Matthai 21:1-46
21 Jesuh nih Jerusalem khua pawng, Oliv Tlang ah a ummi Bethfath khua an phanh tikah zultu pahnih kha a thlah hna i,
2 “Nan hmai khua ah khin va kal u law khua luhka ah aa hrengmi laa le a fate kha nan hmuh hna lai. Phoih hna u law ka sinah ratpi hna u.
3 Pakhatkhat nih an in hal hna ahcun ‘Bawipa nih a herh’ tiah ti u law an in pek colh ko hna lai” tiah a ti hna.
4 Cucaah profet hmang in chimmi mah bia hi a hung tling:
5 “Zion fanu kha va chim u: ‘Zoh hmanh! Na siangpahrang cu na sinah a ra lio, anih cu mi nunnem a si i laa a hun i cit, laa fate kha a hun i cit’ tiah va ti u.”
6 Cucaah zultu hna cu an kal i Jesuh nih a fial hna bang in an tuah.
7 Laa le a fate kha an rak hruai hna i an puan kha an danh, Jesuh nih laa fate kha aa cit.
8 Mi tampi nih an puan kha lam ah an phah, a cheu nih thingnge kha an saam hna i lam ah an phah ve.
9 A hmai in a kalmi le a hnu in a zulmi mibu cu “Pathian, David Fapa hi khamh hram ko! Jehovah* min in a rami cu thluachuah hmu ko seh! Vancung ah a ummi Pathian, David Fapa hi khamh hram ko!” tiah an au.
10 Jerusalem khua chung a luh tikah an khuapi ning in an i tuai-ur i “Mah pa hi ahodah a si?” tiah an hal hna.
11 Mibu nih “Galili ram, Nazareth khuami profet Jesuh a si” tiah an leh hna.
12 Jesuh cu biakinn chung ah a lut i cuka ah thil a cawmi le a zuarmi kha a ṭhawl hna, tangka thlengtu hna cabuai le laileng zuartu hna ṭhutdan kha a leh dih.
13 Cun “Cathiang ah ‘Ka inn cu thlacamnak inn tiah auh a si lai’ tiin aa ṭial nain nannih nih mifir kua ah nan ser cang” tiah a ti hna.
14 Mitcaw le kebei pawl zong biakinn ah an ra i Jesuh nih a damter hna.
15 Tlangbawi upa hna le phungbia cawnpiaktu hna cu Jesuh nih a tuahmi khuaruahhar thil hna le ngakchia pawl nih “Pathian, David Fapa hi khamh hram ko!” tiah biakinn ah an aumi kha an hmuh tikah an thin a hung tuk.
16 Cucaah “An chimmi cu na thei maw?” tiah an hal. Jesuh nih “Ka theih ko. ‘Ngakchia tete le hnuktlai liomi hna kha thangṭhatnak cu na chimter hna’ timi bia kha nan rel bal lo maw?” tiah a ti hna.
17 Cun cuka khua in a chuak i Bethani khua ah a va riak.
18 A thaizing zingka tein khuapi lei i an kir lioah Jesuh cu a rawl a ṭam.
19 Lamkam ah theipi kung pakhat a hmuh i a va fuh. A hnah lawng a rak um i a thei pakhat hmanh a um lo. Cucaah “Zeitikhmanh ah tlai ti hlah” tiah a ti tikah theipi kung cu a car colh ko.
20 Mah kha a zultu hna nih an hmuh tikah an khuaruah a har tuk i “Zeitindah theipi kung hi a car colh khawh hnga?” tiah an ti.
21 Mah tikah Jesuh nih “Biatak kaan chimh hna lai, zumhnak nan ngeih i lung awṭawmnak nan ngeih lo ahcun theipi kung cung i ka tuahmi kha nan tuah khawh ve lai. Mah leng ah hi tlang hi ‘Hika hin i ṭhial law rili ah i paih’ tiah nan ti hmanh ah aa paih ko lai.
22 Zumhnak tling in thla nan cam ahcun nan halmi paoh nan hmuh lai” tiah a ti hna.
23 Jesuh cu biakinn ah a lut i a cawnpiak hna lioah tlangbawi upa pawl le Judah mi hruaitu pawl cu an ra i “Zei nawlngeihnak in dah mah thil hna hi na tuah? Hi nawlngeihnak hi aho nih dah aan pek?” tiah an hal.
24 Mah tikah Jesuh nih “Kei zong bia pakhat in hal kaan duh ve hna. Nan ka leh khawh ahcun mah thil hna hi zei nawlngeihnak in dah ka tuah ti kha kaan chimh ve hna lai:
25 Johan nih aho nawlngeihnak in dah tipil a pek? Pathian sinin maw* asiloah minung sinin dah?” tiah a hal hna. Annih nih “‘Pathian sinin’ kan ti ahcun ‘Johan kha zeicah nan zumh kun lo?’ tiah a kan hal lai.
26 ‘Minung sinin’ kan ti ahcun Johan kha profet a si tiin a zummi mipi hi ṭihnung an si” tiah anmahle anmah an i ceih.
27 Cucaah “Kan hngal lo” tiah an leh. Mah tikah Jesuh nih “Kei zong zei nawlngeihnak in dah mah thil hna hi ka tuah ti kha kaan chim ve hna lai lo” tiah a ti hna.
28 “Zeitindah nan ruah? Mipa pakhat nih fapa pahnih a ngeih hna. Upa deuh sinah a kal i ‘Ka fapa, nihin cu mitsur dum ah va kal law rian va ṭuan’ tiah a ti.
29 Anih nih ‘Ka kal lai lo’ tiah a ti. Asinain a hnuah aa ngaichih i mitsur dum ah a va kal.
30 A fapa hniang sinah a kal i cuti ṭhiamṭhiam in a fial tikah ‘Ka kal lai’ tiah a ti, asinain a kal lo.
31 An pahnih lakah aho nih dah a pa duhnak a tuah?” tiah Jesuh nih a hal hna tikah “Upa pa nih” tiah an leh. Mah tikah Jesuh nih “Biatak kaan chimh hna lai, ngunkhuai kholtu le hlawhhlangnu hna cu nanmah hlanah Pathian Pennak chung ah an lut lai” tiah a ti hna.
32 Johan a ra i dinnak lam aan hmuhsak hna nain nan rak zum lo. Ngunkhuai kholtu le hlawhhlangnu hna nih cun an rak zumh. Mah kha nan hmuh hnu hmanh ah nan zum duh hlei lo, nan i ngaichih hlei lo.
33 “A dang tahchunhnak pakhat hi ngai rih hmanh u: Lo ngeitu pakhat nih mitsur dum a ser i hau a kulh. Mitsur nennak caah khor a cawh i parthlam a sak. Cun dum rianṭuantu pawl kha a hlanh hna i ramdang ah khual a tlawng.
34 Thei lawh caan a phanh tikah a hmuh dingmi thei lak awkah a salle kha dum rianṭuantu pawl sinah a thlah hna.
35 Asinain dum rianṭuantu hna nih a salle cu an tlaih hna i pakhat kha an velh, pakhat kha an thah i a dang pakhat kha lung in an cheh.
36 Dum ngeitu nih hmasa nak tam deuh in a salle kha a thlah ṭhan hna tikah dum rianṭuantu hna nih cutin an rak tuah ṭhiamṭhiam hna.
37 A donghnak ah dum ngeitu nih ‘Ka fapa hi cu an upat ko lai’ tiah a ruah i a fapa kha a thlah.
38 Dum rianṭuantu hna nih a fapa cu an hmuh tikah ‘Mah pa hi rocotu a si. Ra u, that u sih law a ro kha i lak u sih!’ tiah an ti.
39 Cucaah an tlaih i dum leng ah an chuah i an thah.
40 ‘Dum ngeitu a rat tikah dum rianṭuantu hna kha zeitindah a tuah hna lai?’ tiah a hal hna.
41 Annih nih “Mah miṭhalo hna kha a thah hna lai. A mitsur dum kha a thei lawh caan ah a thei a pe dingmi a dang dum rianṭuantu sinah a hlanh hna lai” tiah an leh.
42 Jesuh nih “‘Innsatu hna nih an hlawtmi lung cu lung santlai bik a kil lung* a hung si. Mah lung cu Jehovah* sinin a rami a si i kan mithmuh ah khuaruahhar ngaingai a si’ timi Cathiang bia kha nan rel bal lo maw?
43 Kaan chimh hna lai, Pathian Pennak cu nan sinin lak a si lai i a thei a tlai dingmi miphun sinah pek a si lai.
44 Mi pakhat cu hi lung cung ah a tlak ahcun a kiak dih lai. Hi lung nih a tlak ahcun a parh dih lai” tiah a ti.
45 Tlangbawi upa hna le Farasi mi hna nih Jesuh chimmi tahchunhnak kha an theih tikah kanmah kong a chimmi a si ti kha an hngalh.
46 Jesuh kha tlaih an duh nain Jesuh cu profet a si tiah a zummi mibu kha an ṭih hna.
Footnotes
^ Biafang Fianternak ah zoh.
^ A hrampi, “Vancung in maw.”
^ A hrampi, “a kil a cung bik ah a ummi.”
^ Biafang Fianternak ah zoh.
