jesuh nih a zultu 12 kha anmah lawng in a auh hna i,
18 “Atu Jerusalem khua ah kan kal lai, mi Fapa cu tlangbawi upa hna le phungbia cawnpiaktu hna kut ah chanh a si lai. Thihdan pek awkah sualphawt a si lai.
19 Mi Fapa cu miphun dang hna kut ah chanh a si lai, nihchuak capo ah an saih lai, fung in an tuk lai, thingtung cung ah an thlai lai i an thah lai. Cun a nithumnak ni ah a tho ṭhan lai” tiah a ti hna.
20 Zebedi nupi cu a fapale pahnih he Jesuh sinah an ra i hal ding a ngeih caah a hmaiah a khuk aa bil.
21 Jesuh nih “Zeidah na duh?” tiah a hal tikah “Na Pennak ah ka fapale pahnih hi na orhlei ah pakhat, na kehlei ah pakhat in ṭhutnak nawl pe ko hna” tiah a nawl.
22 Jesuh nih “Nan ka halmi hi nan hngal lo. Ka din laimi hrai* kha nan din khawh lai maw?” tiah a hal hna tikah “Kan din khawh ko lai” tiah an leh.
23 Jesuh nih “Ka din dingmi hrai cu nan din taktak ko lai. Asinain ka orhlei le ka kehlei ah ahodah a ṭhu lai ti cu biachahnak nawl ka ngei lo. Ka Pa lawng nih bia a chah te lai” tiah a ti hna.
24 Mah kong kha a dang zultu pahra nih an theih tikah unau pahnih hna cung ah an thin a hung.
25 Jesuh nih a auh hna i “Vawlei uktu hna nih an ukmi kha an lal hnawh tawn hna i hruaitu hna zong nih an nawlngeihnak an langhter tawn ti kha nan hngalh ko.
26 Nannih tu cu cutin nan si awk a si lo. Mingan si a duhmi cu sinum a si awk a si.
27 Pakhatnak si a duhmi cu sal a si awk a si.
28 Mi Fapa zong midang rian fial awkah a ra lo, midang rianṭuanpiak in mi tampi tlanhnak caah a nunnak pek awkah a ra” tiah a ti.
29 Jeriko khua in an chuah tikah mi tampi nih Jesuh hnu kha an zulh.
30 Lamkam ah a ṭhumi mitcaw pahnih nih Jesuh a kal ti an theih tikah “Bawipa, David Fapa, kan zaangfah ko!” tiah an au.
31 Mibu nih dai tein um awkah an sik hna nain “Bawipa, David Fapa, kan zaangfah ko!” tiah thang chinchin in an au.
32 Jesuh cu a dir i a auh hna, “Zeidah kan tuahpiak seh ti nan ka duh?” tiah a hal hna.
33 Mah tikah “Bawipa, kan mit khua hmuh ding in rak kan tuahpiak” tiah an ti.
34 Jesuh nih a zaangfah hna caah an mit kha a tawnghpiak hna i khua an hmu colh. Cun Jesuh hnu kha an zulh.
Footnotes
^ Rom ngun tangka piakhat. Biafang Fianternak ah zoh.
^ A hrampi, “nichuah hnu suimilam 3.”
^ A hrampi, “nichuah hnu suimilam 6.”
^ A hrampi, “nichuah hnu suimilam 9.”
^ A hrampi, “nichuah hnu suimilam 11.”
^ Asiloah “siannak.”
^ Pathian serhsattu in sualphawtnak he Jesuh a thih ding Pathian nih nawl a awnhmi kha a chim duhmi a si.
