Rom 5:1-21
5 Zumhnak thawng in miding tiah ti kan si cang. Cucaah kan Bawipa Jesuh Khrih thawng in Pathian he rem tein um zungzal hna u sih.*
2 Amah kan zumhnak thawng in velngeihnak hmuh khawhnak lam a awng cang. Mah cu atu kan hmuhmi hi a si. Pathian sunparnak kan i ruahchannak ah i lawm hna u sih.*
3 Mah leng ah sifah harnak nih inkhawhnak a chuahter ti kha kan hngalh caah sifah harnak kan in tikah i lawm hna u sih;*
4 inkhawhnak nih Pathian mithmai ṭha a hmuhter; Pathian mithmai ṭha hmuhnak nih ruahchannak a ngeihter.
5 Mah ruahchannak nih kan lung a donghter lai lo; zeicahtiah Pathian dawtnak cu a kan pekmi thiang thlarau thawng in kan lungthin chung ah toih a si cang.
6 Kan derthawm lio caan hmanh ah Khrih cu rikhiahmi caan a phanh tikah misual mi hna caah a thi.
7 Miding mi caah thih a ngamhmi cu an um theng lai lo; miṭha mi caah cun thih a ngamhmi cu a um zong an um men ko lai.
8 Asinain misual kan si lio hmanh ah Khrih cu kan caah a thihnak thawng in Pathian nih a kan dawtnak kha a langhter.
9 Atu cu Khrih thisen thawng in miding tiah ti kan si cang caah amah thawng in Pathian thinhunnak chung in khamh kan si chinchin lai.
10 Ral kan si lio hmanh ah a Fapa thihnak thawng in Pathian he remter kan si ahcun atu remter kan si hnuah cun Khrih nunnak thawng in khamh kan si chinchin lai.
11 Mah leng ah Pathian he pehtlaihnak ṭha kan ngeih ca zong ah kan i lawm. Kan Bawipa Jesuh Khrih thawng in Pathian he remnak kan hmuhmi a si.
12 Sualnak cu mipa pakhat thawng in vawleicung ah a tlung i sualnak nih cun thihnak kha a chuahpi. Cun mi vialte cu misual an si dih caah thihnak cu mi vialte cung ah a tlung.
13 Nawlbia a um hlan in vawleicung ah sualnak a um cang. Asinain nawlbia a um lo caah ahohmanh kha na sual tiah ti khawh an si lo.
14 Adam chan in Moses chan tiang thihnak nih siangpahrang bantuk in a uk hna. Adam bantuk sualnak a tuah lomi hmanh kha a uk hna. Adam cu a ra dingmi pa he an i lo.
15 Laksawng le sualnak cu aa lo lo. Mi pakhat sualnak ruang ah mi tampi an thi. Asinain mi pakhat vel thawng in mi tampi nih Pathian vel le a laksawng kha tam chinchin in an hmuh. Amah cu Jesuh Khrih kha a si.
16 Laksawng le mi pakhat sualnak nih a chuahpimi zong aa lo lo. Sualnak pakhat ruang ah mi vialte cu misual tiah ti an si. Asinain mi tampi nih sualnak an tuah hnuah Pathian nih laksawng a pek hna. Mah laksawng ruang ah mi pawl cu miding tiah ti an si.
17 Mi pakhat sualnak ruang ah thihnak nih siangpahrang bantuk in a uk hna. Asinain miding ah a kan sertu Pathian vel le a laksawng cu a ngan deuh i a ṭha deuh tuk. Mah laksawng a hmumi hna cu Jesuh Khrih thawng in an nung lai i siangpahrang in an uk lai.
18 Cucaah sualnak pakhat ruang ah mi vialte cu misual tiah ti an si. Cu bantuk in dinnak tuahsernak pakhat ruang ah zei bantuk mi paoh miding tiah ti an si i nunnak an hmu lai.
19 Mipa pakhat nawlngaih lonak nih mi tampi kha misual ah a canter hna. Cu bantuk in mipa pakhat nawlngaihnak nih mi tampi kha miding ah a canter hna lai.
20 Minung cu zeitluk in dah an sual timi langhter awkah Nawlbia cu pek a si. Asinain sualnak a tam deuhdeuh ah Pathian velngeihnak zong a tam deuhdeuh ve.
21 Zeicah? Sualnak le thihnak nih siangpahrang bantuk in a uk hna. Cu bantuk in mi kha miding i ser awkah Pathian vel zong nih siangpahrang bantuk in a uk ve hna. Cuticun kan Bawipa Jesuh Khrih thawng in zungzal nunnak an hmuh khawh nakhnga caah a si.
Footnotes
^ Asiloah “Pathian he remnak kan hmu” ti zong a si kho.
^ Asiloah “kan i lawm” ti zong a si kho.
^ Asiloah “kan i lawm” ti zong a si kho.
