Rom 15:1-33
15 Zumhnak a ṭhawngmi kannih nih zumhnak a dermi hna i an derthawmnak kha kan hngalhthiampiak hna awk a si. Kanmah duhnak lawng kan tuah awk a si lo.
2 Midang duhnak tu kha zul in an ṭhatnak caah thazaang petu a simi thil kha tuah hna u sih.
3 Khrih hmanh nih amah duhnak kha a zul lo. “Nangmah aan mawhchiattu hna i mawhchiatnak cu ka cung ah a tla” tiah cathiang ah aa ṭial bantuk khan a si.
4 Cathiang ah hlanliopi in rak ṭialmi vialte cu kanmah cawnpiaknak caah a si. Cathiang nih inkhawhnak le hnemhnak a kan peknak thawng in ruahchannak a kan ngeihter.
5 Inkhawhnak le hnemhnak petu Pathian nih Khrih Jesuh ngeihmi lungput bantuk nan ngeih ve nakhnga in bawm ko hna seh.
6 Cuticun kan Bawipa Jesuh Khrih i a Pa le a Pathian kha lungthin khat te le aw khat tein nan thangṭhat khawh lai.
7 Khrih nih aan cohlan hna bantuk in pakhat le pakhat i cohlang ve u. Mah nih Pathian kha sunparnak a hmuhter lai.
8 Pathian cu a bia a let lomi a si ti langhter awk le pupa hna sin a biakam fehter awkah Khrih cu cuarpar tanmi hna ca i rianṭuantu a hung si ti kha hngalhter kaan duh hna.
9 Cuticun miphun dang zong nih Pathian kha a zaangfahnak caah an thangṭhat khawh ve lai. “Cucaah miphun dang hna lakah na kong kha ka phuan lai, na min kha hla in ka thangṭhat lai” tiah cathiang ah aa ṭial bantuk khan a si.
10 “Nannih miphun dang hna, Pathian miphun he i lawm u” ti zong in a ti.
11 Cun “Miphun vialte hna, Jehovah* cu thangṭhat u. Mi vialte nih amah cu thangṭhat hna seh” ti zong in a ti.
12 Isaiah zong nih “Miphun tampi a uktu ding Jesse tefa* a chuak lai, annih nih amah cu an i bochan lai” tiah a ti.
13 Ruahchannak petu Pathian nih amah nan i bochan caah lawmhnak le daihnak tampi in pe ko hna seh. Cuticun thiang thlarau ṭhawnnak thawng in ruahchannak in nan khat lai.
14 Unau hna, nannih cu ṭhatnak le hngalhnak in nan khat ti le pakhat le pakhat nan i cawnpiak kho ti kha fek tein ka zumh.
15 Asinain a kong cheukhat kha hngalhter ṭhan kaan duh hna caah hlangfang tein ca ka rak ṭialmi a si. Pathian nih a ka pekmi velngeihnak ruang ah cutin ka rak ṭialmi a si.
16 Velngeihnak thawng in kei cu Khrih Jesuh sal ka si i miphun dang hna sinah thawngṭha kha ka chim khawhmi a si. Mah rian cu a thiangmi a si. Mah rian ka ṭuan caah miphun dang hna cu thiang thlarau thawng in a thiangmi le cohlan awk tlakmi raithawinak an hung si.
17 Khrih Jesuh zultu ka si ca le Pathian rian ka ṭuan caah kaa lawm tuk.
18 Miphun dang hna kha nawlngaimi siter awkah Khrih nih keimah hmang in a tuahmi kong dah ti lo cu a dang zeihmanh ka chim lai lo. Ka bia le ka tuahsernak,
19 hmelchunhnak le khuaruahhar ṭhawnnak le thiang thlarau ṭhawnnak thawng in Khrih nih cutin a tuahmi a si. Cucaah Jerusalem in Il·lirikum peng tiang Khrih kong thawngṭha kha felfai tein ka chim cang.
20 Ka hmuitinh cu Khrih min kong an theih rih lonak hmun ah thawngṭha va chim kha a si. Midang nih hram an dirhcianak cung ah sak cu ka duh lo.
21 “A kong chimh a si bal lomi nih amah cu an hmuh lai, a kong a thei bal lomi nih an hngalhthiam lai” tiah cathiang ah aa ṭial bantuk khan a si.
22 Mah ruang ah hin nan sin rat awkah voi tampi kaa zuam nain ka ra kho lo.
23 Atu cu hika hrawng ah phung ka chim lonak hmun a um ti lo. Nan sin rat ka duhnak zong hi kum tampi a si cang.*
24 Cucaah Spain ram ka tlawn pah in nanmah he kan i tong kho lai tiah kaa ruahchan. Nanmah he caan tlawmpal chung kan i hawikomh hnuah ka khuallam ah tlawmpal tiang nan hei ka thlah te lai.
25 Asinain atu cu mithiang mi hna bawmh awkah Jerusalem khua ah ka tlawng ta rih lai.
26 Zeicahtiah Masidonia le Akhaia ram i unau hna nih Jerusalem khua ah a ummi mithiang mi lak i sifakmi hna bawmh awkah an thilri kha siang ngai in thawhlawm an pek.
27 Cutin pek kha an duh tuk, a tak ti ahcun pek awk zong ah rian kan ngei tiah an ruah. Zeicahtiah mithiang mi hna sinin thlaraulei thil kha an rak i hrawm caah mithiang mi hna herhmi pumsalei thil kha pek awkah miphun dang zong rian an ngei ve.
28 Cucaah mah rian ka liim i an sinah thawhlawm ka pek dih hnuah Spain ram ka tlawn pah in kaan pal pah te hna lai.
29 Ka rat tikah Khrih pekmi thluachuah tampi in kaan phorh hna lai ti kha ka hngalh.
30 Unau hna, kan Bawipa Jesuh Khrih thawng in le thiang thlarau chuahtermi dawtnak thawng in forh kaan duhmi hna cu kei zong thla ka cam bantuk in Pathian sinah fakpi in thla rak ka campiak ve u.
31 Judea ram i zumlotu hna kut in ka luat nakhnga le Jerusalem khua i mithiang mi nih an caah rian ka ṭuanmi kha an cohlan khawh nakhnga thla rak ka campiak u.
32 Pathian duhnak a si ahcun nan sinah lunglawm tein ka ra lai i pakhat le pakhat thazaang kan i pe kho lai.
33 Daihnak petu Pathian cu nan dihlak sinah um ko seh. Amen.
Footnotes
^ Biafang Fianternak ah zoh.
^ A hrampi, “hrihhram.”
^ Asiloah “kum tlawmpal a si cang” ti zong a si kho.
