Matthai 3:1-17
3 Cu caan ah cun Tipil Petu Johan cu Judea ram, ramcar ah a ra i,
2 “I ngaichih u, vancung Pennak cu a nai cang” tiah phung a chim.
3 Johan he aa tlaiin Profet Isaiah nih “‘Jehovah* lam cu sialpiak tuah u! A lam a tluan nakhnga sialpiak tuah u’ tiah ramcar ah mipa pakhat cu a au” tiin a rak chim bal.
4 Johan cu kalauk hmul in tahmi hnipuan kha aa hruk i saphaw taisawm kha aa sawmh. Khaubawk le ramlak khuaihliti kha a ei tawn.
5 Jerusalem khua in, Judea ram khuazakip in le Jordan tiva pawngkam dihlak in mi pawl cu a sin i an rat tikah,
6 an sualnak kha an i phuang i Johan nih Jordan Tiva ah tipil* a pek hna.
7 Johan nih tipil peknak hmun ah Farasi mi le Sadusi mi pawl an ratmi kha a hmuh tikah, “Rul tefa hna, a ra laimi thinhunnak in nan zam awk a si tiah aho nih dah ralrin aan pek hna?
8 Nan i ngaihchih taktak ahcun nan tuahsernak in langhter ngat u.
9 ‘Kannih cu Abraham tefa kan si’ tiin i porhlaw hlah u. Kaan chimh hna lai, Pathian nih hi lung hna hmanh hi Abraham tefa ah a ser khawh ko hna.
10 Hreitlung cu thingkung hram ah a um cang. Thei ṭha a tlai lomi kung paoh cu hau an si lai i mei ah paih an si lai.
11 Kei nih cun nan langhtermi ngaihchihnak ruang ah ti in tipil kaan pek hna. Asinain ka hnu in a ra dingmi cu keimah nakin a ngan deuh. A phanat phoihtu ding hmanh ah kaa tlak lo. Anih nih cun thiang thlarau le mei in tipilnak aan pek hna lai.
12 A kut ah facang zahnak cawhlek kha aa put i facang cilnak hmun kha a thianh cang lai. A fang cu buk ah a rawn hna lai. A hi kha cu a mit kho lomi mei in a khangh hna lai” tiah a ti.
13 Jesuh cu Johan sinah tipil in ding in Galili ram in Jordan tiva ah a rak phan.
14 Asinain Johan nih cun a rak al i, “Keimah sinah ma tipil in ding in na rat? Keimah tu pei nangmah sinah tipil in awk ka si cu” tiah a ti.
15 Jesuh nih “Atu cu hitihin si ko seh. Pathian nih tuahter a kan duhmi paoh cu kan tuah awk a si ko” tiah a leh. Cucaah Johan cu a hna a tla ve.
16 Jesuh cu tipil a ing i ti chung in a chuahle cangka van cu aa hung. Pathian thlarau cu ṭhuro bantuk in a rung zuang i Jesuh cung ah aa futmi kha a hmuh.
17 Cun vancung in aw pakhat a thang i “Amah hi ka dawtmi ka Fapa a si, a cung ah ka lung a tling” tiah a ti.
