Rom 12:1-21
12 Cucaah unau hna, Pathian zaangfahnak thawng in kaan nawl hna. A nungmi, a thiangmi le Pathian cohlan khawhmi raithawinak in nan pum kha i pe u. Cun nan khuaruah khawhnak kha hmang in Pathian rian ṭuan u.
2 Hi vawlei* kha i sersiamter ti hlah u. Mah canah Pathian i a ṭhami le cohlan awk a tlakmi le a tlingmi a duhnak kha ṭha tein nan hngalh khawh nakhnga nan lungthin kha tharchuah in i thleng u.
3 Pathian nih a ka pekmi velngeihnak thawng in nan dihlak in kaan nawl hna, nanmahle nanmah nan sining nakin a sang deuh ah i ruat hlah u. Pathian nih aan pekmi hna zumhnak ning in nan sining te tu khan i ruat u.
4 Pum pakhat ah pum ṭengnge tampi a um nain pum ṭengnge hna i an rianṭuan ning cu aa lo cio lo.
5 Cu bantuk in kannih cu kan tampi ko nain Khrih he lungthin khat tein kan umnak thawng in pumkhat kan si. Asinain pumpak cio in cun pakhat le pakhat aa pehtlaimi pum ṭengnge kan si.
6 Velngeihnak thawng in kan hmuhmi laksawng cu aa dang cio. Profet bia chim khawhnak laksawng a si ahcun kan zumhnak ning cio in profet bia kha chim hna u sih;
7 midang ca rianṭuannak laksawng a si ahcun ṭuan ko hna u sih; cawnpiaknak laksawng a hmumi a si ahcun cawnpiak ko hna seh;
8 thapeknak laksawng a si ahcun thape ko hna seh; pekṭhenhnak laksawng a si ahcun siang ngai in peṭhen ko hna seh; hruainak laksawng a si ahcun teima tein hruai ko hna seh; zaangfahnak laksawng a si ahcun lungthin dihlak in zaangfah ko hna seh.
9 Nan dawtnak ah i titernak um hlah seh. Ṭhatlonak kha fih u; ṭhatnak kha i tlaih u.
10 Unau bantuk in pakhat le pakhat i tlaihchan u law i daw u. Pakhat le pakhat i hmaizahnak kha nanmahlei in thawk u.
11 Teimami si u, nan thathu hlah u.* Thiang thlarau forhfialnak in nan lungtho u. Jehovah* sal in a rian ṭuan u.
12 Ruahchannak ah i lawm u. Harnak nan ton tikah inkhawhnak ngei u. Ngol loin thlacam u.
13 Mithiang mi kha an herhbaumi va peṭhen hna u. Khualdawtnak langhter kha nan zia ah canter u.
14 Nanmah aan hremtu hna kha thluachuah halpiak hna u; chiatserh loin thluachuah tu halpiak hna u.
15 Aa lawmmi hna sinah vaa lawm ve u; a ṭapmi hna sinah va ṭap ve u.
16 Nanmahle nanmah nan i hmuh ning in midang zong hmu ve hna u. A sangmi thil ah nan lungthin chia hlah u, toidornak lungput tu ngei ko u. Nanmahle nanmah a fimmi ah i ruat hlah u.
17 Ṭhatlonak kha ṭhatlonak in lehrulh hlah u. Mi vialte hmuhnak ah a ṭhami cu zeidah a si ti kha ruat u.
18 A si khawh ahcun mi vialte he rem tein um awkah nan si khawh chung in i zuam u.
19 Ka dawtle hna, phuhlam hmang hlah u. Pathian thinhunnak tu nih mah cu tuah ko seh. Zeicahtiah “‘Phuhlam cu keimah ta a si; keimah nih ka lehrulh ko lai’ tiah Jehovah* nih a ti” tiah cathiang ah aa ṭial.
20 “Na ral cu a paw a ṭam ahcun ei awk va pe; a ti a hal ahcun din awk va pe. Cutin na tuah ahcun a lu cung ah meiṭil na chonh a si lai”* ti zong in aa ṭial.
21 Cucaah ṭhatlonak kha i teiter hlah u, ṭhatnak tu in ṭhatlonak kha tei zungzal ko u.
Footnotes
^ Biafang Fianternak ah zoh.
^ Asiloah “rian fel tein ṭuan loin a caan sawksam hlah u.”
^ Biafang Fianternak ah zoh.
^ Biafang Fianternak ah zoh.
^ Mah cu a lungthin daihter awk le nemter awkah a si.
