Matthai 5:1-48
-
TLANG CUNG CAWNPIAKNAK (1-48)
5 Jesuh nih mibu kha a hmuh hna tikah tlang cung ah a kai i a ṭhu, mah hnuah a zultu hna cu a sinah an ra.
2 Cun hitin a cawnpiak hna:
3 “Pathian i bochan ka herh ti aa hngalmi* cu lunglawmmi an si, vancung Pennak cu anmah ta a si lai.
4 “A ṭap a hrammi cu lunglawmmi an si, hnemhnak an hmu lai.
5 “A lung a nemmi cu lunglawmmi an si, vawlei ro kha an co lai.
6 “Dinnak tuah a duh taktakmi* cu lunglawmmi an si, an duhnak a tling lai.
7 “Zaangfah a hmangmi cu lunglawmmi an si, zaangfahnak an hmu ve lai.
8 “Lungthin a thiangmi cu lunglawmmi an si, Pathian kha an hmuh lai.
9 “Daihnak a sertu cu lunglawmmi an si, Pathian fale* tiah auh an si lai.
10 “Dinnak ruang ah hremnak a ingmi cu lunglawmmi an si, vancung Pennak cu anmah ta a si lai.
11 “Keimah ruang ah nihsawhnak le hremnak nan in i lih a phunphun an in puh hna tikah lunglawmmi nan si.
12 Vancung ah nan hmuh dingmi laksawng cu a ngan tuk caah lunglawm thanuam tein um ko u. A hlan i profet hna zong cuticun an rak hrem hna.
13 “Nannih cu vawlei cite nan si. Asinain cite cu a alnak a tlau ahcun alter ṭhan khawh a si ti maw? A leng ah hlonh in lamh awk men dah ti lo cu zei ca hmanh ah san a tlai ti lo.
14 “Nannih cu vawlei ceunak nan si. Tlangpar ah tlakmi khua cu zeihmanh nih a phen kho lo.
15 Mi nih mei an van tikah kho in an khuh bal lo. Mei vannak ah an chiah i innchung dihlak kha a ceuh.
16 Cu bantuk in nan ceunak kha mi hmaiah ceuter u. Mah lawng ah midang nih thilṭha nan tuahmi kha an hmuh lai i vancung nan Pa kha an thangṭhat lai.
17 “Nawlbia le Profet bia hna hrawh awkah a ra tiah ka ruat hlah u. Hrawh awkah si loin tlinter awk tu ah ka ra.
18 Biatak kaan chimh hna, van le vawlei cu a tlau zong a tlau kho men. Asinain Nawlbia chung i aa telmi cafang pakhat, a deh pakhat te hmanh a tlau lai lo. Cuka i aa ṭialmi vialte cu a tling dih lai.
19 Cucaah nawlbia lak i a hme bik hmanh a buar i midang zong cutin tuah awkah a cawnpiakmi cu vancung Pennak chung luh awkah aa tlak lo.* Asinain mah nawlbia hna ning in a zul i mi a cawnpiakmi cu vancung Pennak chung luh awkah aa tlak.*
20 Kaan chimh hna lai, phungbia cawnpiaktu le Farasi mi hna nakin nan din deuh lo ahcun vancung Pennak ah zeitin hmanh in nan lut kho lai lo.
21 “‘Lai va nawng hlah, lai a nawngmi paoh cu biaceih an si lai’ timi hlanlio mi hna bia kha nan theih.
22 Kaan chimh hna lai, a unau cung ah a thin a hung pengmi cu biaceihnak zung ah chuahpi a si lai. A unau a serhsatmi paoh cu Biaceihnak Zungpi ah chuahpi a si lai. A unau kha ‘Mihrut’ tiah a timi paoh cu a alh thluahmahmi Gehenna* ah a phan lai.
23 “Biakṭheng ah laksawng pekchanh ding in na rat tikah na cung ah lungsi lonak a ngeimi na unau pakhatkhat an um ti na hngalh ahcun,
24 na laksawng kha biakṭheng hmaiah chia ta. Cun na unau sinah va kal law amah he remnak va ser hmasa. Mah hnuah ra ṭhan law na laksawng kha pe.
25 “Taza aan cuaitu he nan kal pah in lam ah remnak ser colh. Cutin a si lo ahcun biaceihtu sinah aan chanh lai. Biaceihtu nih thongbawi sinah aan chanh chin lai i thong thlak na si lai.
26 Biatak kaan chimh hna, tangka* pharkhat hmanh taang loin na liam dih hlan chung paoh cu thonginn in na chuak lai lo.
27 “‘Va zuangzam hlah’ timi bia kha nan theih.
28 Asinain kaan chimh hna lai, nu pakhat kha sual duhnak lungthin he a zohmi cu mah nu cung ah a lungchung in sualnak a tuahmi a si.
29 Na orhlei mit nih sualnak aan tuahter ahcun khoih law hlonh ko. Gehenna* ah na pum dihlak tlak nakin cun na pum cheubang pakhat sungh cu a ṭha deuh.
30 Na orhlei kut nih sualnak aan tuahter ahcun tan law hlonh ko. Gehenna* ah na pum dihlak tlak nakin cun na pum cheubang pakhat sungh cu a ṭha deuh.
31 “Cu leng ah ‘nupi a mami paoh nih maknak ca pe seh’ tiah an ti tawn.
32 Asinain kaan chimh hna lai, nupa sualnak* ruang ah si loin thil dang ruang ah a mak ahcun a nupi kha a zuangzammi a siter. Cun makmi nu a ṭhitu zong a zuangzammi a si.
33 “‘Na tuah khawh lomi thil caah chiatserh in bia i kam hlah. Jehovah* sinah biakamnak na tuah ahcun mah ning in na tuah awk a si’ timi hlanlio mi hna bia zong nan theih.
34 Asinain kaan chimh hna lai, chiatser in bia i kam hrimhrim hlah u. Van chalh in chiatser hlah u, van cu Pathian bawiṭhutdan a si.
35 Vawlei chalh zong in chiatser hlah u, vawlei cu Pathian ke chiahnak a si. Jerusalem chalh zong in chiatser hlah u, a liannganmi Siangpahrang khuapi a si.
36 Nan lu chalh in chiatser hlah u, nan sam fakhat hmanh nan raanter kho lo i nan nahter kho lo.
37 Cucaah a simi kha ‘A si,’ a si lomi kha ‘A si lo’ ti lawng chim ko u. Mah leng cu miṭhalo pa sinin a rami a si.
38 “‘Mit caah mit, ha caah ha’ timi bia kha nan theih.
39 Asinain kaan chimh hna lai, miṭhalo kha va ralchanh hna hlah u, pakhatkhat nih nan orhlei biang ah an in bengh hna ahcun nan kehlei biang zong chit rih hna u.
40 Mi pakhat nih nan angki chung lak duh ah biaceihnak zung ah aan chuahpi hna ahcun nan angki leng zong va pe chih u.
41 Nawlngeitu pakhat nih hramhram in rianṭuanter awkah meng khat aan kalpi hna ahcun meng hnih in va zul u.
42 Aan haltu kha pe hna u, aan cawitu kha al loin cawih* hna u.
43 “‘Na innpa kha daw hna law na ral kha hua hna’ timi bia kha nan theih.
44 Asinain kaan chimh hna lai, nan ral kha daw peng hna u law aan hremtu hna caah thla va campiak peng hna u.
45 Cuticun vancung khua ah a ummi nan Pa fale nan si kha nan langhter a si lai. Anih cu miṭha he, miṭhalo he an cung ah ni kha a tlanter i miding he, midinglo he an cung ah ruah a surter.
46 Aan dawtu lawng nan dawt hna ahcun zei laksawng dah nan hmuh lai? Mah cu ngunkhuai kholtu hna zong nih an tuahmi a si ko lo maw?
47 Nan unau lawng nan biakchawnh hna ahcun zeidah aa hlei lai? Mah cu miphun dang zong nih an tuahmi a si ve ko lo maw?
48 Vancung nan Pa a tlin bantuk in nannih zong nan tlin ve awk a si.
Footnotes
^ Asiloah “thlaraulei ah mi chambau ka si ti aa hngalmi.”
^ A hrampi, “dinnak caah a ṭamhalmi.”
^ A hrampi, “fapale.”
^ A hrampi, “vancung Pennak ah ‘a hme bik’ ti a si lai.”
^ A hrampi, “vancung Pennak ah ‘mingan’ ti a si lai.”
^ Biafang Fianternak ah zoh.
^ A hrampi, “‘quadran,’ mah cu a man a tlawm tukmi tangka phar a si.”
^ Biafang Fianternak ah zoh.
^ Biafang Fianternak ah zoh.
^ Greek, por·nei′a. Biafang Fianternak ah zoh.
^ Biafang Fianternak ah zoh.
^ Mah cu a karh la loin cawih kha a si.
