Matthai 8:1-34
8 Jesuh cu tlang cung in a rung ṭum tikah mibupi nih an rak zulh.
2 Mah tikah mithinghmui pa pakhat a ra i a hmaiah khukbil in a kun, cun “Bawipa, na duh ahcun na ka thianter khawh” tiah a nawl.
3 Jesuh nih a hei banh i a tawngh, cun “Ka duh! Thiang ko” tiah a ti. Chikkhat te ah a thinghmui zawtnak cu a dam i a thiang.
4 Cun Jesuh nih “Mah kong hi ahohmanh va chim hna hlah. Na zawtnak a thiang cang ti langhternak ah tlangbawi sinah va kal law vaa i hmuhsak, Moses lamhruainak ning in raithawinak va tuah” tiah a ti.
5 Jesuh cu Kapernaum khua i a luh tikah ralbawi pakhat a sinah a ra i,
6 “Saya, ka sinum pa cu a zeng i inn ah a ril ko. A zawtnak cu a zual ngaingai ko” tiah a nawl.
7 Jesuh nih “Ka ra lai i ka damter lai” tiah a ti.
8 Ralbawi pa nih, “Saya, ka inn ah rat ding in nangmah sawm awkah kaa tlak lo, dam seh tiah na tinak men in ka sinum pa cu a dam ko lai.
9 Kei zong cunglei bawi ka ngeih bantuk in ka kut tang ah a ummi ralkap zong an um. Pakhat cu ‘Kal’ ka ti ahcun a kal i a dang pakhat cu ‘Ra’ ka ti ahcun a ra, cun ka sal cu ‘Hihi tuah’ ka ti ahcun a tuah ko” tiah a leh.
10 Mah bia cu Jesuh nih a theih tikah a khuaruah a har tuk i a zultu hna kha hitin a ti hna: “Biatak kaan chimh hna, hi tluk in a zumhnak a fekmi hi Israel mi lakah ka hmu bal hna lo.
11 Hihi kaan chimh hna, nichuahlei le nitlaklei in mi tampi an ra lai i, vancung Pennak ah Abraham, Isak, Jakob he hmunkhat ah an ṭhu lai i rawl an dumṭi lai.
12 Pennak chung luh awkah Pathian nih a sawmmi hna tu cu khua leng muihnak ah hlonh an si lai. Cuka ah an ṭap lai i an hacang an rial lai.”
13 Cun Jesuh nih ralbawi pa cu “Inn ah va ṭin law na zumhnak ning in si ko seh” tiah a ti. Mah caan te ah cun ralbawi pa i a sinum cu a rak dam.
14 Jesuh cu Peter inn i a va kal tikah Peter a nupi i a nu cu a zaw i ihkhun cung ah a rak ril ko.
15 Jesuh nih a kut kha a vun tawngh tikah a tak linh cu a dai. Cun a tho i Jesuh kha a bultawl.
16 Zanlei sang ah khuachia nih a tuahmi tampi kha an ratpi hna tikah Jesuh nih a bia kaa khat in khuachia kha a ṭhawl hna. Cun a zawmi vialte kha a damter hna.
17 Cucaah “Amah nih kan damlonak kha a lak, kan zawtnak kha a phorh” tiah profet Isaiah hmang in Pathian chimmi bia cu a hung tling.
18 Jesuh nih a pawngkam i a ummi mibupi kha a hmuh hna tikah a zultu hna kha “Rili khattalei ral ah kal hna u sih” tiah a ti hna.
19 Mah tikah phungbia cawnpiaktu pakhat a ra i “Saya, na kalnak kip ah kaan zulh lai” tiah a ti.
20 Jesuh nih “Cenghngia nih kua an ngei, va nih bu an ngei, asinain mi Fapa cu riahnak hmun hmanh a ngei lo” tiah a ti.
21 A dang a zultu pakhat nih “Bawipa, ka pa ruak kha va vui hmasa ta ning” tiah a ti.
22 Jesuh nih “Rak ka zul peng ko, mithi nih an mithi cu rak vui ko hna seh” tiah a leh.
23 Mah hnuah Jesuh cu lawng chung ah a lut i a zultu zong nih an zulh.
24 Tlawmpal ah thlichia a hrang ciammam i tilet nih lawng cu a phum dengmang, asinain Jesuh cu aa hngilh.
25 A zultu hna nih an va ṭhangh i “Bawipa, kan khamh ko, kan thi dih cang lai hih!” tiah an ti.
26 Jesuh nih “Zumhnak a dermi hna, zeicah mah tluk cun nan ṭih?” tiah a ti hna i a tho. Cun thli le tilet kha nawl a pek hna i dai zirziar in an um ṭhan.
27 An dihlak in an khuaruah a har tuk i “Hi pa hi zei bantuk minung dah a si? Thli le tilet hmanh nih a bia an ngaih” tiah an ti.
28 Rili khattalei ral, Gadarin ram a phanh tikah khuachia nih a tuahmi pahnih cu thlankua chung in an rak chuak i Jesuh kha an rak ton. Annih cu ṭih an nun tuk caah mah lam ah ahohmanh an kal ngam lo.
29 Annih nih “Pathian Fapa, zeidah na kan duhnak a um? A caan a phanh hlanah kanmah dantat awkah maw hika ah na rat?” tiah an au.
30 Cuka in aa hlat lonak hmun ah vokrun runkhat an tlong.
31 Khuachia nih cun “Na kan ṭhawl ding a si ahcun khi vokrun chung tal ah khin kan luhter” tiah an nawl.
32 Jesuh nih “Va kal u” tiah nawl a pek hna tikah khuachia cu an chuak i vokrun chung ah an lut. Cucaah vok cu an run ning in lungpang* in an zuang. Rili chung ah an tla i an thi dih.
33 Vok a cawngtu hna cu khua chung ah an va tli i khuachia nih a tuahmi hna kong le a cangmi thil vialte kong kha an va chimh hna.
34 Mah tikah an khuapi ning in Jesuh ton awkah an ra i an ram in chuah awkah an nawl.
Footnotes
^ Asiloah “chengpalang.”
