Matthai 25:1-46
25 “Vancung Pennak cu an meiinn aa put i nupi ṭhi tlangval a dongmi ngaknu pahra he tahchunh khawh a si.
2 Panga cu an hrut i panga cu an fim.
3 A hrutmi panga nih cun meiinn kha an i ken nain zinan a hlei in an i ken lo.
4 A fimmi panga nih cun an meiinn leng ah zinan a hlei in rawnmi thawl zong an i ken.
5 Nupi ṭhi tlangval cu a tlai caah an dihlak in an ngu i an i hngilh.
6 Zamṭim ah ‘Nupi ṭhi tlangval cu a ra cang! Rak dong u’ timi au thawng kha an theih.
7 Mah tikah ngaknu dihlak cu an tho i an meiinn kha an timh.
8 A hrutmi ngaknu hna nih a fimmi ngaknu hna kha, ‘Kan meiinn a mit hnik cang i zinan tlawmpal in kan pe ve u’ tiah an hal hna.
9 A fimmi hna nih cun ‘Nanmah ca he, kanmah ca he cun aa za lai lo. Cucaah zinan a zuarmi hna sinah va kal u law vaa cawk ko u’ tiah an ti hna.
10 Zinan an va cawk karah nupi ṭhi tlangval cu a rak phan. Timhcia tein a ummi ngaknu hna cu nupi ṭhi tlangval he rawl danghnak hmun ah an lut, cun innka kha an khar.
11 Mah hnuah a dang ngaknu pawl zong an rak phan ve i ‘Bawipa, Bawipa, innka rak kan hunh!’ tiah an ti.
12 Nupi ṭhi tlangval nih ‘Biatak kaan chimh hna, nannih cu kaan hngal hrimhrim hna lo’ tiah a ti hna.
13 “Cucaah cu ni le cu caan cu nan hngalh lo caah ralring tein hngak ko u.
14 “Vancung Pennak cu ramdang i khualtlawn aa thawh lai ah a salle kha a auh hna i a thilri zohkhenh awkah a fialmi pa he aa lo.
15 A salle kha anmah le an thil ti khawh ning cio in pakhat kha ngun tangka talent* panga, pakhat kha ngun tangka talent pahnih, a dang pakhat kha ngun tangka talent pakhat in a pek hna. Cun khualtlawn ah aa thawh.
16 Talent panga a hmumi nih mah tangka in chaw a leh colh i a dang talent panga a miak a hmuh.
17 Cu bantuk in talent pahnih a hmumi zong nih a dang talent pahnih a miak a hmuh.
18 Talent pakhat a hmumi sal tu cu a kal i mah tangka* kha vawlei ah a phum.
19 “Caan saupi hnuah an bawipa cu a rak tlung i a salle kha a tangka an tawnghtham ning a hlathlai hna.
20 Talent panga a hmumi sal nih a miak a hmuhmi talent panga kha a rak put chih i ‘Bawipa, talent panga na ka pek; atu a dang talent panga ka miak’ tiah a ti.
21 Mah tikah a bawipa nih ‘Na tuahmi cu a ṭha ngaingai, nang cu zumhawk tlakmi salṭha na si. Thil hmete hmanh ah zumhawktlak na si caah thil tampi zohkhenh awkah kaan pek rih lai. Na bawipa lunglawmhnak ah rak i hrawm’ tiah a ti.
22 Talent pahnih a hmumi sal zong a ra ve i ‘Bawipa, talent pahnih na ka pek; atu a dang talent pahnih ka miak’ tiah a ti.
23 Mah tikah a bawipa nih ‘Na tuahmi cu a ṭha ngaingai, nang cu zumhawk tlakmi salṭha na si. Thil hmete hmanh ah zumhawktlak na si caah thil tampi zohkhenh awkah kaan pek rih lai. Na bawipa lunglawmhnak ah rak i hrawm’ tiah a ti.
24 “A donghnak ah talent pakhat a hmumi sal zong a ra ve i ‘Bawipa, nang cu zaangfahnak ngei loin mi rian fial a hmangmi na si kha ka hngalh, na tuh lonak hmun ah na zun tawn i na vamh lomi fang kha na khawmh tawn.
25 Nangmah kha kaan ṭih caah na tangka cu vawlei ah ka phum, hihi na tangka cu a si’ tiah a ti.
26 A bawipa nih ‘Salṭhalo, sal thathu, ka tuh lonak hmun ah ka zun i ka vamh lomi fang kha ka khawmhmi na hngalh ahcun,
27 ka tangka* kha a karh in a cawimi hna sinah na rak chiah ko lo, ka rak kir tikah ka tangka* he, a karh he ka hmuh ṭhan hnga si.
28 “‘Cucaah a sinin talent pakhat kha la u law talent pahra a ngeimi kha va pe u.
29 A ngeimi cu chap an si lai, liam lakin chap an si lai. A ngei lomi cu a ngeihchunh te hmanh kha chuh a si lai.
30 Santlai lomi sal hi a leng khuamui lakah va hlonh u, cuka ah va ṭap seh law a hacang va rial seh’ tiah a ti.
31 “Mi Fapa cu a sunparnak in vancungmi vialte he a rat tikah a liannganmi a bawiṭhutdan cung ah a ṭhu lai.
32 Miphun vialte cu a hmaiah a pumh hna lai, tuukhal nih tuu le meheh a ṭhen hna bantuk in miphun vialte kha phu hnih in a ṭhen hna lai.
33 Tuu kha a orhlei ah a chiah hna lai i meheh kha a kehlei ah a chiah hna lai.
34 “Mah hnuah Siangpahrang nih a orhlei i a ummi hna kha ‘Ka Pa nih thluachuah a pekmi hna, ra tuah u. Vawlei hramthawk* in nan caah a timhmi Pennak cu rak co tuah u.
35 Zeicahtiah ka paw a ṭam tikah rawl nan ka pek, ka ti a hal tikah ti nan ka dinh. Khual ka si tikah nan inn ah nan ka tlunter.
36 Hruk awk ka ngeih lo tikah hnipuan nan ka pek, ka zawt tikah nan ka zohkhenh, thong ka tlak tikah nan ka veh.’
37 Mah tikah miding mi hna nih ‘Bawipa, zeitik ah dah na paw a ṭammi cu kan in hmuh i rawl kan in pek? Zeitik ah dah na ti a halmi cu kan in hmuh i ti kan in dinh?
38 Zeitik ah dah khual na simi cu kan in hmuh i kan inn ah kan in tlunter? Zeitik ah dah hruk awk na ngeih lomi cu kan in hmuh i hnipuan cu kan in pek?
39 Zeitik ah dah na zawtmi le thong na tlakmi cu kan in hmuh i kan in veh?’ tiah an hal.
40 Siangpahrang nih ‘Biatak kaan chimh hna lai, ka naule lak i a hme bik cung ah nan tuahmi vialte cu keimah cung ah nan tuahmi a si’ tiah a ti hna.
41 “Mah hnuah Siangpahrang nih a kehlei ah a ummi hna kha ‘Nannih chiatserhmi hna, ka sin hin kal tuah u. Satan le a vancungmi hna caah timhpiakmi zungzal mei chung ah kal tuah u.
42 Zeicahtiah ka paw a ṭam tikah rawl nan ka pe lo; ka ti a hal tikah ti nan ka dinh lo.
43 Khual ka si tikah nan inn ah nan ka tlunter lo; hruk awk ka ngeih lo tikah hnipuan nan ka pe lo; ka zawt tik le thong ka tlak tikah nan ka zohkhenh lo’ tiah a ti hna.
44 Mah tikah annih zong nih ‘Bawipa, zeitik ah dah na rawl a ṭammi, na ti a halmi, khual na simi, hruk awk na ngeih lomi, na zawtmi le thong na tlakmi cu kan in hmuh i kan in hramh lo?’ tiah an hal.
45 Siangpahrang nih ‘Biatak kaan chimh hna lai, ka naule lak i a hme bik cung ah nan tuah lomi cu keimah cung ah nan tuah lomi a si’ tiah a leh hna.
46 Annih cu zungzal in hrawh an si lai, miding mi tu cu zungzal nunnak an hmu lai.”
Footnotes
^ “Talent.” Greek, ta′lan·ton. Talent panga cu ngun tangka kilogram 100 tluk hrawng a si. Matt 18:24 a tanglei fianternak ah zoh.
^ A hrampi, “ngun.”
^ A hrampi, “ngun.”
^ A hrampi, “ngun.”
^ Adam le Evi fa an ngeih caan.
