Matthai 26:1-75
-
Jesuh thah awkah tlangbawi pawl khua an khang (1-5)
-
Jesuh lu cung ah zihmui a toih (6-13)
-
Hmanung bik Lanhtak Zanriah le rawinak (14-25)
-
Bawipa Zanriah an hmang (26-30)
-
Peter nih a hlawt lainak kong a chimchung (31-35)
-
Jesuh cu Gethsemane ah thla a cam (36-46)
-
Jesuh an tlaih (47-56)
-
Judah Biaceihnak Zungpi ah biaceih a si (57-68)
-
Peter nih Jesuh a hlawt (69-75)
26 Jesuh nih mah vialte a chim dih hnuah a zultu hna kha,
2 “Nan hngalh bantuk in tu hnu nihnih ah Lanhtak Puai* a si cang lai, mah tikah mi Fapa cu tung cung i thah awkah chanh a si cang lai” tiah a ti hna.
3 Tlangbawi upa pawl le Judah mi hruaitu pawl cu Kaiafas tiah auhmi tlangbawi ngan inntual ah an i pum i,
4 Jesuh kha a thli tein tlaih in thah awkah khua an khang.
5 Asinain “Puai chung ah cun tlaih awk a ṭha lai lo, mi pawl an i tuai-ur sual lai” tiah an ti.
6 Jesuh cu Bethani khua i thinghmuimi Simon inn i a um lioah,
7 minu pakhat cu lungraang thawl pakhat in a man a fak tukmi zihmui kha a rak i ken i Jesuh rawl a ei lioah a lu cung ah a toih.
8 Mah kha a zultu hna nih an hmuh tikah an thin a hung i “Mah hi sawksam a si.
9 Mah zihmui kha man fakpi ah zuar in misifak pawl pek khawh a si” tiah an ti.
10 Mah kha Jesuh nih a theih tikah “Zeicahdah mah nu hi hnahnawhnak nan pek? Ka cung ah ṭhatnak a tuahmi a si.
11 Misifak cu nan sinah an um zungzal ko lai cu ta, asinain kei tu cu ka um zungzal lai lo.
12 Mah minu nih ka pum ah zihmui a ka toihmi cu keimah vui awkah a ka timhtuahmi a si.
13 Biatak kaan chimh hna lai, vawleicung pumpi thawngṭha chimnak ah mah minu kha philh lo awkah a tuahmi cu chim a si zungzal lai” tiah a ti hna.
14 Mah hnuah lamkaltu 12 lak i Judas Iskariot cu tlangbawi upa hna sinah a kal i,
15 “Jesuh kha nan kut chung ah kaan chanh hna ahcun zeidah nan ka pek lai?” tiah a hal hna. Annih nih ngun tangka 30 kan in pek lai tiah bia an kamh.
16 Cu caan thawk in Jesuh rawi awkah caanṭha a kawl peng.
17 Thilnu Phulh Lo Changreu Puai a nikhatnak ni ah zultu pawl cu Jesuh sinah an ra i “Lanhtak Puai zanriah cu khoika ah dah kan timh lai?” tiah an hal.
18 Jesuh nih hitin a ti hna: “Khua chung ah va kal u law mipa pakhat nan hmuh lai. ‘Saya nih “Ka thih lainak caan a nai cang; na inn ah ka zultu hna he Lanhtak Puai tuah ka duh” a ti’ tiah va ti u.”
19 Cucaah a zultu hna nih Jesuh nih a chimh hna ning in Lanhtak Puai caah an timhtuah.
20 Zanlei sang a phanh tikah Jesuh cu a zultu 12 he cabuai ah an ṭhu.
21 An ei lioah hitin a ti hna: “Biatak kaan chimh hna lai, nanmah lak hin pakhat nih nan ka rawi lai.”
22 Zultu hna cu an ngaih a chia tuk i “Bawipa, keimah cu ka si lo, lo mei?” tiah pakhat hnu pakhat in an hal.
23 Jesuh nih “Keimah he kheng pakhat chung ah rawl a purmi nih a ka rawi lai.
24 Cathiang ah aa ṭial bantuk in mi Fapa cu a thi ko lai, asinain mi Fapa a rawimi tu cu thil ṭhalo a tong lai! Amah cu hrin rak si hlah seh law a caah a ṭha deuh hnga” tiah a ti.
25 A rawitu ding Judas nih “Saya, keimah cu ka si lo, lo mei?” tiah a hal tikah “A si, nangmah na si” tiah Jesuh nih a leh.
26 An ei lioah Jesuh nih changreu kha a lak i thla a cam, a cheu i a zultu kha a pek hna, “I lak u law ei u. Mah hi ka pum a aiawhmi a si” tiah a ti hna.
27 Cun hrai kha a lak i Pathian sinah lawmhnak bia a chim hnuah a zultu kha a pek hna, “Nan dihlak in ding u,
28 mah nih ka thi kha a aiawh, sualnak ngaihthiam awkah mi tampi caah thletmi ‘biakamnak thisen’ a si.
29 Kaan chimh hna lai, ka Pa Pennak ah nanmah he mitsur zu thar ka din ṭhan lai ni a phanh hlan tiang atu caan thawk in mitsur zu ka ding ti lai lo” tiah a ti hna.
30 A donghnak ah thangṭhatnak hla an sak dih hnuah Oliv Tlang ah an kai.
31 Jesuh nih a zultu hna kha “Cathiang ah ‘Tuukhal kha ka thah lai caah tuurun chung i tuu pawl cu an i ṭhek dih lai’ tiah aa ṭial bantuk in tuzan ah ka ton dingmi thil ruang ah nan ka zamtak lai.
32 Asinain thihnak in ka thawh ṭhan tikah Galili peng ah nan hlanah ka rak kal chung lai” tiah a ti hna.
33 Peter nih “Midang vialte nih an in hlawt hmanh ah kei cu zeitik hmanh ah kaan hlaw bal lai lo” tiah a ti.
34 Jesuh nih “Biatak kaan chimh lai, tuzan ar a khuan hlanah ka hngal lo tiah voithum tiang na ka hlawt lai” tiah a ti.
35 Peter nih “Na sin i ka thih ding a si hmanh ah amah cu ka hngal lo tiah zeitik hmanh ah ka chim bal lai lo” tiah a leh. A dang zultu vialte zong nih cutin an chim ve.
36 Jesuh cu a zultu hna he Gethsemane timi hmun an phanh tikah “Khika i thla ka va cam karah hika ah hin rak ṭhu u” tiah a ti hna.
37 Peter le Zebedi fapa pahnih kha aa kalpi hna, Jesuh cu a ngaih a chia i a lungre a thei tuk.
38 “Ka ngaih a chiat tuknak ah ka thi dengmang cang. Hika ah hin rak um u law keimah he ralring tein hngak ko u” tiah a ti hna.
39 Cun hmailei ah tlawmpal a kal, a bawk i “Ka Pa, a si khawh ahcun hi hrai* hi ka ṭhialpiak ko. Asinain keimah duh ning in si hlah seh, nangmah duh ning in si ko seh” tiah thla a cam.
40 Jesuh cu a zultu pawl sin a rak kir ṭhan tikah an rak i hngilhmi kha a hmuh. Mah tikah Peter kha “Keimah he suimilam pakhat hmanh ralring tein nan hngak kho lo maw?
41 Tukforhnak chung nan tlak nakhnga lo ralring tein hngak u law thlacam zungzal u. Lungthin nih cun a duh taktak ko, asinain taksa cu a der” tiah a ti.
42 A voihnihnak a va kal ṭhan i “Ka Pa, hi hrai hi ka din nakhnga lo ka ṭhialpiak ko. Cutin a si khawh lo ahcun nangmah na duh ning in si ko seh” tiah thla a cam.
43 A kir tikah an mit a ku tuk i an rak i hngilhmi kha a hmuh ṭhan hna.
44 Cucaah a voithumnak a va kal ṭhan i a hmasa bantuk in thla a cam ṭhan.
45 Mah hnuah a zultu pawl sinah a rak kir ṭhan i “Hi bantuk caan ah hin maw lungdai tein nan i hngilh ko! Mi Fapa cu misual mi hna kut ah chanh in rawi a si lainak caan a nai cang.
46 Tho u law kal u sih. A ka rawitu cu a phan cang lai” tiah a ti hna.
47 Cutin a chim lioah lamkaltu 12 lak i Judas kha a rak phan. A sinah tlangbawi upa hna le Judah mi hruaitu hna nih an rak thlahmi mibu cu nam le thingtan i put in an ra ve.
48 Rawitu Judas nih “Ka hnamhmi cu Jesuh a si lai i nan rak tlaih lai” tiah hmelchunhnak a rak pekcia cang hna.
49 A phanh le cangka in Jesuh sinah a kal colh i “Saya, na cung ah daihnak um ko seh!” tiah a ti i a hnamh.
50 Jesuh nih “Ka kawi, zei caah dah na rat?” tiah a ti tikah annih cu hmaiah an rak chuak i Jesuh kha an tlaih.
51 Jesuh sinah a ummi pakhat nih a nam kha aa zuh i tlangbawi ngan sal kha a hnakhaw pet lakin a sah.
52 Mah tikah Jesuh nih “Na nam cu a kawng ah sawh ṭhan ko. Nam a hmangmi cu nam in a thi lai.
53 Atu ah ka Pa sinah vancung ralkapbu 12 leng thlah awkah a hal kho lo tiah maw na ka ruah?
54 Cutin hei hal ning law hi thil hna an hung um lai timi Cathiang bia cu zeitindah a tlin khawh ti lai?” tiah a ti.
55 Cun Jesuh nih “Damiah tlaih bantuk in keimah tlaih awkah nam le thingtan i put in zeicah nan rat? Biakinn ah nifatin cawnpiak in ka ṭhu ko nain nan ka tlaih ṭung lo.
56 A tak ti ahcun hi thil vialte a ummi cu profet chimmi Cathiang bia a tlin nakhnga caah a si” tiah mibu kha a ti hna. Mah tikah zultu dihlak nih Jesuh kha an kaltak i an zam dih.
57 A tlaitu hna nih Jesuh kha tlangbawi ngan Kaiafas sinah an kalpi. Cuka ah phungbia cawnpiaktu pawl le Judah mi hruaitu pawl an rak i pum.
58 Peter nih lam hlat nawn in Jesuh hnu kha a zulh i tlangbawi ngan inntual tiang a va phan. Zeidah a cang lai ti kha hngalh a duh caah inntual i a ummi sinum hna sinah khan a ṭhu ve.
59 Tlangbawi upa hna le Judah Biaceihnak Zungpi* i chungtel dihlak nih Jesuh kha an thah khawh nakhnga a hmaan loin sual a puh khotu ding kha an kawl hna.
60 Lihchimmi tehte tampi an chuak ko nain zeihmanh an hmu lo. A donghnak ah mi pahnih an ra i,
61 “Hi pa nih ‘Pathian biakinn hi ka ṭheh lai i nithum chung ah ka sak ṭhan dih lai’ a ti” tiah an ti.
62 Tlangbawi ngan cu a dir i “Bia leh awk zeihmanh na ngei lo maw? Sual an in puhmi hi zeitindah na leh hna lai?” tiah a hal.
63 Asinain Jesuh cu dai tein a um. Cucaah tlangbawi ngan nih “A nungmi Pathian min chalh in Pathian Fapa Khrih cu na si maw, si lo kan chim tuah!” tiah a hal.
64 Jesuh nih “Na chim ning khan a si ko. Ka chim rih lai: Mi Fapa cu a liannganmi Pathian orhlei kam ah a ṭhutmi le khuadawm lakin a ratmi kha nan hmuh lai” tiah a ti.
65 Mah tikah tlangbawi ngan nih a puan kha a thleh i “Hi pa nih Pathian thangchiat in a chimmi a si! Tehte dang zeihmanh a herh ti lo. Pathian thangchiat in a chimmi cu nan theih ko cu ta.
66 Zeitindah nan ruah?” tiah a hal hna. Annih nih “Thih awkah aa tlak” tiah an leh.
67 Cun Jesuh kha a hmai ah an cil an chak, an thongh, a cheu nih an bengh i,
68 “Khrih na si lo maw? Aho nih dah aan bengh, kan chim tuah?” tiah an ti.
69 Peter cu inntual i a ṭhut lioah salnu pakhat a ra i “Nang zong Galili mi, Jesuh he phukhat nan si!” tiah a ti.
70 An dihlak hmaiah Peter nih “Na chimmi kong hi ka hngal lo” tiah aa pheh.
71 Inntual kutkalei a va kal tikah a dang salnu pakhat nih a hmuh i cuka ah a ummi hna kha “Mah pa khi Nazareth mi, Jesuh he phukhat an si” tiah a ti hna.
72 Peter nih “Mah pa cu ka hngal lo!” tiah chiatserh in aa pheh ṭhan.
73 Mah hnu tlawmpal ah cuka i a dirmi hna cu Peter sinah an ra i “A tak ti ahcun nang zong anmah he phukhat nan si ti kha na awcawi in kan hngalh ko” tiah an ti.
74 Peter cu chiatserh in bia aa kam i “Mah pa cu ka hngal hrimhrim lo!” tiah a ti. Cu caan te ah cun arkhuan thawng kha a theih.
75 “Ar a khuan hlanah ka hngal lo tiah voithum tiang na ka hlawt lai” timi Jesuh bia kha a lung ah a hung pem. Cucaah a leng ah a chuak i fakpi in a ṭap.
Footnotes
^ Biafang Fianternak ah zoh.
^ Pathian serhsattu in sualphawtnak he Jesuh a thih ding Pathian nih nawl a awnhmi kha a chim duhmi a si.
^ Biafang Fianternak ah zoh.
