Rom 6:1-23
6 Cu a si ah zeitindah kan ti lai? Velngeihnak a karh chin nakhnga sualnak kan tuah lengmang kun lai maw?
2 Tuah naisai hlah! Kannih cu sualnak ah kan thih cang caah zeitindah sualnak chung ah cun kan nun khawh ti lai?
3 Khrih Jesuh chung ah tipil a ingmi kan dihlak in a thihnak chung zong ah tipil kan ing ti kha nan hngal lo maw?
4 Kannih cu a thihnak chung ah tipil kan innak thawng in amah he vuiṭi kan si cang. Khrih cu Pa sunparnak thawng in thihnak in thawhter ṭhan a si bantuk in kannih zong nunnak thar in kan nun ve awk a si.
5 Khrih a thih bantuk in kan thih ve ahcun a thawh ṭhan bantuk in kan tho ṭhan ve hrimhrim lai. Cuticun amah he lungthin khat tein kan um.
6 A sualmi kan pum nih a kan uk ti nakhnga lo le sualnak sal kan si ti nakhnga lo kan ziaza hlun cu Khrih he tung cung ah khenh chih a si cang ti kha kan hngalh.
7 Zeicahtiah mi pakhat cu a thih tikah sualnak in a luat cang.
8 Mah leng ah Khrih he kan thihṭi cang ahcun Khrih he kan nungṭi lai ti zong kan zumh.
9 Zeicahtiah Khrih cu thihnak in a tho ṭhan cang i a thi ti lai lo ti kha kan hngalh. Thihnak cu a cung ah nawl a ngei ti lo.
10 Khrih cu a thih tikah sualnak hloh awkah voikhat ah zungzal ca in a thi, asinain a nun tikah Pathian duhnak tuah awkah a nung.
11 Cu bantuk in nannih zong sualnak ah kan thi nain Khrih Jesuh thawng in Pathian duhnak tuah awkah kan nung tiah nanmahle nanmah i ruat u.
12 Cucaah a thi khomi nan pum cu sualnak nih pumsa duhnak zulhter awkah siangpahrang bantuk in uk ti hlah seh.
13 Nan pum* cu dinlonak hriamnam in sualnak sinah pe ti hlah u. Thihnak in a tho ṭhanmi in Pathian sin tu ah nanmahle nanmah i pe u law nan pum* zong kha dinnak hriamnam in Pathian sinah pe u.
14 Nannih cu nawlbia tang ah si loin Pathian vel tang ah nan um caah sualnak nih aan uk hna awk a si lo.
15 Cu a si ah zeitin? Nawlbia tang ah um ti loin Pathian vel tang ah kan um cang caah sualnak kan tuah awk a si lai maw? A si hrimhrim lo!
16 Mi pakhatkhat sinah sal bantuk in a nawlngaih awkah naa pek ahcun a nawl na ngaihmi i a sal na si cang ti kha na hngal lo maw? Sualnak sal na si ahcun thihnak ah aan hruai lai i nawlngaihnak sal na si ahcun dinnak ah aan hruai lai.
17 Nannih cu sualnak sal nan rak si nain nan hmuhmi cawnpiaknak kha lungthin dihlak in nan zulh caah Pathian kha ka lawmh.
18 Sualnak in luatter nan si cang caah dinnak sal nan si cang.
19 Nan pumsa derthawmnak ruang ah minung biachim in ka chimmi a si; a ṭhalomi thil tuah awkah nan pum ṭengnge kha thianlonak le ṭhatlonak sal ah nan rak pek bantuk in a thiangmi thil tuah awkah nan pum ṭengnge kha dinnak sal ah atu pe cang u.
20 Zeicahtiah sualnak sal nan rak si lioah cun a dingmi thil tuah awkah rian nan rak ngei lo.
21 Mah lio caan i nan tuahsernak nih a chuahpimi cu zeidah a si? Atu i nan zahpimi thil hna hi an si. Mah thil hna i an donghnak cu thihnak a si.
22 Asinain atu cu sualnak in luatter nan si i Pathian sal nan si cang caah nan tuahsernak nih a chuahpimi cu thiannak a si i a donghnak cu zungzal nunnak a si.
23 Zeicahtiah sualnak man cu thihnak a si, asinain Pathian pekmi laksawng cu kan Bawipa Khrih Jesuh thawng in zungzal nunnak a si.
