Rom 16:1-27
16 Kenkhria Khrihfabu ah rian a ṭuanmi kan unaunu Fibi kha nanmah he theihhngalhter kaan duh hna.
2 Mithiang mi hna he aa tlakmi cohlannak ning in amah kha Bawipa min in rak cohlang u. A herhmi vialte kha rak bawm u, zeicahtiah anih cu keimah i telin mi tampi bawmchantu a si.
3 Khrih Jesuh ah ka rianṭuan hawi a simi Priska* le Akuila kha an kut ka tlaih hna.
4 Annih cu ka caah thih hmanh a ngamhmi an si. Keimah lawng si loin miphun dang Khrihfabu vialte zong an cung ah an i lawm.
5 An inn ah aa pummi Khrihfabu zong an kut ka tlaih hna. Asia peng ah Khrih zultu a si hmasa bikmi, ka dawtmi Epenetas zong a kut ka tlaih.
6 Nan caah rian fakpi in a ṭuanmi Mary zong a kut ka tlaih.
7 Ka rualchan le thong ka tlakṭi hawi a simi Andronikas le Junias zong an kut ka tlaih hna. Annih cu lamkaltu hna mithmai ṭha a hmumi le keimah hlanah Khrih he lungthin khat tein a um hmasami an si.
8 Bawipa zultu a simi, ka dawtmi Ampliatas zong a kut ka tlaih.
9 Khrih rian ah kan rianṭuan hawi a simi Urbanas le ka dawtmi Stakhis kha an kut ka tlaih hna.
10 Khrih mithmai ṭha a hmumi Apelles kha a kut ka tlaih. Aristobulus te chungkhar zong an kut ka tlaih hna.
11 Ka rualchan a simi Herodion kha a kut ka tlaih. Bawipa zultu a simi Narsissas te chungkhar zong an kut ka tlaih hna.
12 Bawipa rian fakpi in a ṭuanmi unaunu Traifena le Traifosa kha an kut ka tlaih hna. Cun Bawipa rian fakpi in a rak ṭuanmi, kan dawtmi unaunu Persis zong a kut ka tlaih.
13 Bawipa nih a thimmi Rufas le ka nu bantuk in ka hmuhmi a nu kha an kut ka tlaih hna.
14 Asinkritas, Flegon, Hermes, Patrobas, Hermas le an sinah a ummi unau pawl kha an kut ka tlaih hna.
15 Filologas, Julia, Nereus le a far, cun Olimpas le an sinah a ummi mithiang mi vialte kha an kut ka tlaih hna.
16 A thiangmi hnamhnak in pakhat le pakhat i biachawn u. Khrihfabu dihlak i Khrih zultu hna nih nan kut an in tlaih hna.
17 Unau hna, nan rak hngalh cangmi cawnpiaknak kha ralchanh in ṭhencheunak le tlukrilhnak a chuahtertu kha i ralring hna u law hrial hna u tiah forh kaan duh hna.
18 Zeicahtiah cu bantuk mi hna cu kan Bawipa Khrih sal an si lo, anmah pumsa duhnak* sal tu an si deuh. An bianem le an mifaak thiamnak in zei hngal lomi hna lungthin kha an hlen hna.
19 Nawlngaimi nan si kha mi vialte nih an hngalh caah nan cung ah kaa lawm. Cucaah ṭhatnaklei ah a fimmi si u law ṭhatlonaklei ah zei hngal lomi si u ti kaan duh hna.
20 Daihnak petu Pathian nih a rauhhlan ah Satan kha nan ke tang ah a rial cang lai. Kan Bawipa Jesuh vel cu nan cung ah um ko seh.
21 Ka rianṭuan hawi Timote le ka rualchan a simi Lusias, Jason le Sosipater zong nih nan kut an in tlaih hna.
22 (Hi cakuat a ṭialpiaktu keimah Tertius zong nih Bawipa min in nan kut kaan tlaih hna.)
23 Tluninn a ka awnhtu le Khrihfabu dihlak a inn ah pumhnak nawl a awnhtu Gaius nih nan kut aan tlaih hna. Khuapi tangka kengtu Erastas le a naupa Kuartas zong nih nan kut an in tlaih hna.
24 * ——
25 Pathian nih aan fehter khawh hna ti kha ka chimmi Jesuh Khrih kong le thawngṭha nih a langhter. Mah thawngṭha cu Pathian nih a phuanmi, a thiangmi biathli he aa pehtlai. Mah biathli cu caan saupi chung thuh a rak si.
26 Asinain atu cu profet hna ṭialmi Cathiang hmang in phuan a si cang i hngalh a si cang. Zungzal a hmunmi Pathian nawl peknak ning in miphun vialte nih an zumh i a nawl an ngaih nakhnga caah a si.
27 Pathian pakhat lawnglawng hi fimnak in a khatmi a si. Jesuh Khrih thawng in Pathian cu sunparnak hmu zungzal ko seh. Amen.
Footnotes
^ Prisilla.
^ Asiloah “an paw.”
^ Mah cacaang hi Baibal lehnak cheukhat ah a um nain hlanlio kut in ṭialmi, zumhawk a tlakmi Greek Baibal hna ah a um lo.
