Rom 4:1-25
4 Cu a si ah a kan hringsortu kan pupa Abraham tah zeitin?
2 Abraham cu a tuahsernak ruang ah miding tiah ti a si ahcun i porhlawt awk a ruang a ngei ko hnga. Asinain Pathian hmaiah cun aa porhlaw kho lo.
3 Cathiang nih zeitindah a chim? “Abraham nih Jehovah* kha a zumh caah miding ah rel a si” tiah a ti.
4 Rian a ṭuanmi nih nihlawh a hmuh tikah velngeihnak thawng in a hmuh tiah relpiak a si lo, a ṭuan man a hmuh tiah relpiak a si.
5 Asinain mi pakhat nih Pathian a zumh ahcun tuahsernak aa tel lo hmanh ah a zumhnak thawng in miding ah rel a si lai. Zeicahtiah Pathian cu misual kha miding in a cohlangtu a si.
6 Nawlbia tling tein a zul lo nain Pathian nih miding ah a relmi pa i aa lawmhnak kong kha David zong nih hitin a chim:
7 “An ṭhatlonak ngaihthiam a simi le an sualnak khuhpiak a simi hna cu lunglawmmi an si;
8 sualnak a ngei tiah Jehovah* nih a ruah hrimhrim lomi cu lunglawmmi a si.”
9 Mah lunglawmhnak cu cuarpar tanmi lawng nih maw an hmuh? Cuarpar tan lomi nih tah an hmu ve lo maw? “Abraham cu a zumhnak ruang ah miding ah rel a si” tiah kan rak chim cang.
10 Cu a si ah zeitik in dah miding ah rel a si? Cuarpar aa tan hnuah maw, aa tan hlanah dah? Aa tan hnuah si loin aa tan hlanah a si.
11 Pathian nih Abraham kha a cuarpar a tanter. Mah cu a cuarpar aa tan hlan in a zumhnak ruang ah miding a si ti a langhtermi hmelchunhnak* a si. Cucaah cuarpar aa tan lo nain zumhnak thawng in miding ah relmi vialte i an pa a hung si.
12 Abraham cu cuarpar aa tanmi hna pa a si. Asinain cuarpar tannak phung a zulmi hna pa lawng si loin kan pa Abraham nih cuarpar aa tan hlanah a rak ngeihmi zumhnak ning in a nungmi hna pa zong a si.
13 Abraham le a tefa nih vawlei ro an co lai timi biakam cu Abraham nih nawlbia a zulh ruang ah si loin a zumhnak thawng in miding ah rel a si caah a si.
14 Nawlbia a zulmi lawng rocotu an si ahcun zumhnak cu pakpalawng a si hnga i biakamnak zong a rawk ko hnga.
15 A tak ti ahcun Nawlbia nih thinhunnak a chuahter, nawlbia a um lo ahcun nawl buarnak zong a um lai lo.
16 Cucaah mah biakamnak cu zumhnak cung ah hrambunh in velngeihnak thawng in hmuhmi a si. Abraham tefa dihlak nih mah biakam kha an hmuh. Nawlbia a zulmi lawng si loin kan dihlak pa a simi Abraham bantuk zumhnak a ngeimi zong nih an hmuh.
17 (Cathiang ah “Nangmah cu miphun tampi hna pa ah kaan ser” tiah a ti bang khan a si.) Mithi a nuntertu, a si rih lomi thil a si cangmi bantuk in a chimtu* Pathian hmaiah mah zumhnak kha Abraham nih a langhter.
18 “Tefa tampi na ngei lai” timi biakam ning in miphun tampi pa ka si lai tiah a zumh i aa ruahchan. Ruahchan ding a ruang a um lo nain aa ruahchan.
19 (Kum 100 hrawng a si cang caah) a pum cu a thimi bantuk a si i Sarah zong fa a ngei kho ti lo* ti kha a hngalh ko nain a zumhnak cu a der hlei lo.
20 Pathian biakam a zumhnak cung ah lungawṭawm in a um lo. Mah canah zumhnak thawng in a hung ṭhawng chin i Pathian kha sunparnak a pek.
21 Pathian nih a biakam ning in a tuah khawh ti kha fek tein a zumh.
22 Cucaah “Anih cu miding ah rel a si.”
23 Asinain “Anih cu miding ah rel a si” timi bia cu Abraham ca lawng ah ṭialmi a si lo.
24 Kan Bawipa Jesuh thihnak in a thawhter ṭhantu Pathian kha kan zumh caah miding ah rel a si hngami kanmah ca zong ah ṭial a si.
25 Bawipa Jesuh cu kan sualnak ruang ah thihnak ah chanh a si i miding ah rel kan si nakhnga thawhter ṭhan a si.
Footnotes
^ Biafang Fianternak ah zoh.
^ Biafang Fianternak ah zoh.
^ Asiloah “aamah khaannak; fehternak.”
^ “a um rih lomi thil a um cangmi bantuk in a chimtu” ti zong a si kho.
^ Asiloah “a cing.”
