Matthai 27:1-66
27 Zinglei a phanh tikah tlangbawi upa hna le Judah mi hruaitu hna cu Jesuh thah awkah khua an khang.
2 A kut an khih hnuah an kalpi i Judea ram uktu Pilat sinah an chanh.
3 Rawitu Judas nih Jesuh cu thihdan an pek ti thawng a theih tikah aa ngaichih i ngun tangka 30 kha tlangbawi upa hna le Judah mi hruaitu hna sinah a rak put ṭhan.
4 “Sualnak a ngei lomi thisen kha ka rawi caah ka sual cang” tiah a ti hna tikah annih nih “Mah cu kan zeidah a poi, nangmah tuah in vaa tuah ko!”* tiah an ti.
5 Judas nih mah tangka kha biakinn ah a hlonhtak i a kal, mah hnuah amah tein hri aa awk.
6 Tlangbawi upa hna nih mah tangka kha an char i “Hi tangka hi thisen man a si, biakinn tangka chiahnak ah chiah phung a si lo” tiah an ti.
7 An i ceih hnuah khual vuinak thlanmual caah um sertu lo kha mah tangka in an cawk.
8 Cucaah mah lo cu Thisen Lo tiah nihin ni tiang auh a si.
9 Profet Jeremiah hmang in chimmi mah bia hi a hung tling: “Israel mi nih cu pa man an khiahmi ngun tangka 30 kha an lak i,
10 Jehovah* nih a ka chimh bantuk in um sertu lo kha an cawk.”
11 Pilat nih a hmaiah a dirmi Jesuh kha “Judah Siangpahrang cu na si maw?” tiah a hal tikah Jesuh nih “Na chim ning in a si ko” tiah a leh.
12 Asinain tlangbawi upa hna le Judah mi hruaitu hna nih sual an puh tikah zei bia hmanh a let hna lo.
13 Pilat nih “Hi vialte sual an in puhmi hi na thei lo maw?” tiah a hal tikah,
14 Jesuh nih bia kaakhat hmanh a leh lo caah Pilat cu a khuaruah a har tuk.
15 Lanhtak Puai fatin mi nih chuahter an duhmi thongtla pakhat paoh kha uktu nih a chuahpiak tawn hna.
16 Cu caan ah cun ṭhatlonak lei in a min a thang ngaimi Barabbas timi thongtla pakhat a rak um.
17 Mi pawl an hun i pumh tikah Pilat nih “Ahodah chuahpiak nan duh, Barabbas maw, Khrih tiah auhmi Jesuh dah?” tiah a hal hna.
18 Jesuh kha an nahchuah caah atu bantuk in an chuahpimi a si ti kha Pilat nih a hngalh.
19 Mah leng ah biaceihnak ṭhutdan i a ṭhut lioah a nupi nih “Miding mi mah pa kha zei ti hmanh in rak ti hlah, zan ah amah kha mang ka manh, mah mang ruang ah ka ṭih tuk” tiah bia a rak cah.
20 A tak ti ahcun tlangbawi upa hna le Judah mi hruaitu hna nih Barabbas kha thlahpiak in Jesuh kha thah awkah hal ding in mibu kha an rak lem hna.
21 Pilat nih “Hi hna pahnih ah hin ahodah thlahpiak nan duh?” tiah a hal hna tikah annih nih “Barabbas” tiah an ti.
22 A si ahcun “Khrih tiah auhmi Jesuh hi zeitindah ka tuah lai?” tiah a hal hna tikah an dihlak in “Tung cung ah thlai ko!” tiah an leh.
23 Pilat nih “Zei ruang ah? Zei sualnak dah a tuah?” tiah a hal ṭhan hna tikah annih cu fak chinchin in “Tung cung ah thlai ko!” tiah an au.
24 Pilat nih zeihmanh aa hlei ti lo, hnahnawhnak tu a chuak chinchin ti kha a hmuh tikah ti kha aa lak i mibu hmaiah a kut aa ṭawl, cun “Hi mipa thisen in ka thiang, nanmah nan tuahmi a si” tiah a ti hna.
25 An dihlak in “A si ko, hi mipa thisen chuah mawhnak cu kanmah le kan tefa cung ah tla ko seh” an ti.
26 Mah tikah Pilat nih Barabbas kha a thlahpiak hna, asinain Jesuh kha cu hrihrual in a tukter hna i thing cung ah thlai in thah awkah a pek hna.
27 Mah hnuah ralkap pawl nih Jesuh kha uktu inn ah an kalpi i ralkapbu dihlak nih an kulh.
28 A hnipuan kha an phoih i puan sendung an aih.
29 Hling in bawiluchin an ser i an chinh, a orhlei kut ah phaikung kha an putter, cun a hmaiah an khuk an i bil i “Judah Siangpahrang, i lawm ko!” tiah an cawhdeh.
30 An cil an chak i a lu kha phaikung in an tuk.
31 Cutin an cawhdeh hnuah a puan kha an phoih i amah hnipuan kha an hrukter ṭhan. Cun thing cung ah thlai in thir khenh awkah an kalpi.
32 An kal lioah Sairin khuami Simon kha an ton i Jesuh an thlainak ding thingtung kha hramhram in an putter.
33 Gol′go·tha timi Luruh Hmun an phanh tikah,
34 Jesuh cu siikha he cawhmi mitsur zu kha din awkah an pek, a teh tikah a ding duh lo.
35 Mah hnuah Jesuh kha thingtung cung ah an thlai i thir in an khenh, a hnipuan kha camcawhfung zuh in an i ṭhen.
36 Cuka ah an ṭhu i Jesuh kha an cawngh.
37 A lu cung ah “Judah mi hna Siangpahrang Jesuh” timi sual an puhnak bia kha an ṭial i an taar.
38 Mah hnuah damiah pahnih kha Jesuh orhlei ah pakhat, kehlei ah pakhat thingtung cung ah an thlai ve hna.
39 Aa chawkmi paoh nih Jesuh kha an serhsat, an lu an thin hnawh i,
40 “Biakinn kha ṭheh in nithum hnuah a sa ṭhan hnga dingmi pa, nangmahle nangmah cu i khamh ngat! Pathian fapa na si ahcun thingtung cung in ṭum ngat” tiah an ti.
41 Cu bantuk in tlangbawi upa hna, phungbia cawnpiaktu hna le Judah mi hruaitu hna zong nih Jesuh kha an nihsawh i,
42 “Midang cu a khamh khawh ko hna; amahle amah tu cu aa khamh kho lo! Anih cu Israel Siangpahrang pei a si cu; tung cung in atu hi ṭum tuah seh law kan zumh ko hnga.
43 Pathian pei aa bochan cu; ‘Pathian Fapa ka si’ tiah a ti caah Pathian nih a duh ahcun khamh ko seh” tiah an serhsat.
44 A pawng ah an thlaimi damiah hna hmanh nih Jesuh kha cutin an serhsat ve.
45 Chun suimilam 12* in zanlei suimilam 3* tiang ram chung dihlak ah muihnak a tlung.
46 Zanlei suimilam 3 hrawng ah Jesuh cu “E′li, E′li, la′ma sa·bach·tha′ni?” tiah fakpi in a au. A sullam cu “Ka Pathian, ka Pathian, zeicahdah na ka kaltak?” tinak a si.
47 Mah kha an theih tikah cuka ah a dirmi mi cheukhat nih “Elijah pei a auh hi” tiah an ti.
48 An lak i pakhat cu a va tli i puanchia kha aa lak i zuthor chung ah a hnim, cun phaikung par ah a ṭem i Jesuh kha a dinter.
49 Asinain a dang nih cun, “Um rih! Elijah nih a rak khamh le khamh lo zoh rih u sih” tiah an ti.
50 Jesuh cu thangpi in a au ṭhan i a thaw a cat.
51 Mah lioah biakinn puanzar cu a lu in a taw tiang aa cheu, li aa hnin i lungpipi cu an kak dih.
52 Thlan kha an i hung i a thi cangmi mithiang mi hna i an ruak pawl a rak langhmi kha,
53 mi tampi nih an hmuh. (Jesuh a thawh ṭhan hnuah mi cheukhat cu thlan karlak in an rak chuak i a thiangmi khua chung ah an lut.)
54 Jesuh a cawngmi ralbawi le a sinah a ummi hna nih li aa hninhmi le a cangmi thil hna kha an hmuh tikah an ṭih tuk i “Mah pa hi Pathian Fapa a si hrimhrim” tiah an ti.
55 Jesuh bultawl awkah Galili ram in a rak zul tawnmi nu tampi nih lam hlatpi in an zoh.
56 Cu hna lakah Mary Magdalin, Jeim le Joses i an nu Mary le Zebedi nupi zong an i tel.
57 Zanlei sang a hun phanh tikah Arimathea khuami mirum pa Josef timi cu a ra, amah zong Jesuh zultu a si ve.
58 Pilat sinah a kal i Jesuh ruak kha a hal. Pilat nih nawl a awnh caah,
59 Josef nih ruak kha a kalpi i puan hmangṭhia a thiangmi tein a zual.
60 Mah hnuah lungkua ah khorhmi amah thlan tharte ah a vui, cun lung nganpi kha a hrilh i thlan kha a khar i a kal.
61 Mary Magdalin le a dang Mary pakhat cu thlan hmaiah khan an ṭhu i an taangta.
62 A thaizing Sabbath ni* ah tlangbawi upa hna le Farasi mi hna cu Pilat hmaiah an i pum i,
63 “Bawipa, mah lihchimpa nih a thih hlanah ‘Nithum hnuah ka nung ṭhan lai’ tiah a timi kha kan i cinken.
64 Cucaah thlan kha nithum tiang cawngh awkah nawl pe hna, cutin a si lo ahcun a zultu pawl nih a ruak kha an fir lai i ‘Thihnak in a tho ṭhan cang!’ tiah an ti lai. Cutin a si ahcun a hmanung hlennak cu a hmasa hlennak nakin a zual deuh lai” tiah an ti.
65 Mah tikah Pilat nih “Ralvengtu pawl an um ko cu ta, a si khawh chung in va cawnghter hna u” tiah nawl a pek hna.
66 Cucaah an kal i thlan lung kha ca an khenh i a cawngtu pawl an chiah hna.
Footnotes
^ Asiloah “Mah cu nangmah pumpak buaibainak a si!”
^ Biafang Fianternak ah zoh.
^ A hrampi, “nichuah hnu suimilam 6.”
^ A hrampi, “nichuah hnu suimilam 9.”
^ A hrampi, “Timhtuahnak ni a dih hnu.”
