Matthai 22:1-46
22 Jesuh nih tahchunhnak hna a chim ṭhan, hitin a ti:
2 “Vancung Pennak cu a fapa caah nupi ṭhitnak puai a tuahmi siangpahrang pakhat he tahchunh khawh a si.
3 Siangpahrang nih a sawmmi hna sinah a salle kha a thlah hna i a auhter hna nain an ra duh lo.
4 Cun a dang a salle kha a thlah ṭhan hna i ‘“Rawl danghnak cu ka timh dih cang, ka cawtum le ka saṭil thauthau hna zong ka thah cang. Zeizong vialte cu timhcia a si cang. Ṭhitumnak puai ah ra cang u” tiin sawmmi kha va chim hna u’ tiah a ti hna.
5 Asinain sawmmi hna nih zei ah an an rel lo. Pakhat cu a lo ah a kal, a dang pakhat cu chawlehnak ah a kal.
6 Cheukhat nih cun a salle kha an rak tlaih hna, an rak velh hna i an thah hna.
7 “Mah tikah siangpahrang cu a thin a hung tuk i a ralkap pawl a thlah hna. Mah lainawng pawl kha an thah hna i an khua kha mei in an duah.
8 Mah hnuah a salle kha ‘Ṭhitumnak puai cu timhcia a si cang nain mah sawmmi hna cu tel awkah an i tlak lo.
9 Cucaah zatlang lam ah va kal u law nan hmuhmi paoh kha ṭhitumnak puai zawh awkah va sawm hna u’ tiah a ti hna.
10 Zatlang lam ah cun an va kal i miṭha he, miṭhalo he an hmuhmi paoh kha an ratpi hna; cuticun rawl danghnak inn cu mi an khat dih.
11 “Siangpahrang nih sawmmi pawl kha a rak zoh hna tikah puai zawhnak thuam aa hruk lomi mi pakhat kha a hmuh.
12 Cucaah ‘Ka kawi, puai zawhnak thuam i hruk loin zeicah na rak luh?’ tiah a hal tikah a let kho lo.
13 Siangpahrang nih ‘A kut le a ke kha ṭem u law a leng khuamui lakah hlonh u, cuka ah va ṭap seh law a hacang va rial seh’ tiah a sinum pawl* kha nawl a pek hna.
14 “Sawm a simi cu an tam nain thim a simi cu an tlawm.”
15 Mah hnuah Farasi mi pawl cu an kal i Jesuh kha a bia in foih awkah khua an khang.
16 Anmah zultu pawl le Herod zultu pawl kha an thlah hna i “Saya, nang cu miding mi le Pathian biatak kong a hmaan ning tein mi a cawnpiakmi na si. Lenglang a zoh lomi le mithmai a zoh lomi na si ti kha kan in hngalh ko.
17 Saya, zeitindah na ruah? Sizar* sinah ngunkhuai pek awk a si maw, a si lo? ti kha kan chim tuah” tiah an halter hna.
18 Jesuh nih a ṭhalomi an lungput kha a hngalh caah “Mi depde hna, zeicahdah foih nan ka timh?
19 Ngunkhuai pek ding tangka cu ka hmuhsak tuah u” a ti hna tikah annih nih denarii* piakhat kha an pek.
20 Jesuh nih “Hika ah aho mui le aho min dah a cuang?” tiah a hal hna.
21 “Sizar” tiah an ti tikah Jesuh nih “Sizar thil cu Sizar kha va pe u, Pathian thil cu Pathian kha va pe u” tiah a ti hna.
22 Mah bia kha an theih tikah an khuaruah a har i an kaltak.
23 Thawhṭhannak a um lo tiah a timi Sadusi mi pawl cu mah ni ah Jesuh sinah an ra i hitin an hal:
24 “Saya, Moses nih ‘Mipa pakhat cu fa ngeih loin a thih ahcun a rohtakmi a nupi kha a unau nih a ṭhit lai i mithi pa caah tefa a hrinpiak lai’ tiah a rak chim.
25 Kan lakah unau pasarih an um. Upa bik cu nupi a ngei i fa ngeih loin a thih caah a taantakmi a nupi kha a naupa nih a ṭhit.
26 Pahnihnak, pathumnak tiin an unau pasarih ning in mah minu kha an ṭhit hnuah an thi dih.
27 A donghnak ah mah minu zong a thi ve.
28 An pasarih ning in an ṭhit caah thawhṭhannak ah aho nupi dah a si lai?”
29 Jesuh nih “Nan palh tuk cang. Cathiang bia zong, Pathian ṭhawnnak rian a ṭuan ning zong nan rak hngalthiam lo hi ta.
30 Mithi thawhter ṭhan an si tikah an i ṭhi, an i um ti lai lo. Vancungmi bantuk an si cang lai.
31 Mithi thawhṭhannak he aa tlaiin Pathian nih aan chimhmi hna kha nan rel bal lo maw? Hitin a ti:
32 ‘Kei cu Abraham Pathian, Isak Pathian, Jakob Pathian ka si.’ Pathian cu mithi mi hna Pathian a si lo, a nungmi hna Pathian a si” tiah a ti.
33 Mah bia kha an theih tikah mibu cu Jesuh cawnpiak ning cung ah an khuaruah a har tuk.
34 Sadusi mi pawl holh awk hngal loin Jesuh nih a leh hnanak kong kha Farasi mi nih an theih tikah an i pum i Jesuh sinah an ra.
35 An lak i Phungbia kong ṭha tein a hngalmi Farasi mi pakhat nih Jesuh kha hneksak duh ah,
36 “Saya, Phungbia chung ah zei nawlbia dah a biapi bik?” tiah a hal.
37 Jesuh nih “‘Jehovah* na Pathian cu na lungthin dihlak, na nunnak dihlak le na ruahnak dihlak in na dawt lai.’
38 Mah cu a ngan bikmi le a pakhatnak nawlbia a si.
39 Cun ‘Na minunghawi kha nangmah naa dawt bantuk in na dawt lai’ timi a pahnihnak nawlbia zong a pakhatnak nawlbia he aa lo.
40 Nawlbia vialte le Profet bia vialte cu mah nawlbia pahnih cung ah hram aa bunh” tiah a ti.
41 Farasi mi pawl hmunkhat i an i pumh lioah Jesuh nih,
42 “Khrih kong kha zeitindah nan ruah? Aho fapa dah a si?” tiah a hal hna tikah “David fapa” tiah an leh.
43 Jesuh nih “A si ahcun David nih thiang thlarau forhfialnak in Khrih kha Bawipa tiah zeicah a auh?
44 ‘Jehovah* nih “Na ral pawl kha na ke tang ah ka chiah dih hna hlan tiang ka orhlei kam ah hin ṭhu” tiah ka Bawipa kha a ti’ tiin David nih a rak chim.
45 David nih Khrih kha Bawipa tiah a auh ahcun Khrih cu zeitindah David fapa cu a si khawh lai?” tiah a hal hna.
46 Mah tikah ahohmanh nih an let kho lo, mah ni thawk in Jesuh kha ahohmanh nih bia an hal ngam ti lo.
Footnotes
^ Asiloah “a rianṭuantu pawl (zohkhenhtu pawl).”
^ Asiloah “Rom Siangpahrang.”
^ Rom ngun tangka. Biafang Fianternak ah zoh.
^ Biafang Fianternak ah zoh.
^ Biafang Fianternak ah zoh.