Rom 13:1-14
13 Nawlngeitu pawl kha mikip* nih an nawl ngai hna u. Zeicahtiah Pathian nih nawl a awnh lo ahcun nawlngeitu ahohmanh an um kho lo. Atu i nawl a ngeimi hi Pathian nih ri pakhat tiang nawlngeihnak a pekmi hna an si.
2 Cucaah nawlngeitu pawl a ralchanhmi cu Pathian timhtuahnak a ralchanhmi an si. Cutin a ralchanhmi hna cu biaceih an si lai.
3 Uktu bawi pawl cu ṭhatnak a tuahmi caah cun ṭih awk an si lo i ṭhatlonak a tuahmi ca lawng ah ṭih awk an si. Nawlngeitu pawl kha ṭih loin um na duh maw? Ṭhatnak kha tuah peng law an in thangṭhat ko lai.
4 Annih cu nangmah ṭhatnak caah Pathian rianṭuantu an si. Ṭhatlonak na tuah ahcun na ṭih ko hna lai, annih nih vainam kha a sawhsawh in an i tlaih lo. Annih cu Pathian rianṭuantu an si i ṭhatlonak a tuahmi hna cung ah thinhunnak a tluntertu ding,* teirul chamtu an si.
5 Thinhunnak ruang lawng ah si loin nan chiaṭha thleidannak lungthin ruang zong ah nawlngeitu pawl kha an nawl nan ngaih hrimhrim hna awk a si.
6 Cucaah ngunkhuai zong pe u; zeicahtiah annih cu mipi caah rian ṭuan peng ding in Pathian nih a hmanmi an si.
7 Mikip kha nan pek awk a simi paoh pe hna u: ngunkhuai pek awk a simi paohpaoh kha ngunkhuai pe hna u; ṭih awk a simi kha ṭih hna u; upat awk a simi kha upat hna u.
8 Pakhat le pakhat dawtnak dah ti lo cu zei bantuk leiba hmanh i ba hlah u; a minunghawi a dawmi cu nawlbia tling tein a zulmi a si.
9 “Va zuangzam hlah, lai va nawng hlah, fir hlah, mi thil na mit va thi hlah” timi nawlbia le a dang nawlbia vialte cu “Na minunghawi kha nangmah naa dawt bantuk in na dawt lai” timi nawlbia ah an i funtom dih.
10 Dawtnak a ngeimi nih cun a minunghawi cung ah ṭhatlonak a tuah lo; cucaah dawtnak ngeih cu nawlbia tling tein zulh a si.
11 Cucaah kaan chimhmi hna kha zul u, atu cu nan i hngilhnak in nan i hlauh awk caan a si cang ti kha nan hngalh. Zeicahtiah kan khamhnak caan cu kan rak zumhka nakin atu ah kan naih deuh cang.
12 Zan cu a dih dengmang cang i niceu a phan dengmang cang. Cucaah muihnak he aa pehtlaimi tuahsernak hna kha hlaw u law ceunak hriamnam kha i tlaih u.
13 Aukhuang cercur in puai tuahnak, rihai in umnak, nupa sualnak, zah hngal loin thil tuahnak,* i siknak le nahchuahnak kha hrial hna u sih law chun ceu ah a ummi bantuk in nuncan dawh tein nung hna u sih.
14 Bawipa Jesuh Khrih kha i zohchunh u,* pumsa duhnak diriamhter awkah khuakhang hlah u.
Footnotes
^ Biafang Fianternak i “Nunnak” timi ah zoh.
^ Asiloah “dantatnak a tluntertu ding.”
^ Biafang Fianternak ah zoh.
^ A hrampi, “i hruk u.”
