Rom 1:1-32
1 Pathian thawngṭha chim awkah rian pekmi, lamkaltu si awkah thimmi, Khrih Jesuh sal keimah Paul nih ca kaan kuat hna.
2 Mah thawngṭha cu Pathian nih hlanliopi in a profet hna sinin bia a rak kan kamhmi, Cathiang ah aa ṭialmi kha a si.
3 Mah cu David tefa in vawlei ah hrin a si hngami a Fapa kong kha a si.
4 Amah cu kan Bawipa Jesuh Khrih kha a si. Thihnak in a thawh ṭhan tikah thiang thlarau ṭhawnnak thawng in Pathian Fapa a si kha a hung lang.
5 Amah thawng in velngeihnak le lamkaltu sinak kha kan hmuh. Miphun kip nih an zumh i a nawl an ngaihnak thawng in a min an thangṭhat khawh nakhnga caah a si.
6 Nannih zong mah miphun lakah nan i tel caah Jesuh Khrih ta si ding in thimmi nan si ve.
7 Rom khua ah a ummi Pathian dawtmi le mithiang si awkah thim a simi nan dihlak sinah ca ka rak ṭial:
Kan Pa Pathian le Bawipa Jesuh Khrih vel le daihnak cu nan cung ah um ko seh.
8 Vawleicung khuazakip ah a ummi hna nih nan zumhnak kong kha an chim caah nanmah he aa tlaiin a hmasa bik ah Jesuh Khrih min in ka Pathian kha ka lawmh.
9 Thla ka cam fatin kaan telh zungzal hna timi kong ah Pathian cu ka tehte a si. Pathian cu a Fapa kong thawngṭha ka chimnak thawng in lungthin dihlak in ka biakmi a si.
10 Pathian duhnak a si ahcun atu a donghnak tal ah hin lam khatkhat in nan sin rat khawh awkah thla ka cam.
11 Nanmah he thlaraulei laksawng i hrawm in thazaang pek awkah hmuh kaan duh tuk hna.
12 Phundang in cun nanmah he, keimah he zumhnak in pakhat le pakhat thazaang kan i pek khawh nakhnga caah a si.
13 Unau hna, miphun dang hna lakah theipar ṭha ka zun bantuk in nan lak zong ah theipar ṭha zun ka duh caah nan sin rat awkah atu le atu kaa zuam ti kha hngalhter kaan duh hna. Asinain pakhatkhat nih a ka dawnh zungzal.
14 Greek mi le ramdang mi, mifim le mihrut an dihlak cung ah leiba ka ngei.
15 Cucaah Rom khua ah a ummi nan sin zong ah thawngṭha chim lai kha kaa ngaih tuk.
16 Thawngṭha cu ka zahpi lo; zeicahtiah thawngṭha cu a zummi paoh khamhnak a hmuhtertu Pathian ṭhawnnak a si. A hmasa bik ah Judah mi caah a si i a hnuah Greek mi ca zong ah a si.
17 Thawngṭha thawng in Pathian dinnak a langhmi kha zumhnak a ngeimi nih an hmuh i an zumhnak a fek chin. “Miding mi cu zumhnak thawng in an nung lai” tiah cathiang ah aa ṭial bantuk khan a si.
18 A ding lomi lam in biatak a khammi, Pathian zei ah a rel lomi le miding a si lomi vialte cung ah Pathian thinhunnak cu van in a lang.
19 Zeicahtiah Pathian nih a kong kha fiang tein a langhter caah hngalh awk a simi Pathian kong vialte kha an hngalh ko.
20 Pathian cu hmuh khawh a si lo nain sermi thil hna zohnak thawng in a sining hna kha vawlei ser hramthawk in fiang tein hmuh khawh a si ko, cucu a hmunmi a ṭhawnnak le a Pathian sinak kha a si. Cucaah i silhnalh khawhnak zeihmanh an ngei lo.
21 Annih nih Pathian kha an hngalh ko nain an thangṭhat lo i a lawmh zong an lawm lo. An khuaruahnak cu pakpalawng a si i a hrutmi an lungthin cu muihnak in a khat.
22 Mifim kan si tiah an i ti nain mihrut ah an cang.
23 A thi kho lomi Pathian kha sunparnak pe loin a thi khomi minung, va, keli a ngeimi saram, a lawn in a lawnmi thilnung hna milem tu kha sunparnak an pek.
24 Annih nih an lung duhnak lawng kha tuah an duh caah Pathian nih a hlawt hna i a thurhnawmmi le an pum caah ningzak a simi thil tuah awkah a awnh hna.
25 Pathian kong biatak si loin lihbia tu zumh awkah an i thim. Sertu si loin sermi thil kha an hmaizah i an biak. Sertu cu a zungzal in thangṭhat si ko seh! Amen.
26 Cucaah Pathian nih a hlawt hna i ningzak a simi an horduhnak ning in tuah awkah a awnh hna. Nu nih a phung ning in hman awk a simi an nu sinak kha ningcang lopi in an hman.
27 Cu bantuk in pa zong nih a phung ning in nu he umṭinak kha an hlawt. An horduhnak cu a ṭhawn tuk caah a thurhnawmmi thil kha pa le pa cung ah an tuah. Cucaah an sualnak he aa tlakmi dantatnak kha tling tein an hmuh.
28 Pathian kong kha hngalh taktak an duh lo caah Pathian nih a hlawt hna i a ṭhalomi an ruahnak ning in tuah awkah a awnh hna. Cucaah aa tlak lomi thil hna kha an tuah.
29 Annih cu dinlonak, sualnak, hakkauhnak le ṭhatlonak a phunphun in an khat. Nahchuah a hmangmi, lai a nawngmi, aa simi, mi a hlengmi, ziar a ngeimi, mi kong a ceihmi,
30 mi thangchiat a hmangmi, Pathian a huami, a puarhrangmi, a ruam a kaimi, aa porhlawmi, ṭhatlonak tuah awkah khua a khangmi, nulepa nawl a ngai lomi,
31 khua a ruat kho lomi, a biakam a letmi, zawnruahnak le zaangfahnak a ngei lomi an si.
32 Cu bantuk in a tuahmi hna cu thih awkah an i tlak timi Pathian i a dingmi biaceihnak kha ṭha tein an hngalh ko nain anmah theng nih an tuah peng leng ah a tuahmi zong kha an hnatlakpi hna.
