Matthai 7:1-29
7 “Soi na si nakhnga lo midang kha va soi ve hna hlah;
2 midang na soi hna ning in soi na si ve lai i midang na tah hna ning in tah na si ve lai.
3 Na mit chung ah a ummi thingtan hmanh kha zoh loin na unau mit chung i a ummi hnawm hmete kha zeicah na zoh?
4 Na mit chung ah thingtan a um ko buin na unau cu ‘Na mit chung i hnawm kha in chuahpiak ning’ tiah zeitindah na ti khawh lai?
5 Mi depde hna, nan mit chung i thingtan kha chuah hmasa u, cun fiang tein nan hmuh khawh lai i nan unau mit chung i hnawm hmete kha nan chuah khawh lai.
6 “Uico kha a thiangmi thil pe hlah u, vok hmai zong ah lungvar thla hlah u. An ke in an lamh lai i nanmah tu kha an in seh ṭhan hna lai.
7 “Hal peng u law pek nan si lai; kawl peng u law nan hmuh lai; king peng u law hunpiak nan si lai;
8 a halmi paoh cu pek an si lai, a kawlmi paoh nih an hmuh lai i a kingmi paoh cu innka hunpiak an si lai.
9 Na fapa nih changreu aan hal tikah lung na pe lai maw?
10 Nga aan hal tikah rul na pe lai maw?
11 Nannih miṭhalo hmanh nih nan fale kha thilṭha nan pek hna ahcun vancung nan Pa nih a halmi hna kha thilṭha a pek chinchin hna lai!
12 “Cucaah mi nih kan cung ah tuah hna seh ti nan duhmi ning in midang cung ah va tuah ve u. Mah cu Nawlbia le Profet bia* hna i a hrampi a si.
13 “Kutka bi chung in lut u, rawhralnak ah a phanmi kutka cu a kau i a lam zong a fawi caah a lutmi an tam.
14 Nunnak ah a phanmi kutka cu a bi i a lam zong a har caah mi tlawmte lawng nih an hmuh.
15 “Profet deu kha i ralring hna u, nan sin an rat tikah tuu bantuk in an i umter. Asinain an chunglei cu cenghngia hrang bantuk an si.
16 Annih cu an theitlai* in nan hngalh ko hna lai. Theihmung kung in mitsur a tlai bal lo i saihmurhling kung in theipi a tlai bal lo.
17 Cu bantuk in a ṭhami kung in thei ṭha a tlai tawn i a ṭhalomi kung in thei ṭhalo a tlai tawn.
18 A ṭhami kung in thei ṭhalo a tlai kho lo i a ṭhalomi kung in thei ṭha a tlai kho lo.
19 Thei ṭha a tlai lomi kung paoh cu hau an si i mei ah paih an si tawn.
20 Cucaah an theitlai in nan thleidan khawh ko hna lai.
21 “‘Bawipa, Bawipa,’ tiah a ka aumi paoh in vancung Pennak ah an lut lai lo. Vancung ah a ummi ka Pa duhnak a tuahmi lawng an lut lai.
22 Cu ni ah mi tampi nih ‘Bawipa, Bawipa, na min in profet bia kan chim, khuachia kan ṭhawl i khuaruahhar thil tampi kan tuah lo maw?’ tiah an ka ti lai.
23 Mah tikah ‘Nannih miṭhalo hna, kaan hngal bal hna lo, ka hmaika hin chuak tuah u’ tiah ka ti hna lai.
24 “Cucaah ka chimmi mah bia hi a thei i a zulmi cu lung cung ah inn a sami mifim pa bantuk a si.
25 Ruah fakpi in a sur, ti a lian i thli fakpi in a hran tikah mah inn cu a pur lo, zeicahtiah lung cung ah sakmi inn a si caah a si.
26 Hi ka chimmi bia hi a thei nain a zul lomi cu thetse cung ah inn a sami mihrut pa bantuk a si.
27 Ruah fakpi in a sur, ti a lian i thli fakpi in a hran tikah mah inn cu a pur i a rawk dih cikcek.”
28 Cutin a chim dih hnuah mibu cu Jesuh a cawnpiak ning ruang ah an khuaruah a har tuk.
29 Zeicahtiah Jesuh nih phungbia cawnpiaktu hna bantuk si loin nawlngeitu bantuk in a cawnpiak hna caah a si.
Footnotes
^ ‘Nawlbia le Profet bia’ timi cu Hebru Cathiang dihlak kha a chim duhmi a si.
^ Asiloah “tuahsernak.”
