Matthai 9:1-38
9 Jesuh cu lawng in tiva ral lei ah a rak kir ṭhan i amah khua kha a phan.
2 Mah tikah a zengmi pa pakhat kha laang in an rak zawnh. An zumhnak kha a hmuh tikah Jesuh nih a zengmi pa kha “Ka fapa, na thinphang hlah! Na sualnak cu ngaihthiam na si cang” tiah a ti.
3 Phungbia cawnpiaktu cheukhat nih “Hi pa hi Pathian serhsat in bia a chim” tiah an ruah.
4 Jesuh nih an ruahnak kha a hngalh i “Zeicah thil ṭhalo cu nan ruah?
5 ‘Na sualnak cu ngaihthiam na si cang’ ti maw a fawi deuh, ‘Tho law kal tuah’ ti dah a fawi deuh?
6 Mi Fapa cu hi vawlei ah sualnak ngaihthiam khawhnak nawl a ngei ti kha kaan hngalhter hna lai” a ti. Cun mizeng pa kha “Tho law laang kha i put law inn ah va ṭin” tiah a ti.
7 Mah pa cu a tho i inn ah a ṭin.
8 Cucu mi nih an hmuh tikah an khuaruah a har i an ṭih. Minung sinah cu bantuk nawlngeihnak a petu Pathian kha an thangṭhat.
9 Jesuh cu cuka in a chuah tikah ngunkhuai kholhnak zung ah a ṭhumi Matthai kha a hmuh i “Rak ka zul” tiah a ti. Matthai cu a tho i a zulh.
10 Mah hnuah Jesuh le a zultu pawl cu Matthai inn ah rawl an ei. Ngunkhuai kholtu le misual tampi zong an ra ve i an sinah an ei ve.
11 Mah kha an hmuh tikah Farasi mi hna nih zultu pawl kha “Zeicah nan sayapa hi ngunkhuai kholtu le misual pawl he rawl an eiṭi?” tiah an hal hna.
12 Mah kha Jesuh nih a theih tikah “A dammi nih siibawi an herh lo, a zawmi lawng nih an herh.
13 ‘Raithawinak kha ka duhmi a si lo, zaangfahnak tu kha ka duhmi a si’ timi Cathiang sullam kha va kal u law va hlathlai u. Miding mi hna auh awkah ka ra lo, misual mi hna auh awk tu ah ka ra” tiah a ti.
14 Johan zultu pawl cu Jesuh sinah an ra i “Kanmah le Farasi mi pawl cu rawl kan ul i nang na zultu pawl hi zeicah an ulh ve lo?” tiah an hal.
15 Jesuh nih “Nupi ṭhitu tlangval a um chung ah cun a hawile cu zeitindah an ngaih a chiat hnga? Asinain nupi ṭhitu tlangval cu an sinin lak caan a phan te lai. Mah tikah rawl an ul ve te ko lai.
16 Ahohmanh nih thilpuan hlun kha thilpuan a thar in an belh bal lo. An belh ahcun an belhnak puan nih a dawh lai i a tlek chinchin lai.
17 Saphawcua* hlun chung ah mitsur zu thar an rawng bal lo. An rawn ahcun saphawcua cu a kek lai i mitsur zu zong a zut lai. Cun saphawcua zong a rawk lai. Cucaah mitsur zu a thar cu saphawcua a thar chung ah an rawn tawn i an pahnih in an him veve” tiah a ti.
18 Cu bia a chim lioah bawi* pakhat cu a ra i Jesuh hmaiah a khuk aa bil i, “Saya, atu hi ka fanu cu a thi cang kho men. Asinain ra law a cung ah na kut na chuan ahcun a nung ṭhan ko lai” tiah a ti.
19 Cucaah Jesuh cu a tho i amah cu a zulh. A zultu hna zong nih an zulh ve.
20 Mah lioah kum 12 chung thichuah zawtnak in a ngormi nu cu a hnulei in a ra i Jesuh a puanki te kha a tawngh.
21 “A puan ka tawnghnak men in ka dam ko lai” tiah a lungchung in a ti.
22 Jesuh cu a hun i mer i minu kha a hmuh tikah “Na thinphang hlah, ka fanu! Na zumhnak nih aan damter cang” tiah a ti. Cu caan thawk cun a dam colh.
23 Jesuh cu bawi inn i a va luh tikah thonglawi a tummi le a ai a hrammi, mi pawl kha a hmuh hna i,
24 “Hika hin chuak u. Ngakchianu hi a thihmi a si ṭung lo, aa hngilhmi a si” tiah a ti hna tikah mi nih an nihsawh.
25 Jesuh nih mi pawl kha a chuahter dih hna hnuah ngakchianu a umnak khaan ah a lut i a kut kha a tlaih tikah ngakchianu cu a tho.
26 Cu thawng cu cuka ram dihlak ah a thang dih.
27 Cuka in Jesuh a chuah tikah mitcaw pahnih nih an zulh i, “David Fapa, kan zaangfah ko” tiah an au.
28 Innchung i a luh tikah mitcaw pahnih cu a sinah an ra i Jesuh nih “Kaan damter khawh hna ti kha nan zum maw?” tiah a hal hna. Annih nih “Kan zumh, Bawipa” tiah an leh.
29 An mit cu a tawngh i “Nan zumh ning in si ko seh” tiah a ti hna.
30 An mit cu khua a hmu ṭhan. Jesuh nih “Mah kong hi ahohmanh hngalhter hna hlah u” tiah biatak tein bia a cah hna.
31 Asinain an chuak i Jesuh kong kha mi sinah an chim caah cuka ram dihlak ah a thang dih.
32 Mah pa hna an chuah lioah khuachia tuah ruang ah a holh kho lomi, mi pakhat kha Jesuh sinah an ratpi.
33 Khuachia a ṭhawlpiak hnuah mah pa cu a holh kho ṭhan. Mibu cu an khuaruah a har tuk i “Israel ram ah hi bantuk thil hi a um bal lo” tiah an ti.
34 Asinain Farasi mi nih “Hi pa nih khuachia a ṭhawl khawhmi hna hi khuachia bawi thawng in a si” tiah an ti.
35 Jesuh cu khuapi he, khuate he a tlawng i pumhnak inn hna ah a cawnpiak hna, Pennak kong thawngṭha kha a chimh hna i a zaw a fakmi kip kha a damter hna.
36 Mi pawl cu an hma he kaltakmi, khaltu a ngei lomi tuu bantuk an si kha a hmuh hna tikah a zaang an fak tuk.
37 Mah tikah a zultu hna kha “Rawl ṭuan awk tampi a um nain a ṭuantu an tlawm.
38 Cucaah rawlṭuantu thlahpiak ding in rawlṭuan Uktu Bawi sinah thla va cam u” tiah a ti hna.
