Rom 11:1-36
11 Cu a si ah bia kaan hal rih hna lai, Pathian nih a miphun cu a hlaw hna maw? Hlaw hrimhrim hlah! Keimah zong hi Israel mi, Abraham tefa, Benjamin phun chungmi ka si.
2 Pathian nih a hramthawk tein a thimmi a miphun cu a hlaw hna lo. Elijah kong he aa tlaiin cathiang nih a chimmi kha nan hngal lo maw? Israel mi hna kong kha Pathian sinah hitin a phuan:
3 “Jehovah,* na profet hna kha an thah hna i na biakṭheng zong an hrawh dih. Keimah lawng ka taang i atu ah ka nunnak hmanh lak awkah an i zuam.”
4 Pathian nih zeitindah a leh? “Baal hmaiah a khuk aa bil lomi, ka mi 7,000 an um rih” tiah a ti.
5 Cu bantuk in atu zong ah Pathian nih a velngeihnak thawng in a thimmi, a taangmi an um rih.
6 Velngeihnak thawng in thimmi a si ahcun tuahsernak thawng in thimmi a si ti lai lo. Cu lo ahcun velngeihnak cu velngeihnak tiah ti khawh a si ti hnga lo.
7 Cu a si ah zeitin? Israel mi nih fakpi in an kawlmi thil kha an hmu lo nain thim a simi hna nih cun an hmuh. A taangmi tu cu an lung a molmok.
8 “Pathian nih an lungthin kha thu hluahmah in a hngilhter hna i hmuh khawh lonak mit le theih khawh lonak hna a pek hna. Nihin ni tiang cutin an si rih” tiah cathiang ah aa ṭial bang khan a si.
9 David zong nih “An cabuai cu an caah thang le rap si seh law tlukrilhnak le dantatnak ah cang ko seh.
10 Khua an hmuh nakhnga lo an mit cu caw ko seh, an keng cu kul zungzal ko seh” tiah a ti.
11 Cu a si ah bia kaan hal rih hna lai, an i pah tikah an tlu beh maw? Tlu beh hlah! Asinain an sualnak thawng in miphun dang hna caah khamhnak lam a awng. Mah nih Judah mi kha nahchuahnak a ngeihter hna.
12 An sualnak cu vawlei caah thluachuah a si i an ṭumchuknak cu miphun dang hna caah thluachuah a si ahcun tling tein pumh an si tikah zeitluk in dah thluachuah a si chinchin lai!
13 Atu nannih miphun dang hna sinah ka chim. Miphun dang sin i thlahmi lamkaltu ka si caah ka rian hi kaa chor ko.
14 Ka miphun pawl an nahchuahter awkah lam khatkhat in kaa zuam. Mah cu an lak i mi cheukhat kha khamh ka duh hna caah a si.
15 Hlawt an simi nih vawlei kha Pathian he remnak a hmuhter ahcun cohlan an simi nih thihnak in nunnak ah a phanhter hna lai, a si ko lo maw?
16 Thlaithar caah pekmi changreu hlum chung in a cheubang cu a thian ahcun a hlum ningpi in a thiang ko. Cun a hram cu a thian ahcun a nge zong an thiang ko.
17 Asinain Pathian nih oliv kung nge cheukhat kha a khiah i ramlak oliv nge a simi nanmah kha aan peh hna tikah nannih zong oliv hram i a ṭhatnak kha nan i hrawm ve cang.
18 Cucaah khiahmi a nge cung ah i porhlaw hlah u. Nan i porhlawt ahcun nannih nih a hram kha nan nuntermi a si lo, a hram nih aan nuntermi hna a si ti kha i cinken u.
19 “Kanmah pehnak ding caah pei a nge cu khiah an si cu” tiah nan ti ko lai.
20 Mah cu a hmaan ko! Khiah an simi cu zumhnak an ngeih lo caah a si. Asinain nannih cu zumhnak nan ngeih ruang ah fek tein nan dir. Cucaah nan lung puam hlah u. Pathian tu kha ṭih ko u.
21 Pathian nih oliv kung taktak i a nge hmanh a zuah hna lo ahcun nanmah zong aan zuah hna lai lo.
22 Pathian zaangfahnak le dantatnak kha ruat hmanh u. Pathian nih a tlumi kha dan a tat hna. Nannih cu Pathian zaangfahnak hmuh awkah nan i zuam chung paoh a zaangfahnak nan hmu lai. Cutin a si lo ahcun khiah nan si ko lai.
23 Asinain annih zong zumhnak an hun ngeih ahcun peh ṭhan an si lai, zeicahtiah Pathian cu peh ṭhan khawhnak nawl a ngei.
24 Nannih cu ramlak oliv kung in khiah nan si i oliv kung taktak ah a phung ning loin peh nan si ahcun oliv kung taktak i a nge pawl a kung ah peh ṭhan cu a si kho chinchin!
25 Cucaah unau hna, hi a thiangmi biathli hi hngalh loin umter kaan duh hna lo. Cutin a si lo ahcun nanmahle nanmah a fimmi ah nan i ruat sual lai. Mah biathli cu hihi a si: Pathian thimmi miphun dang hna an milu a tlin hlan tiang Israel mi cheukhat cu an lung a molmok lai.
26 Cuticun Israel mi vialte cu khamh an si lai. Cathiang ah “Khamhtu cu Zion in a ra lai i ṭhatlonak vialte kha Jakob tefa sinin a hloh lai.
27 An sualnak ka lakpiak hna tikah anmah he biakamnak ka ser lai” tiah aa ṭial bantuk khan a si.
28 Thawngṭha an cohlan lo caah annih cu Pathian ral an si ti cu a hmaan ko. Mah ruang ah nannih cu ṭhatnak nan hmu. Asinain Pathian nih an pupa hna sinah a pekmi biakamnak ruang ah an lak in cheukhat kha a hawi ah a thim hna.
29 Pathian nih laksawng a pek hnanak le a thim hnanak kong ah a lung aa let bal lai lo.
30 Nannih cu a hlanah Pathian nawlngai lomi nan rak si. Asinain Judah mi hna nawlngaih lo ruang ah a zaangfahnak kha atu ah nan hmuh cang.
31 Atu ah annih zong nawl an ngai ve lo. Mah cu nan hmuhmi zaangfahnak an hmuh ve nakhnga caah a si.
32 Pathian nih mi vialte cung ah zaangfahnak a langhter khawh nakhnga mi vialte kha nawlngaih lonak sal si awkah a awnh hna.
33 Pathian rumnak le fimnak le hngalhnak cu a va thuk hringhran dah! A biaceihnak cu dothlat khawh a si lo i a lam cu tling tein hngalh khawh a si lo.
34 Cathiang ah “Aho nih dah Jehovah* lungthin cu a hngalh? Aho nih dah ruahnak a cheuh bal?
35 Pathian nih cham ṭhan ding in aho nih dah Pathian cu a pek hmasa bal?” tiah aa ṭial.
36 Zeicahtiah zeizong vialte cu amah sinin le amah thawng in le amah caah a ummi an si. Pathian nih sunparnak hmu zungzal ko seh. Amen.
