Matthai 6:1-34
6 “A dingmi thil kha mi nih ka hmu hna seh tiin mi hmaiah nan tuah nakhnga lo i ralring u. Cutin nan tuah ahcun vancung khua ah a ummi nan Pa sinin zei laksawng hmanh nan hmu lai lo.
2 Cucaah mi thil nan ṭhenh* hna tikah mi depde nih an tuah bantuk in va tuah ve hlah u. Annih cu mi nih kan thangṭhat hna seh ti duh ah zapi hmai pumhnak inn le lam ah muko tum bantuk in an tuah. Biatak kaan chimh hna, annih cu an laksawng kha tling tein an hmuh cang.
3 Asinain nannih cu mi thil nan ṭhenh hna tikah nan orhlei kut nih a tuahmi kha nan kehlei kut nih hngal hlah seh.
4 A thli tein va pe ṭhen hna u. Cutin nan tuah ahcun a thli tein nan tuahmi thil a hmutu nan Pa nih laksawng aan pek hna lai.
5 “Thla nan cam tikah mi depde nih an cam bantuk in cam ve hlah u. Annih cu mi nih kan hmu hna seh tiin pumhnak inn le lamtonnak hna ah dir in thla an cam tawn. Biatak kaan chimh hna, annih cu an laksawng kha tling tein an hmuh cang.
6 Nannih cu thla nan cam tikah nan inn khaan chung ah va lut u law innka vaa khar khumh u. Cun hmuh khawh lonak hmun ah a ummi nan Pa sinah thla va cam u. Cutin nan tuah ahcun a thli tein nan tuahmi thil a hmutu nan Pa nih laksawng aan pek hna lai.
7 Thla nan cam tikah miphun dang hna bantuk in a konglam pakhat lawng kha atu le atu nolh ṭhan hlah u. Annih nih cun kan thlacam a sau ahcun Pathian nih a kan ngaihpiak lai tiah an ruah.
8 Anmah bantuk in cam ve hlah u, nan Pa nih cun nan herhmi kha nan hal hlan hmanh in a hngalh cang.
9 “Hitihin thla nan cam awk a si:
“‘Vancung khua i a ummi kan Pa, na min cu thianter si ko seh.
10 Na Pennak tlung ko seh. Vancung ah na duhnak a tlin bantuk in vawleicung zong ah tling ve ko seh.
11 Nihin caah kan herhmi rawl kha rak kan pe ko.
12 Midang sualnak* kan ngaihthiam hna bantuk in kan sualnak* zong rak kan ngaithiam ve.
13 Tukforhnak ah kan tlak nakhnga lo rak kan bawm law miṭhalo pa kut in rak kan khamh ko.’
14 “Midang sualnak nan ngaihthiam hna ahcun vancung nan Pa zong nih nan sualnak kha aan ngaihthiam ve hna lai.
15 Midang sualnak nan ngaihthiam hna lo ahcun nan Pa zong nih nan sualnak kha aan ngaithiam ve hna lai lo.
16 “Rawl nan ulh tikah mi depde pawl bantuk in hmai phiah loin va um hlah u. Annih cu rawl an ulhmi kha mi nih kan hngal hna seh tiin uai fiamfuam in an um tawn. Biatak kaan chimh hna, annih cu an laksawng kha tling tein an hmuh cang.
17 Nannih cu rawl nan ulh tikah nan hmai i phiah u law nan lu ah chiti i thuh u.
18 Cuticun rawl nan ulhmi kha midang nih an hngal lai lo i hmuh khawh lonak hmun ah a ummi nan Pa lawng nih a hngalh lai. Cun a thli tein nan tuahmi thil a hmutu nan Pa nih laksawng aan pek hna lai.
19 “Rungrul le cirik nih an ei khawh i mifir nih an fir khawhnak vawlei ah nan chaw va khong ti hlah u.
20 Rungrul le cirik nih an ei khawh lonak, mifir nih an fir khawh lonak vancung tu ah nan chaw va khong u.
21 Zeicahtiah nan chaw a umnak hmun ah nan lungthin zong a um ve lai.
22 “Mit cu pum caah meiinn a si. Nan mit a fim ahcun nan pum dihlak ceunak in a khat lai.
23 Asinain nahchuahnak lungput he nan zoh ahcun* nan pum dihlak cu muihnak in a khat lai. Nan ceunak a muih ahcun muihnak taktak a si lai.
24 “Ahohmanh bawi pahnih sal an si kho lo. Pakhat kha a dawt deuh lai i pakhat kha a huat deuh ko lai. Pakhat cung ah zumhawktlak in a um lai i pakhat kha cu zei ah a rel lai lo. Nannih zong voikhat te ah Pathian le Chawva sal nan si kho lai lo.
25 “Cucaah kaan chimh hna lai, nan nunnak caah zeidah kan ei lai, zeidah kan din lai asiloah nan pum caah zeidah kan i hruk lai tiin nan thinphang ti hlah u. Rawl nakin nunnak a biapi deuh i hnipuan nakin pum a biapi deuh lo maw?
26 Van i a zuangmi va khi zoh hmanh hna u. Annih cu thlaici an tuh bal lo, rawl an ṭuan bal lo i buk zong ah an rawng bal lo. Asinain vancung nan Pa nih a zohkhenh ko hna. Nannih cu va nakin nan sunglawi deuh lo maw?
27 Nan lungretheihnak nih nan nunnak kha chikkhat* te hmanh a sauter kho deuh maw?
28 Cun hnipuan caah zeicah nan lungre a theih? Ramlak lily pangpar an ṭhan ning khi ṭha tein zoh hmanh u. Rian an ṭuan lo i la zong an thlur lo.
29 Asinain kaan chimh hna lai, siangpahrang Solomon hmanh lily pangpar tluk in aa dawhmi hnipuan a ngei lo.
30 Zumhnak a dermi hna, nihin ah a nung i thaizing ah mei an khangh dingmi ramkung hmanh Pathian nih cutin a thuamh hna ah cun nannih chinchin cu aan thuamh chinchin hna lai a si ko lo maw?
31 Cucaah ‘Zeidah kan ei lai, zeidah kan din lai, zeidah kan i hruk lai,’ tiin zeitik hmanh ah nan lungrethei hlah u.
32 Mah thil hna cu miphun dang* hna nih fakpi in an kawl tawnmi a si. Vancung nan Pa nih mah thil vialte nan herh ti kha a hngalh ko.
33 “Cucaah Pathian Pennak le a dinnak kha biapi bik ah chia zungzal u. Cun thil dang vialte zong pek nan si lai.
34 Thaizing caah nan lungrethei hlah u. Thaizing caah cun a dang lungretheihnak a um ve ko lai. Nihin nan tonmi harnak lawng kha ruat ko u.
Footnotes
^ Asiloah “misifak thil ṭhenh.” Biafang Fianternak ah zoh.
^ A hrampi, “lei a kan batu.”
^ A hrampi, “leiba.”
^ Asiloah “a ṭhalomi thil kha lungthin pek in nan zoh ahcun.”
^ Asiloah “dong khat.”
^ Mah cu Pathian a bia lomi kha an si.
