Rom 10:1-21
10 Unau hna, Israel mi caah ka lung duhnak le Pathian sin i ka thlacamnak cu khamh an si nakhnga caah a si.
2 Annih cu Pathian caah a lung a tho ngaimi an si ti kha tehte ka khaan khawh. Asinain a hmaanmi hngalhnak ning in cun a si lo.
3 Pathian dinnak kha an hngal lo i anmah dinnak tu langhter ding in an i zuam caah Pathian dinnak kha an zul lo.
4 Nawlbia cu Khrih thawng in a dong cang. Cucaah zumhnak a langhtermi vialte cu miding ah rel an si cang.
5 Nawlbia zulhnak thawng in miding ah rel an sinak kong he aa tlaiin Moses nih “Nawlbia a zulmi cu mah a zulhnak thawng in a nung lai” tiah a rak ṭial.
6 Asinain zumhnak thawng in miding ah rel an sinak kong he aa tlaiin “Khrih kha run ṭumpi awkah ‘Ahodah van ah a kai lai?’
7 Asiloah Khrih kha thihnak in thawhter awkah ‘Ahodah khor thuk chung ah a ṭum lai?’ tiah na lung chung in ti hlah” ti zong in aa ṭial.
8 Cathiang nih zeidah a chim? “Bia cu na pawngte ah, na kaa chung ah le na lungthin chung ah a um” tiah a ti. “Bia” cu kan chimmi zumhnak he aa tlaimi bia kha a si.
9 Cucaah Jesuh cu Bawipa a si ti kha na kaa in zapi hmaiah na phuan i thihnak in Pathian nih a thawhter ti kha na lung chung in na zumh ahcun khamh na si lai.
10 Zeicahtiah mi pakhat nih a lungthin in a zumh i miding ah rel a si, a kaa in zapi hmaiah a phuan i khamh a si.
11 Cathiang nih “Bawipa a zummi cu an lung a dong lai lo” tiah a ti.
12 Judah mi le Greek mi tiin thleidannak zeihmanh a um ti lo. An dihlak in Bawipa pakhat lawng an ngei. Anih cu amah a autu vialte kha siang ngai in thluachuah a petu a si.
13 Zeicahtiah “Jehovah* min auh in thla a cammi paoh cu khamh an si lai” tiah cathiang ah aa ṭial.
14 Asinain an zumh lo ahcun zeitindah a min cu an auh khawh lai? An theih bal lo ahcun zeitindah an zumh khawh lai? A chimtu an um lo ahcun zeitindah an theih khawh lai?
15 Thlah an si lo ahcun zeitindah an chim khawh lai? “Thawngṭha a chimtu hna ke cu zeitluk in dah aa dawh!” tiah cathiang ah aa ṭial.
16 Asinain thawngṭha kha an dihlak in cun an cohlang lo. Isaiah nih “Jehovah,* kan sinin an theihmi bia cu aho nih dah a zumh?” tiah a ti.
17 Cucaah zumhnak cu theihnak in a ra i theihnak cu Khrih he aa pehtlaimi bia chimnak in a ra.
18 Asinain bia kaan hal tuah hna lai, Israel mi nih mah bia cu an rak thei lo maw? Cutin a si hrimhrim lo. A tak ti ahcun “An aw cu vawleicung pumpi ah a thang i an bia cu vawlei deng tiang a phan” tiah cathiang nih a ti.
19 Bia kaan hal rih hna lai, Israel mi nih an rak hngal lo maw? A si hrimhrim lo. A hmasa bik ah Moses nih “Miphun hmanh a si lomi hna kha hmang in nahchuahnak kaan ngeihter hna lai. Hngalhnak a ngei lomi miphun kha hmang in nan thin kaan hunter hna lai” tiah a ti.
20 Cun Isaiah zong nih ralṭha tein hitin a ti: “A ka kawl lomi nih an ka hmuh; a ka hlam lomi hna sinah kaa langhter.”
21 Israel mi he aa tlai zong in “Nawlngai lomi le a lung a khongmi hna kha chun nitlak in ka kut ka chanh hna” tiah a rak ti.
